Longa Nsangu ya Mbote ti Kikesa Bonso Yezu

1. Tubila kima mosi ya ke salaka nde bansadi ya Yehowa kuswaswana ti bantu yina ke kudibingaka Bakristu.

BANSADI ya Yehowa ke longaka nsangu ya mbote ti kikesaa mpenza mpi yo ke salaka nde bo swaswana ti bantu yina ke kudibingaka Bakristu. (Tito 2:14) Kansi bantangu ya nkaka, yo lenda vandila nge mpasi na kusepela kulonga nsangu ya mbote. Nkuluntu mosi ya ke salaka ngolo na dibundu ke tuba nde: “Bantangu ya nkaka, mono ke waka mpenza ve nzala ya kulonga nsangu ya mbote.” Mbala ya nkaka nge ke kudiwaka mpi bonso yandi.

2. Sambu na nki yo lenda vanda mpasi bantangu ya nkaka na kulanda kulonga nsangu ya mbote ti kikesa?

² Beto lenda vanda na kiese mingi ntangu beto ke kudipesa na bisalu ya nkaka ya Yehowa kuluta kulonga nsangu ya mbote. Sambu na nki? Sambu ntangu beto ke tungaka Banzo ya Kimfumu to ke yidikaka yo, ntangu beto ke sadisaka bampangi yina me bwila mpasi to ntangu beto ke pesaka bampangi kikesa, beto ke monaka nswalu mbuma ya mbote yina yo ke butaka mpi yo ke pesaka beto kiese. Beto ke sepelaka kusala ti bampangi sambu beto ke salaka na ngemba, ke monisilanaka zola mpi beto ke zabaka nde bampangi ke sepelaka ti mambu yina beto ke salaka sambu na bo. Kansi mbala ya nkaka beto ke longaka nsangu ya mbote bamvula mingi na kisika mosi yina bantu mingi ke sepelaka mpenza ve ti yo. To nkutu bantu ya nkaka lenda buya kibeni kuwa nsangu yango. Diaka mutindu nsuka ke kuma kibeni pene-pene, bantu mingi lenda telemina mpenza nsangu ya mbote yina beto ke longaka. (Mat. 10:22) Kansi nki lenda sadisa beto na kulanda kuvanda kikesa na kisalu ya kulonga nsangu ya mbote to nkutu na kulonga yo diaka ti kikesa mingi?

3. Luka 13:6-9 ke longa beto nki sambu na Yezu?

³ Kulonguka mbandu ya Yezu ta sadisa beto na kulonga nsangu ya mbote ti kikesa. Ntangu Yezu vandaka na ntoto, yandi vandaka kulonga nsangu ya mbote ti kikesa ntangu yonso. Ya kieleka, kikesa na yandi vandaka kaka kukuma mingi konso kilumbu. (Tanga Luka 13:6-9.) Yandi pesaka mbandu ya muntu ya ke salaka na bilanga ya vinu. Muntu yango kunaka nti ya bafige mpi salaka bamvula tatu sambu na kuyedisa yo, kansi yo butaka ve mbuma. Mutindu mosi mpi, Yezu salaka bamvula kiteso ya tatu sambu na kulonga Bayuda nsangu ya mbote kansi mingi na kati na bo ndimaka yo ve. Kansi, mutindu muntu ya ke salaka na bilanga ya vinu vandaka kaka ti kivuvu nde nti na yandi ya bafige ta buta mbuma, Yezu mpi yambulaka ve bantu mpi yandi bwaka ve madidi na kulonga bo nsangu ya mbote. Kansi, yandi salaka diaka bikesa mingi sambu na kusimba bantima na bo.

4. Tubila mambu iya yina beto ta longuka na mbandu ya Yezu.

⁴ Na disolo yai beto ta longuka mutindu Yezu monisaka kikesa, mingi-mingi na bangonda 6 ya nsuka yina yandi longaka nsangu ya mbote awa na ntoto. (Luka 10:1) Beto ta landa kuvanda kikesa kana beto ke lemfuka na mambu yina yandi longaka mpi kana beto ke sala mambu yina yandi salaka. Beto tadila mambu iya yina beto lenda longuka na mbandu ya Yezu: (1) Yandi vandaka kutula dikebi mingi na luzolo ya Yehowa, (2) yandi vandaka kutula dikebi na baprofesi ya Biblia, (3) yandi vandaka kutula ntima na lusadisu ya Yehowa mpi (4) yandi landaka kutula ntima nde bantu ya nkaka diaka ta ndima nsangu ya mbote.

