Ndima nde Yehowa Ke Zolaka Nge

1. Sambu na nki nge me kudipesaka na Yehowa? (Tala mpi kifwanisu)

KETI nge ke yibuka ntangu yina nge salaka kisambu na Yehowa mpi nge songaka yandi nde nge me kudipesa na yandi? Nge bakaka lukanu yai sambu nge zabaka yandi mpi nge kumaka kuzola yandi. Nge silaka yandi nde nge ta tula luzolo na yandi na kisika ya ntete na luzingu na nge mpi nge ta landa kuzola yandi na ntima na nge ya mvimba, na moyo na nge ya mvimba, na mabanza na nge yonso mpi na ngolo na nge yonso. (Marko 12:30) Banda pana, zola na nge sambu na yandi ke landaka kaka kukuma mingi. Ebuna nki mvutu nge ta pesaka kana muntu me yula nge nde: “Keti nge ke ndimaka kibeni nde nge ke zolaka Yehowa? Nge ta vutudila yandi kukonda mpasi nde: “Mono ke zolaka yandi kuluta bima yonso mpi bantu yonso!”

2-3. Inki Yehowa ke zolaka nde beto ndima mpi nki beto ta longuka na disolo yai? (Yeremia 31:3)

² Ebuna nki mvutu nge ta pesa kana muntu mosi me yula nge nde: “Keti nge ke ndima kibeni nde Yehowa ke zolaka nge?” Keti yo ta vandila nge mpasi na kupesa mvutu, mbala ya nkaka sambu nge ke yindula nde nge me fwana ve nde Yehowa kuzola nge? Mpangi-nkento mosi yina bo vandaka kuniokula na kileke ke tuba nde: “Mono ke vandaka ve ata fioti ti badute nde mono ke zolaka Yehowa. Kansi mbala mingi, mono ke vandaka ti badute kana Yehowa ke zolaka mono mpenza.” Ebuna, nki lenda sadisa nge na kuzaba kana Yehowa ke zolaka nge mpenza?

³ Yehowa ke zola nde nge ndima kibeni nde yandi ke zolaka nge. (Tanga Yeremia 31:3.) Diambu ya kieleka kele nde Yehowa me bendaka nge na yandi. Diaka, ntangu nge bakaka mbotika mpi nge kudipesaka na yandi, yandi pesaka nge kado mosi ya valere mingi kibeni. Kado yango kele zola na yandi ya kwikama. Zola yango kele ya mudindu mpi yo ke manaka ve ata fioti. Yo ke salaka nde Yehowa kutadila bansadi na yandi yonso, yo vanda nge mpi, bonso ‘kima na yandi ya ntalu.’ (Mal. 3:17, noti na nsi ya lutiti.) Yehowa ke zolaka nde nge ndima kibeni bonso ntumwa Polo nde yandi ke zolaka nge. Polo vandaka kundima kibeni nde Yehowa ke zolaka yandi, yo yina yandi sonikaka nde: “Mono ke ndima nde yo vanda lufwa to luzingu to bawanzio to baluyalu to bima ya ntangu yai to bima yina ta kwisa to bangolo to bima yina kele na zulu to bima yina kele na nsi to konso kima ya nkaka yina Nzambi salaka, ata kima mosi ve ta kuka kukabula beto na zola ya Nzambi.” (Bar. 8:38, 39) Na disolo yai, beto ta longuka bikuma yina fwete pusa beto na kundima kibeni nde Yehowa ke zolaka beto mpi mambu yina beto fwete sala sambu na kukuma kundima diaka mingi kibeni nde yandi ke zolaka beto.

SAMBU NA NKI BETO FWETE NDIMA NDE YEHOWA KE ZOLAKA BETO?

