Beto Landa Mbandu ya Baprofete—Yoele
1. Inki mutindu beto lenda landa mbandu ya kudikulumusa ya Yoele ntangu beto ke samuna?
1 Profete Yoele vandaka nani? Yandi ke tubaka kaka nde yandi vandaka “mwana ya Petuele.” (Yoe. 1:1) Profete yai ya kudikulumusa bendaka dikebi na nsangu ya Yehowa, kansi ve na mukumba na yandi mosi ya kinati-nsangu. Mutindu mosi, na kisalu na beto ya kusamuna, na kisika ya kusosa lukumu na beto mosi to kuzabana, beto ke bendaka dikebi na Yehowa mpi na Biblia. (1 Bak. 9:16; 2 Bak. 3:5) Diaka, nsangu yina beto ke samunaka ke pesaka beto kikesa. Inki bitini ya mbikudulu ya Yoele lenda pesa beto kikesa mpi kivuvu bubu yai?
2. Inki beto fwete sala mutindu kilumbu ya Yehowa me kuma pene-pene?
2 ‘Kilumbu ya Yehowa Me Kuma Penepene.’ (Yoe. 1:15): Ata yandi sonikaka mambu yai bamvula mingi me luta, beto ke zinga na ntangu ya kulungana na yo ya nsuka. Mutindu mambu ya nsi-ntoto ke beba mpi bantu ya teritware na beto ke buya mpi ke sekaka beto ke monisa pwelele nde beto me kuma pene-pene ya bilumbu ya nsuka ya ngidika ya bima yai ya mbi. (2 Tim. 3:1-5; 2 Pie. 3:3, 4) Ntangu beto ke mona mutindu nsuka me kuma pene-pene, yo ke pesa beto bikuma ya mbote ya kutula kisalu ya kusamuna na kisika ya ntete na luzingu na beto.—2 Pie. 3:11, 12.
3. Sambu na nki kisalu ya kusamuna kele mfunu, mingi-mingi mutindu beto ke kuma pene-pene ya mpasi ya nene?
3 ‘Yehowa Ta Vanda Kisika Yina Bantu na Yandi Ta Tinina.’ (Yoe. 3:16): Beto lenda sadila ngogo kunikana, yina kele na verse yai, kaka sambu na kutubila ndola yina Yehowa ta pesa na nsungi ya mpasi ya nene. Kuzaba nde Yehowa ta gulusa bansadi na yandi ya kwikama na nsungi yina ke pesaka beto kikesa. (Kus. 7:9, 14) Ntangu beto ke salaka kisalu ya kusamuna mpi ke monaka mutindu Yehowa ke tanina mpi ke pesa beto ngolo, beto ke kumaka ti lukwikilu mpi ke kangaka ntima; bikalulu yai ta sadisa beto na nsungi ya mpasi ya nene yina ke kwisa.
4. Sambu na nki beto lenda vanda na kiese mpi kuvingila makwisa ti kivuvu?
4 Ata bantu ya nkaka me tubaka nde nsangu ya Yoele kele nsangu mosi ya mawa, yo ke pesaka bantu ya Nzambi kivuvu ya kitoko ya kuguluka. (Yoe. 3:5) Yo yina, bika nde beto vingila makwisa ti kivuvu mpi beto samuna nsangu ya mbote ya Kimfumu ya Nzambi ti kikesa ntangu beto ke tula dikebi na mambu yai ya kele na Yoele 2:23: “Beno vanda na kiese mingi, beno sepela sambu na Mfumu Nzambi, Nzambi na beno.”