Bangibusa ya Lukutakanu ya Distrike

Bangunga: Bilumbu yonso tatu manaka ta yantika na 8:20. Kansi sambu na bambanza yai ya nene: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpi Tshikapa, manaka ya balukutakanu ya distrike ta yantika konso kilumbu na 9:20. Bo ta kangula bakielo na 7:00 to na 8:00, na kutadilaka mutindu mambu ke salamaka na bwala na beno. Ntangu mutubi ta zabisa nde miziki ya luyantiku ke zola kubula, beto yonso fwete kwenda kuvanda na bisika na beto na mpila nde manaka kuyantika na mutindu mosi ya me fwana. Manaka ta suka na 15:55 na Kitanu ti na Mposo, mpi na Lumingu yo ta suka na 14:40. Sambu na bambanza ya beto me tanga na zulu, manaka ta sukaka ngunga mosi na nima.

Beto ‘Kumisa Yehowa na Nkunga’: Na ntangu ya ntama, bansadi ya Yehowa vandaka kukumisa yandi na bankunga. Bubu yai, bankunga ke vanda kaka mfunu na lusambu na beto. (Nk. 28:7) Na balukutakanu ya nene, miziki ke bulaka na ntwala nde konso kitini kuyantika. Yo ke vandaka ve miziki mosi ya mpamba-mpamba kansi, bo ke yidikaka yo sambu beto longuka mambu ya me tala Yehowa mpi kusambila yandi. Yo yina, kana ntwadisi me zabisa beto nde miziki ya kupemina ke zola kuyantika, yo ke monisaka nde ntangu me lunga sambu na kubaka bisika, kuwidikila miziki na ntonda yonso mpi kubika kubula masolo. Kana beto ke sala mutindu yai, beto ta monisa nde beto ke baka bikesa ya orkestre ya La Société na mbalu. Mbala zole na mvula, bampangi ya babakala mpi ya bankento ya kwikama ya ntoto ya mvimba ke futaka mbongo na bo sambu na kukwenda na Patterson, na New York sambu na kubula miziki ya kitoko ya ke pesaka beto kiese. Na nima ya kuwidikila na dikebi yonso miziki yai ya kupemina, konso muntu fwete yimba bankunga ya Kimfumu sambu na kukumisa Yehowa.

Kubumba Bisika ya Kuvanda: Beno lenda bumba bisika kaka sambu na bantu yina ke zingaka ti beno nzo mosi, bayina ke sala nzietelo ti beno, to bayina ke longukaka Biblia ti beno.

Kulwata ya Kukonda Mindondo: Beto fwete lwata mbote mpi kukonda mindondo na lukutakanu ya nene. Kulwata na beto fwete monisa ve mutindu ya nsi-ntoto. (1 Tim. 2:9) Beto fwete lwata ve kisaka-saka ntangu beto ke kota na kisika yina bo ke yambaka bantu na otele, ntangu beto ke basika, to ntangu beto ke baka mupepe na ntwala to na nima ya lukutakanu. Diaka, beto ta vanda na kiese ya kulwata makaro na beto ya lukutakanu mpi beto ta wa ve nsoni na kuta kimbangi ntangu dibaku me monana. Ntangu beto ta kwenda na lukutakanu ya distrike ya ke kwisa, mutindu na beto ya kulwata mpi bikalulu na beto ya mbote ta benda dikebi ya bantu ya masonga na nsangu ya Biblia yina ke gulusaka mpi yo ta sepedisa Yehowa.—Sof. 3:17.

Beto Sadila Mbote Ba-apareyi na Beto: Beto ke monisaka bikalulu ya mbote na lukutakanu ntangu beto ke yidika batelefone to ba-apareyi ya nkaka na mpila nde yo vwalangasa ve mabanza ya bantu ya nkaka. Sambu na kumonisila bantu ya nkaka luzitu ntangu beto ke sadila kamera, magnétoscope, tablette to apareyi ya nkaka, beto fwete benda ve dikebi na bo to kufika bo na kumona estrade. Beto ke monisaka diaka bikalulu ya mbote ntangu beto ke tindilaka ve bantu ya nkaka bansangu ya kukonda mfunu na telefone to na Internet ntangu lukutakanu ke salama. Beto ke lomba beno na kubingisa ve bantu yina ke kangaka bafoto ya mbongo na kisika ya lukutakanu. Kana beno mona bo na kisika ya lukutakanu, beno ndima ve nde bo kanga beno bafoto.—Yoa. 2:13-17.