4. Inki kele mayele mosi ya mbi yina Satana ke sadilaka mpi nki mutindu beto lenda telemina yandi?

⁴ Kana beto ke ndima nde Yehowa ke zolaka beto, beto ta nwanisa ‘mayele mosi ya mbi’ ya Satana. (Baef. 6:11) Satana ke salaka yonso sambu na kupusa beto na kuyambula kusadila Yehowa. Mayele mosi ya mbi yina yandi ke sadilaka kele ya kukusa beto nde Yehowa ke zolaka beto ve. Kuvila ve ata fioti nde Satana ke sosaka mabaku ya mbote sambu na kukusa beto. Mbala mingi, yandi ke nwanisaka beto ntangu beto kele ve ti ngolo, beto kele ya kulemba to beto kele na mawa sambu na mambu ya mpasi yina beto me kutanaka ti yo, yina beto ke kutana ti yo to sambu beto ke wa boma ya mambu yina lenda kumina beto na bilumbu ke kwisa. (Bing. 24:10) Biblia ke fwanisaka Satana ti ntambu. Ntambu ke zolaka kunwanisa bambisi yina kele ve ngolo mpi yina ke kuka ve kuditanina. Satana mpi ke sosaka kunwanisa beto ntangu beto me lemba mpi beto ke kudiyangisa na mabanza sambu na kupusa beto na kuyambula kusadila Yehowa. Kansi beto ta telemina Diabulu mpi mitambu na yandi kana beto ke ndima kibeni nde Yehowa ke zolaka beto.​—1 Pie. 5:8, 9; Yak. 4:7.

5. Sambu na nki yo kele mfunu na kundima nde Yehowa ke zolaka nge mpi ke bakaka nge na valere?

⁵ Kana beto ke ndima nde Yehowa ke zolaka beto, beto ta pusana kibeni pene-pene na yandi. Sambu na nki beto ke tuba mutindu yai? Yehowa salaka beto ti nzala ya kuzola bantu mpi ya kuzola nde bo zola beto. Kana muntu mosi ke zola beto, yo ke salaka nde beto zola yandi mpi. Yo yina, kana beto ke bakisa nde Yehowa ke zolaka beto mingi mpenza mpi ke bakaka beto na valere, zola na beto sambu na yandi ta kuma mpi mingi. (1 Yoa. 4:19) Diaka, kana zola na beto sambu na yandi ke yela, zola na yandi sambu na beto ta yela mpi. Biblia ke songa beto pwelele nde: “Beno kwenda pene-pene na Nzambi, ebuna yandi ta kwisa pene-pene na beno.” (Yak. 4:8) Ebuna, nki mutindu beto lenda kuma kundima mingi kibeni nde Yehowa ke zolaka beto?

INKI LENDA SADISA BETO NA KUNDIMA NDE YEHOWA KE ZOLAKA BETO?

6. Kana nge ke ndima mpenza ve nde Yehowa ke zolaka nge, nki nge lenda sala?

⁶ Landa kusamba Yehowa sambu yandi sadisa nge na kubakisa sambu na nki yandi ke zolaka nge. (Luka 18:1; Bar. 12:12) Samba Yehowa mbala mingi konso kilumbu kana mpila kele sambu yandi sadisa nge na kudimona mutindu yandi ke monaka nge. Ya kieleka, bantangu ya nkaka ntima na nge lenda ndimisa nge nde nge kele ve muntu ya mbote mpi yo lenda vandila nge mpasi na kundima nde Yehowa ke zolaka nge. Kansi, kuvila ve nde Yehowa kele nene kuluta ntima na nge. (1 Yoa. 3:19, 20) Yandi ke zabaka nge mbote kibeni kuluta nge mosi mpi yandi ke monaka bikalulu ya mbote yina nge ke vandaka ti yo ata nge mosi ke monaka yo ve. (1 Sam. 16:7; 2 Bans. 6:30) Yo yina, kuvanda ve ti badute ya kusonga yandi mutindu nge ke kudiwa mpi lomba yandi na kusadisa nge na kundima nde yandi ke zolaka nge. (Nk. 62:8) Na nima ya kusamba, sala mambu yai ya ke landa na kuwakana ti bisambu na nge.

7-8. Inki mutindu mukanda ya Bankunga ke ndimisaka beto kibeni nde Yehowa ke zolaka beto?