YANDI VANDAKA KUTULA DIKEBI MINGI NA LUZOLO YA YEHOWA

5. Inki mutindu Yezu monisaka nde kusala luzolo ya Nzambi vandaka kima ya kuluta mfunu na luzingu na yandi?

⁵ Yezu longaka “nsangu ya mbote ya Kimfumu” ti kikesa sambu yandi zabaka nde yo vandaka kisalu yina Nzambi pesaka yandi na kusala. (Luka 4:43) Sambu na Yezu, yo vandaka kisalu ya kuluta mfunu na luzingu na yandi. Nkutu na nsuka ya kisalu na yandi na ntoto, yandi vandaka kutambula “mbanza na mbanza mpi bwala na bwala” sambu na kulonga bantu. (Luka 13:22) Yandi pesaka mpi balongoki na yandi ya nkaka formasio ya kulonga ti yandi nsangu ya mbote.​—Luka 10:1.

6. Inki kuwakana ya ngolo kele na kati ya kisalu ya kulonga nsangu ya mbote ti bisalu ya nkaka yina beto ke salaka sambu na Yehowa? (Tala mpi kifwanisu.)

⁶ Bubu yai mpi, kulonga nsangu ya mbote kele kisalu ya kuluta mfunu yina Yehowa mpi Yezu ke zolaka nde beto sala. (Mat. 24:14; 28:19, 20) Bisalu yonso ya nkaka yina beto ke salaka na dibundu ya Yehowa kele ti kuwakana ya ngolo kibeni ti kisalu ya kulonga nsangu ya mbote. Mu mbandu, beto ke tungaka bisika na beto ya lusambu mpi beto ke sadilaka Yehowa na Betele sambu na kupesa maboko na kisalu ya kulonga nsangu ya mbote. Beto ke pesaka bampangi yina me bwila mpasi bima yina bo kele na yo mfunu sambu yo sadisa bo mpi na kuvutukila mambu ya kimpeve, mu mbandu kulonga nsangu ya mbote. Ntangu beto ke bakisaka mfunu ya kulonga nsangu ya mbote mpi ke yibukaka nde yo kele kisalu ya kuluta mfunu yina Yehowa ke zolaka nde beto sala, beto ke kumaka diaka ti nzala ya ngolo ya kulonga yo mbala na mbala. Mpangi János kele nkuluntu na Hongrie; yandi ke tuba nde: “Mono ke zabaka nde ata kisalu mosi ve ya kimpeve me luta kisalu ya kulonga nsangu ya mbote sambu yo kele kisalu na beto ya kuluta mfunu.”

7. Sambu na nki Yehowa ke zolaka nde beto landa kulonga nsangu ya mbote? (1 Timoteo 2:3, 4)

⁷ Beto lenda kuma kulonga nsangu ya mbote ti kikesa mingi kana beto ke tadila bantu mutindu Yehowa ke tadilaka bo. Yandi ke zolaka kibeni nde bantu mingi kuwa nsangu ya mbote mpi bo ndima kieleka. (Tanga 1 Timoteo 2:3, 4.) Yo yina, yandi ke pesaka beto formasio sambu beto kuma kulonga mbote mpenza nsangu ya mbote yina lenda gulusa luzingu ya bantu. Mu mbandu, kamukanda Zola Bantu​—Kumisa Bo Balongoki ke longaka beto mutindu ya kuyantika kusolula ti bantu sambu na kubanda kulonguka ti bo Biblia mpi kukumisa bo balongoki. Ata bantu ya nkaka ke ndima ve nsangu ya mbote bubu yai, bo lenda ndima yo na ntwala nde mpasi ya nene kusuka. Mambu yina beto ke longaka bo bubu yai lenda pusa bo na kundima nsangu ya mbote na bilumbu ke kwisa. Kansi yo lenda salama kaka kana beto ke landa kulonga nsangu ya mbote.

YANDI VANDAKA KUTULA DIKEBI NA BAPROFESI YA BIBLIA

8. Inki mutindu kuzaba baprofesi ya Biblia sadisaka Yezu na kusadila ntangu na yandi mbote kibeni?

⁸ Yezu bakisaka mutindu baprofesi ya Biblia zolaka kulungana. Yandi zabaka nde kisalu na yandi ya kulonga nsangu ya mbote ta sala kaka bamvula tatu ti ndambu. (Dan. 9:26, 27) Yandi zabaka mpi baprofesi yina vandaka kutubila ntangu mpi mutindu yandi ta fwa. (Luka 18:31-34) Mambu yina yandi zabaka vandaka kupusa yandi na kusadila ntangu na yandi mbote kibeni. Yo yina, yandi vandaka kulonga nsangu ya mbote ti kikesa sambu na kumanisa kisalu yai ya Tata na yandi pesaka yandi.

