Bamvutu na Bangiufula na Beno

◼ Na ntwala ya kundima nde nsamuni mosi kubaka mbotika, bantangu ikwa yandi fwete kwenda na balukutakanu ya dibundu mpi kusala kisalu ya kusamuna?

Kubaka mbotika kele lukanu mosi ya kuluta mfunu yina muntu ke bakaka. Yo yina, na ntwala ya kundima nde muntu kubaka mbotika, yandi fwete bakisa mbote mambu yina Nzambi ke lombaka sambu na yandi. Diaka, yandi fwete monisa dezia lukanu na yandi ya kuzinga na kuwakana ti mambu yina Nzambi ke lombaka.

Bo me pesaka Bakristu ntuma ya kuyambula ve kuvukana na balukutakanu na bo; yo yina nsamuni ya me bakaka ntete ve mbotika fwete monisa dezia bikesa na kuvukanaka na balukutakanu ya dibundu. (Baeb. 10:24, 25) Yo ta vanda mpi mbote nde yandi pesaka bakomantere. Ntembe kele ve nde yandi ta sonikisa mpi zina na Nzo-Nkanda ya Kisalu ya Teokrasi, ata yo kele ve na kati ya mambu yina bo ke lombaka.

Diaka, sambu bo me pesaka Bakristu ntuma ya kusamuna nsangu ya mbote mpi kukumisa bantu balongoki, nsamuni ya me bakaka ntete ve mbotika fwete samunaka mpi mbala na mbala na ntwala ya kubaka mbotika. (Mat. 24:14; 28:19, 20) Bangonda ikwa yandi fwete vanda nsamuni na ntwala ya kubaka mbotika? Na kutuba ya mbote, bo fwete bikila yandi ntangu ya kufwana sambu na kumonisa nde yandi kele ti lukanu ya ngolo ya kusamunaka na kikesa yonso konso ngonda. (Nk. 78:37) Kansi, yo fwete baka ve ntangu ya mingi tuka yandi yantikaka kusamuna tii ntangu yandi ta lungisa mambu yina Biblia ke lombaka sambu na kubaka mbotika; yo lenda baka kaka bangonda fioti. Yandi fwete pesa bangunga ikwa? Yo kele ve ti bantuma ya sikisiki na diambu yai. Bankuluntu fwete tadila mambu ya luzingu ya konso nsamuni mpi kuvanda ti bukati-kati.—Luka 21:1-4.

Bankuluntu (to bansadi ya kisalu na mabundu yina bankuluntu kele fioti) ya ke solula ti muntu yina ke zola kubaka mbotika fwete yibuka nde bantu yonso ke vandaka ve mutindu mosi, mpi bo fwete sadila luswasukusu sambu na kuzaba kana yandi me fwana na kubaka mbotika. Bo fwete ndimisama nde yandi kele na mpusa ya masonga ya kukuma Mbangi ya Yehowa mpi ke monisa ntonda na dibaku ya kuvukana ti organizasio ya Yehowa mpi kusala kisalu ya kusamuna. Bankuluntu ke bakisaka nde yandi me yela ntete ve na kimpeve to me kuma ntete ve na mayele bonso bansamuni ya me bakaka mbotika, bayina kele ti eksperiansi. Kana bankuluntu me mona nde nsamuni yango me fwana ve na kubaka mbotika, bo fwete songa yandi na mawete yonso bikuma ya Masonuku yina me pusa bo na kubaka desizio yina mpi kusadisa yandi na kimpeve.