⁷ Tula ntima na mambu yina Yehowa ke tubaka. Yehowa pesaka bantu yina sonikaka Biblia mpeve santu sambu na kutubila yandi mutindu yandi kele kibeni. Na nkunga mosi yina Davidi sonikaka, yandi tubilaka na mutindu ya mbote kibeni mutindu Yehowa ke kebaka beto: “Yehowa kele pene-pene ya bantu yina kele na mawa; yandi ke gulusaka bantu yina me lemba nitu.” (Nk. 34:18, noti na nsi ya lutiti.) Kana nge kele na mawa, nge lenda yindula nde nge kele nge mosi. Kansi Yehowa ke tuba nde na bantangu ya mutindu yai, yandi ke vandaka pene-pene ti nge sambu yandi ke bakisaka nde nge kele ti mfunu ya lusadisu na yandi mingi kuluta. Davidi sonikaka na nkunga ya nkaka nde: “Baka mansanga na mono na dibungu na nge ya mpusu ya mbisi.” (Nk. 56:8) Yehowa ke monaka ntangu nge kele na mawa mpi na mpasi. Yandi ke kudiyangisaka mingi kibeni sambu na nge. Ntangu nge ke kutanaka ti bampasi, yo ke salaka yandi mpi mpasi. Konso ditanga ya masa na dibungu ya mpusu ya mbisi ke vandaka mfunu mingi sambu na muntu yina ke sala voyage na ntoto ya zelo na zelo. Mutindu mosi mpi, mansanga yina nge ke basisaka ke vandaka na valere mingi na meso ya Yehowa mpi yandi ke yibukaka kudila na nge mpi bampasi na nge yonso. Na Nkunga 139:3, Davidi songaka Yehowa nde: “Nge me zaba mbote banzila na mono yonso.” Yehowa ke monaka banzila na nge yonso, kansi yandi ke tulaka dikebi ya mingi na mambu ya mbote yina nge ke salaka. (Baeb. 6:10) Sambu na nki? Sambu yandi ke bakaka na valere bikesa yonso yina nge ke salaka sambu na kusepedisa yandi.a

⁸ Yehowa ke sadila baverse ya mutindu yai ya ke pesa kikesa na Ndinga na yandi sambu na kusonga nge nde: “Mono ke zola nde nge bakisa nde mono ke zolaka nge mingi mpi nde mono ke kudiyangisaka sambu na nge.” Kansi mutindu beto monaka yo, Satana ke sosaka kundimisa nge nde Yehowa ke zolaka nge ve. Yo yina kana bantangu ya nkaka nge kele ti badute mpi nge ke yindula nde Yehowa ke zolaka nge ve, baka mwa ntangu mpi kudiyula nde: ‘Nani mono ta kwikila? “tata ya luvunu” to “Nzambi ya kieleka”?’​—Yoa. 8:44; Nk. 31:5.

9. Inki Yehowa ke ndimisa bantu yina ke zolaka yandi? (Kubasika 20:5, 6)

⁹ Yindula mutindu Yehowa ke kudiwaka sambu na bantu yina ke zolaka yandi. Beto tadila mambu yina Yehowa tubilaka Moize mpi bantu ya Izraele. (Tanga Kubasika 20:5, 6.) Yehowa ke sila nde yandi ta landa kumonisa zola ya kwikama na bantu yina ke zolaka yandi. Mambu yai ke ndimisa beto nde Nzambi na beto ya kwikama ta landa kuzola bantu yina ke zolaka yandi mpi yandi ta buya ve kumonisila bo zola. (Neh. 1:5) Yo yina bantangu ya nkaka kana nge kele ti badute mpi nge ke yindula nde Yehowa ke zolaka nge ve, baka ntete mwa ntangu mpi kudiyula nde: ‘Keti mono ke zolaka Yehowa?’ Na nima yindula mambu yai: Kana nge ke zolaka Yehowa mpi nge ke salaka yonso sambu na kusepedisa yandi, ndima nde yandi ke zolaka nge mingi kibeni. (Dan. 9:4; 1 Bak. 8:3) Na kutuba ya nkaka, kana nge kele ve ti badute nde nge ke zolaka Yehowa, kuvanda mpi ve ti badute nde yandi ke zolaka nge. Ndima kibeni nde yandi ta landa kaka kuzola nge mpi ta yambula nge ve ata fioti.