9. Sambu na nki kubakisa mutindu baprofesi ya Biblia ke lungana ke sadisaka beto na kulonga nsangu ya mbote ti kikesa?

⁹ Kana beto ke bakisa mutindu baprofesi ya Biblia ke lungana bubu yai mpi mutindu yo ta lungana ntama mingi ve, yo ta sadisa beto na kulonga nsangu ya mbote ti kikesa. Beto ke zabaka nde ntangu me bikala fioti sambu nsi-ntoto yai kufwa. Beto ke bakisaka mpi nde mambu ya ke salama bubu yai mpi bikalulu ya mbi yina bantu me kuma ti yo ke lungisa mambu yina Biblia tubilaka sambu na bilumbu ya nsuka. Mutindu Ngolo ya Nsi-Ntoto ya Mvimba ya Anglo-Amerika ke bendana ti Russie mpi bansi yina ke pesaka yo maboko, yo ke sadisa beto na kubakisa nde yo kele kulungana ya profesi ya ke tubila ntotila ya nordi ti ntotila ya sudi “na ntangu ya nsuka.” (Dan. 11:40) Beto ke bakisa mpi nde makulu ya kiteki yina Daniele 2:43-45 ke tubila ke monisa Ngolo ya Nsi-Ntoto ya Mvimba ya Anglo-Amerika. Mutindu profesi yai ke monisa yo, beto ke ndima nde kubika fioti mpenza Kimfumu ya Nzambi ta fwa baluyalu yonso ya bantu. Baprofesi yai yonso ke monisa nde beto ke zinga mpenza pene-pene ti nsuka ya nsi-ntoto yai mpi yo ke pusa beto na kusadila mbote mpenza ntangu ya me bikala sambu na kulonga nsangu ya mbote.

10. Tubila mitindu ya nkaka yina baprofesi ya Biblia ke pusaka beto na kulonga nsangu ya mbote ti kikesa.

¹⁰ Baprofesi ya Biblia ke tubilaka mpi nsangu mosi yina beto ke sepelaka kusonga bantu ya nkaka. Mpangi-nkento Carrie, na République dominicaine, ke tuba nde: “Balusilu ya Yehowa ya ke tubilaka luzingu ya kitoko kibeni na bilumbu ke kwisa ke pusaka mono na kusonga yo na bantu ya nkaka.” Yandi ke yika nde: “Ntangu mono ke monaka bampasi yina bantu ke kutanaka ti yo bubu yai, mono ke bakisaka nde balusilu yango kele ve kaka sambu na mono mosi kansi sambu na bo mpi.” Baprofesi ya Biblia ke sadisaka beto na kulanda kulonga nsangu ya mbote sambu beto ke zabaka nde Yehowa muntu ke sadisaka beto na kulonga nsangu yango. Mpangi-nkento Leila, na Hongrie, ke tuba nde: “Yezaya 11:6-9 ke pusaka mono na kulonga nsangu ya mbote nkutu ata na bantu yina mono ke monaka bonso nde bo ta ndima yo ve. Mono ke zabaka nde bantu yonso lenda soba na lusadisu ya Yehowa.” Mpangi Christopher, na Zambie, ke tuba nde: “Mutindu Marko 13:10 tubilaka yo, bansadi ya Yehowa ke longa nsangu ya mbote na ntoto ya mvimba mpi yo kele lukumu sambu na mono na kupesa maboko na kulungana ya profesi yai.” Inki baprofesi ya Biblia ke pusaka nge na kulanda kulonga nsangu ya mbote?