Madia ya Midi: Beto ke lomba beno na kunata madia ya kukonda kilo kansi ya me fwana, mu mbandu: mampa, bambuma (mankondo), nguba, mikati to bagato. Beno fwete tula masa, kafe to te na kima mosi ya ke pasukaka ve sambu kisumbula kusalama ve. Ata muntu mosi ve kele ti nswa ya kunata malafu ya ke lausaka na lukutakanu ya distrike. Kana beto nata madia na beto ti kima ya kunwa, beto ta vanda ve na mfunu ya kusumba bima ya bantu yina ke teka na nganda. Kana beto sumba ve bima na bo, kisika na beto ya lukutakanu ta vanda bunkete mpi yo ta ta kimbangi ya mbote. (Beno simba nde: Bantu yina ke tekaka fwete kota ve ata fioti na kisika ya lukutakanu.—Yoa. 2:13-17).

Makabu: Beto lenda monisa ntonda na beto na bangidika ya lukutakanu ya distrike na kutulaka makabu ya luzolo ya mbote sambu na kisalu yina ke salama na ntoto ya mvimba. Ba chèque yonso yina bantu ke pesa, bo fwete tula yo na zina ya “Association ‘Les Témoins de Jéhovah.’”

Bankisi: Kana munganga me lombaka nge na kunwa nkisi mosi buna, kuvila ve na kunata yo, sambu bankisi ya mutindu yina ta vanda ve na lukutakanu. Beno fwete losa bantunga ya bantu ya diabete to bantunga ya nkaka na kisika mosi ya bo me yidika sambu na yo, kansi ve na bisika ya kulosa mvindu ya lukutakanu ya distrike.

Ba-Aksida mpi Maladi ya Kintulumukina: Kana muntu mosi me bela na kintulumukina na kisika ya lukutakanu ya distrike, beto ke lomba beno na kusolula ti mpangi mosi ya kisalu ya kuyamba bantu, ebuna yandi ta zabisa nswalu departema ya Lusadisu ya Ntete na mpila nde bampangi yina kele na lukutakanu mpi ya me zaba kisalu yango mbote kutadila maladi yango mpi kupesa lusadisu na bo.

Baformilere Veuillez suivre l’intérêt (S-43): Beno ta sadila formilere veuillez suivre l’intérêt sambu na kupesa bansangu ya ke tadila konso muntu yina sepelaka ti nsangu ntangu beno vandaka kuta kimbangi ya dibaku ya mbote na nsungi ya lukutakanu ya distrike. Na nima ya kufulusa yo, beno lenda pesa yo na Departema ya Mikanda to na sekretere ya dibundu na beno ntangu beno ta vutuka.

Barestora: Kumisa zina ya Yehowa na bikalulu na nge ya mbote na barestora. Lwata na mutindu ya me fwana na Bakristu. Kana na bwala yina yo ke lombaka kukabila bansadi ya restora mwa mbongo, pesa bo.

Na Bisika na Beto ya Kulala:

1. Kana bo me pesa beno kisika ya kulala, beno fwete lutisa ve ntalu ya bantu yina munkwa nzo ndimaka.

2. Kana nge ta lala ve na nzo yina nge lombaka, tuba yo kukonda kusukinina.

3. Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka bangidika yina kele mfunu.

4. Kusadila ve na mutindu ya mbi bangidika yina bo me baka sambu na banzenza. Beto fwete vanda ti bukatikati.

5. Beno fwete tulaka bunkete na kisika ya kulala, kuyidika yo mbote mpi kutula bima na ndonga. Yo ke tadila mpi Nzo ya Kimfumu, yina beno lenda sadila bonso kisika ya kulala sambu na bampangi yina ke katuka na mabundu ya ntama.

6. Monisa mbuma ya mpeve na bangwisana na nge ti bankaka, yo vanda munkwa nzo to bampangi ya nkaka yina bo lenda tula beno nzo mosi.—Gal. 5:22, 23.

Kisalu ya Luzolo ya Mbote: Konso muntu yina ke zola kusala bonso volontere na lukutakanu ya distrike fwete kwenda na Departema ya Bavolontere. Bana yina kele ti bamvula na nsi ya 16 lenda sala kumosi ti bibuti na bo to ti mbuta mosi yina bibuti me pesa nswa.