10-11. Inki mutindu Yehowa ke zolaka nde nge tadila kimenga ya Yezu? (Bagalatia 2:20)

¹⁰ Yindula mingi kimenga ya Yezu. Kimenga ya Yezu kele dikabu ya kuluta nene yina Yehowa me pesaka bantu. (Yoa. 3:16) Keti dikabu yai kele mpi sambu na nge? Ee! Beto tadila mbandu ya ntumwa Polo. Yandi salaka mambu ya mbi kibeni na ntwala ya kukuma Mukristu. Ata na nima ya kukuma Mukristu, yo lombaka nde yandi landa kunwana sambu na kusala mambu ya mbote sambu yandi vandaka muntu ya kukonda kukuka. (Bar. 7:24, 25; 1 Tim. 1:12-14) Yo yina, yandi kumaka kutadila kimenga ya Yezu bonso dikabu yina Yehowa pesaka yandi. (Tanga Bagalatia 2:20.) Kuvila ve nde Yehowa muntu pesaka Polo mpeve santu sambu na kusonika mambu yai na Biblia. Diaka, mambu yonso na Biblia kele sambu na kulonga beto. (Bar. 15:4) Mambu yina Polo sonikaka ke monisa mutindu Yehowa ke zola nde nge tadila kimenga ya Yezu, disongidila bonso dikabu yina yandi me pesaka nge. Kana nge ke tadila kimenga ya Yezu mutindu yai, yo ta ndimisa nge kibeni nde Yehowa ke zolaka nge.

¹¹ Beto ke pesaka Yehowa mersi mingi sambu yandi tindaka Yezu na ntoto na kufwa sambu na beto. Kansi kikuma ya nkaka ya Yezu kwisaka awa na ntoto kele sambu na kulonga bantu kieleka ya me tala Nzambi. (Yoa. 18:37) Yezu longaka beto mpi kieleka ya me tala mutindu Yehowa ke zolaka beto bana na yandi.

MUTINDU YEZU KE SADISAKA BETO NA KUNDIMA NDE YEHOWA KE ZOLAKA BETO

12. Sambu na nki beto fwete ndima mambu yina Yezu tubaka sambu na Yehowa?

¹² Ntangu Yezu vandaka na ntoto, yandi monisaka na luzolo yonso mutindu Yehowa ke vandaka. (Luka 10:22) Beto kele ti bikuma ya mbote ya kundima mpenza mambu yina Yezu tubaka sambu na Yehowa. Yezu zingaka bantangu ya nda kibeni ti Yehowa na zulu na ntwala ya kukwisa na ntoto. (Bakol. 1:15) Yezu zabaka mbote-mbote mutindu Yehowa ke zolaka yandi mingi kibeni. Diaka, yandi me monaka mbote-mbote mutindu Tata na yandi me monisaka zola na yandi sambu na bawanzio na yandi ya kwikama mpi sambu na bana na yandi yonso ya kwikama awa na ntoto. Inki mutindu Yezu ke sadisaka bantu na kundima nde Yehowa ke zolaka bo?

13. Inki mutindu Yezu ke zolaka nde beto tadila Yehowa?

¹³ Yezu ke zolaka nde beto tadila Yehowa mutindu yandi ke tadilaka yandi. Na Baevanzile, Yezu bingaka Yehowa nde “Tata” mbala kuluta 160. Ntangu yandi vandaka kusolula ti balongoki na yandi, yandi vandaka kusadila bangogo yai: “Tata na beno” to “Tata na beno ya kele na zulu.” (Mat. 5:16; 6:26) Noti ya kulongukila ya kele na Matayo 5:16 na Biblia ya Kifalansa ke tuba nde: “Na ntwala nde Yezu kukwisa na ntoto, bansadi ya Yehowa vandaka kusadila batitre mingi sambu na kubinga Yehowa, mu mbandu ‘Nkwa-Ngolo Yonso,’ ‘Muntu ya Kuluta Nene’ mpi ‘Ngangi ya Nene.’ Kansi, Yezu vandaka mbala mingi kubinga Yehowa nde ‘Tata’ mpi yo ke monisa nde Yehowa ke zolaka nde bansadi na yandi kukangama ngolo ti yandi mutindu mwana ke kangamaka ngolo ti tata na yandi yina ke zolaka yandi.” Yo kele pwelele nde Yezu ke zolaka nde beto tadila Yehowa mutindu yandi ke tadilaka yandi, disongidila bonso tata ya zola yina ke zolaka mingi bana na yandi. Beto tadila bambala zole yina Yezu sadilaka ngogo “Tata” sambu na kutubila Yehowa.