YANDI TULAKA NTIMA NA LUSADISU YA YEHOWA

11. Sambu na nki yo lombaka nde Yezu kutula ntima na lusadisu ya Yehowa sambu na kulanda kulonga nsangu ya mbote ti kikesa? (Luka 12:49, 53)

¹¹ Yezu vandaka kutula ntima nde Yehowa ta sadisa yandi na kulanda kulonga nsangu ya mbote ti kikesa. Ata Yezu vandaka kulonga bantu ti luzitu, yandi zabaka nde nsangu ya mbote ya Kimfumu ta sala nde bantu ya nkaka kubasisa mavwanga ya ngolo mpi kutelemina yo ngolo. (Tanga Luka 12:49, 53.) Bamfumu ya mabundu vandaka ve kusepela ti nsangu ya mbote yina Yezu vandaka kulonga. Yo yina mbala mingi bo sosaka kufwa yandi. (Yoa. 8:59; 10:31, 39) Kansi Yezu landaka kulonga nsangu ya mbote sambu yandi zabaka nde Yehowa vandaka ti yandi. Yandi tubaka nde: “Mono kele ve mono mosi, kansi Tata yina tindaka mono kele ti mono. . . . Yandi bikisaka mono ve mono mosi, sambu mono ke salaka ntangu yonso mambu yina ke pesaka yandi kiese.”​—Yoa. 8:16, 29.

12. Inki mutindu Yezu sadisaka balongoki na yandi na kuvanda ya kuyilama sambu na kulanda kulonga nsangu ya mbote ata ntangu bantu ke telemina bo?

¹² Yezu yibusaka balongoki na yandi nde bo fwete tudila Yehowa ntima sambu yandi sadisa bo. Yezu sadisaka bo mbala na mbala na kutula ntima nde Yehowa ta sadisa bo ata ntangu bantu ke niokula bo. (Mat. 10:18-20; Luka 12:11, 12) Yo yina, yandi songaka bo na kuvanda mayele. (Mat. 10:16; Luka 10:3) Yandi songaka bo na kulonga ve bantu nsangu ya mbote na kingolo-ngolo. (Luka 10:10, 11) Yandi songaka bo mpi na kutina kana bantu ke niokula bo. (Mat. 10:23) Yezu vandaka kulonga nsangu ya mbote ti kikesa mpi kutudila Yehowa ntima. Ata mpidina, yandi vandaka ve kuditula na kigonsa kukonda mfunu.​—Yoa. 11:53, 54.

13. Inki ke ndimisa nge nde Yehowa ta sadisa nge?

¹³ Beto kele ti mfunu ya lusadisu ya Yehowa sambu na kulanda kulonga nsangu ya mbote ti kikesa ata ntangu bantu ke telemina beto bubu yai. (Kus. 12:17) Inki ke ndimisa nge nde Yehowa ta sadisa nge? Beto tadila kisambu ya Yezu na Yoane kapu 17. Yezu lombaka Yehowa na kutanina bantumwa na yandi mpi Yehowa pesaka mvutu na kisambu yina. Mukanda ya Bisalu ke tubila mutindu Yehowa sadisaka bantumwa na kulonga nsangu ya mbote ti kikesa ata ntangu bantu vandaka kuniokula bo. Na kisambu yango, Yezu lombaka mpi Yehowa na kutanina bantu yina ta kwikila na mambu yina bantumwa ta longa bo mpi yina ta kuma balongoki na yandi. Nge kele mpi na kati ya bantu yango. Tii bubu yai, Yehowa ke landaka kupesa mvutu na kisambu yai ya Yezu mpi yandi ta sadisa nge kaka mutindu yandi sadisaka bantumwa.​—Yoa. 17:11, 15, 20.

14. Inki ke ndimisa beto nde beto ta landa kulonga nsangu ya mbote ti kikesa? (Tala mpi kifwanisu.)

¹⁴ Mutindu nsuka ke kuma kibeni pene-pene, yo ke kuma diaka mpasi mingi na kulonga nsangu ya mbote ti kikesa. Ata mpidina, beto ta baka lusadisu yina beto kele ti yo mfunu. (Luka 21:12-15) Bonso Yezu ti balongoki na yandi, beto ke bikaka nde bantu bo mosi kupona kana bo ta ndima nsangu ya mbote to ve mpi beto ke buyaka kubendana ti bo. Ata ntangu bo ke buyisaka kisalu na beto ya kulonga nsangu ya mbote, bampangi na beto ke landaka kulonga yo sambu bo ke tulaka ntima na Yehowa kansi ve na ngolo na bo mosi. Mutindu Yehowa pesaka Bakristu ya ntete ngolo, bubu yai mpi, yandi ke pesaka beto ngolo ya kulanda “[kulonga] mbote-mbote nsangu ya mbote” tii ntangu yandi ta tuba nde yo me lunga. (2 Tim. 4:17) Ndima nde kana nge ke tudila Yehowa ntima, nge ta landa kulonga nsangu ya mbote ti kikesa.

YANDI LANDAKA KUTULA NTIMA NDE BANTU YA NKAKA DIAKA TA NDIMA NSANGU YA MBOTE

15. Inki ke monisa nde Yezu vandaka kutula ntima nde bantu ya nkaka diaka ta ndima nsangu ya mbote?

¹⁵ Yezu landaka kutula ntima nde bantu ya nkaka diaka ta ndima nsangu ya mbote. Yo sadisaka yandi na kulanda kulonga yo ti kiese. Mu mbandu na nsuka ya mvula 30 ya ntangu na beto, Yezu monaka mutindu bantu mingi ndimaka nsangu ya mbote yina yandi vandaka kulonga mpi yandi fwanisaka bo ti bilanga ya kele ti bima ya me yela mpi yina ntangu ya kukatula yo me lunga. (Yoa. 4:35) Kiteso ya mvula mosi na nima, Yezu songaka balongoki na yandi nde: “Bima ya kukatula na bilanga kele mingi.” (Mat. 9:37, 38) Mpi na nima yandi tubaka diaka nde: “Bima ya kukatula na bilanga kele mingi . . . Beno bondila Mfumu ya kisalu ya kukatula bima na bilanga na kutinda bansadi na kisalu na yandi ya kukatula bima na bilanga.” (Luka 10:2) Yezu vandaka kaka kutula ntima nde bantu ya nkaka diaka ta ndima nsangu ya mbote mpi yandi vandaka na kiese ntangu bo vandaka kundima yo.​—Luka 10:21.

16. Inki mutindu bambandu yina Yezu pesaka sadisaka balongoki na yandi na kutula ntima nde bantu ya nkaka diaka ta ndima nsangu ya mbote? (Luka 13:18-21) (Tala mpi kifwanisu.)

¹⁶ Yezu longaka balongoki na yandi na kutula ntima nde bantu ya nkaka diaka ta ndima nsangu ya mbote sambu na kusadisa bo na kulanda kulonga yo ti kikesa. Mu mbandu, beto tadila bambandu zole yina yandi pesaka. (Tanga Luka 13:18-21.) Yezu pesaka mbandu ya nkeni ya mutarde sambu na kumonisa nde nsangu ya Kimfumu ta mwangana na mutindu ya kuyituka mpi nde ata muntu mosi ve ta kuka kukanga yo nzila ya kumwangana. Yandi pesaka mpi mbandu ya levire sambu na kutubila mutindu nsangu ya Kimfumu ta mwangana mpenza mpi mutindu yo ta sadisa bantu na kusala bansoba ya nene yina bantu ya nkaka lenda mona ve na mbala mosi. Yo yina, Yezu sadisaka balongoki na yandi na kubakisa nde nsangu ya mbote yina bo vandaka kulonga ta sadisa bantu mingi.

17. Inki bikuma ke pusaka beto na kutula ntima nde bantu ya nkaka diaka ta ndima nsangu ya mbote?

¹⁷ Ntangu beto ke monaka mutindu nsangu ya mbote ke sadisaka bantu mingi bubu yai na ntoto ya mvimba, yo ke pusaka beto na kulanda kulonga yo ti kikesa. Konso mvula, bamilio ya bantu ke kwisaka na Nkinsi ya Kuyibuka Lufwa ya Yezu mpi bo ke longukaka Biblia ti beto. Bantu mingi mpenza ke bakaka mbotika mpi ke kumaka kulonga nsangu ya mbote ti beto. Beto me zaba ve bantu ikwa diaka ta ndima nsangu ya mbote, kansi beto me zaba nde Yehowa kele na kuvukisa bantu ya kimvuka ya nene yina ta guluka na mpasi ya nene ya ke kwisa. (Kus. 7:9, 14) Yehowa Mfumu ya kisalu ya kukatula bima na bilanga ke tulaka ntima nde bantu ya nkaka diaka ta ndima nsangu ya mbote, yo yina beto fwete landa kulonga yo.

18. Beto ke zolaka nde bantu ya nkaka kubakisa nki ntangu bo ke monaka beto ke longa nsangu ya mbote?

¹⁸ Bantu ke zabaka ntangu yonso balongoki ya Yezu sambu bo ke longaka nsangu ya mbote ti kikesa. Ntangu bantu monaka mutindu bantumwa vandaka kulonga nsangu ya mbote ti kikesa mpi kiese, “bo bakisaka nde bo vandaka ti Yezu.” (Bis. 4:13) Ntangu bantu ke monaka mpi beto ke longa nsangu ya mbote, beto ke zolaka bo bakisa mpi nde beto ke landaka mbandu ya kikesa ya Yezu.