14. Inki mutindu Yezu monisaka nde konso muntu na kati na beto kele na valere mingi na meso ya Tata na beto ya zulu? (Matayo 10:29-31) (Tala mpi kifwanisu.)

¹⁴ Ntete, beto tadila mambu yina Yezu tubaka na Matayo 10:29-31. (Tanga.) Bandeke lenda zola ve Yehowa ata fioti mpi yo lenda sambila yandi ve. Kansi, Yehowa ke bakaka na valere mingi ata ndeke mosi ya fioti mpi yandi ke zabaka ntangu yina yo ke bwaka na ntoto. Yo ke monisa kibeni nde Yehowa ke kebaka mpi ke bakaka na valere mingi kibeni bansadi na yandi yina ke landaka kusadila yandi na mutindu ya mbote sambu bo ke zolaka yandi. Yezu tubaka mpi nde Tata na beto ya zulu ke zabaka mingi ya nsuki yina beto ke vandaka ti yo na ntu. Mutindu Yehowa ke zabaka ata mambu ya fioti-fioti ya me tala beto, yo ke monisa mpenza nde yandi ke tudilaka beto dikebi mingi. Ya kieleka, Yezu ke zola nde beto ndima kibeni nde konso muntu na kati na beto kele na valere mingi na meso ya Tata na beto ya zulu..

15. Mambu yina Yezu tubaka na Yoane 6:44 ke longa nge nki sambu na Tata na nge ya zulu?

¹⁵ Beto tadila ntangu ya nkaka yina Yezu sadilaka ngogo “Tata.” (Tanga Yoane 6:44.) Tata na nge ya zulu bendaka nge na kieleka. Sambu na nki yandi bendaka nge? Sambu yandi monaka nde nge vandaka ti ntima ya mbote. (Bis. 13:48) Ntangu Yezu tubaka mambu yai na Yoane 6:44, mbala ya nkaka yandi vandaka kutubila mambu yina kele na Yeremia 31:3. Yehowa songaka bansadi na yandi na verse yai nde: “Mono bendaka nge na mono na zola ya kwikama [to mono landaka kumonisila nge zola ya kwikama].” (Yer. 31:3; noti na nsi ya lutiti; Tala mpi Ozea 11:4.) Mambu yai ke tendula nki? Tata na beto ya zulu yina ke zolaka beto mingi ke monaka ntangu yonso mambu ya mbote na ntima na nge ata nge mosi ke monaka yo ve.

16. (a) Inki Yezu ke songa beto mpi sambu na nki beto fwete kwikila mambu yango? (b)Inki lenda sadisa nge na kundima kibeni nde Yehowa kele Tata ya kuluta mbote sambu na nge? (Tala lupangu “Tata Yina Beto Yonso Kele ti Mfunu na Yandi.”)

¹⁶ Mutindu Yezu tubaka nde Yehowa kele Tata na beto, yo kele bonso yandi ke songa beto nde: “Yehowa kele Tata na mono mpamba ve; yandi kele mpi Tata na beno. Diaka, mono ke ndimisa beno nde yandi ke zolaka beno mingi mpi yandi ke tudilaka konso muntu na kati na beno dikebi.” Yo yina bantangu ya nkaka kana nge kele ti badute mpi nge ke yindula nde Yehowa ke zolaka nge ve, baka mwa ntangu mpi kudiyula nde: ‘Keti mono fwete kwikila ve bangogo ya Mwana yina ke zaba Tata mbote kuluta mpi yina ke tubaka ntangu yonso kieleka?’​—1 Pie. 2:22.

SALA YONSO SAMBU NA KULANDA KUNDIMA NDE YEHOWA KE ZOLAKA NGE

17. Sambu na nki beto fwete sala yonso sambu na kulanda kundima nde Yehowa ke zolaka beto?

¹⁷ Beto fwete sala yonso sambu na kulanda kundima nde Yehowa ke zolaka beto. Mutindu beto monaka yo, mbeni na beto Satana ke salaka yonso sambu na kupusa beto na kuyambula kusadila Yehowa. Yandi ke sosaka kulembisa beto, yo yina yandi ke landaka kusala yonso sambu na kundimisa beto nde Yehowa ke zolaka beto ve. Kansi beto fwete bika ve nde Satana kununga beto!​—Yobi 27:5.

18. Inki nge lenda sala sambu na kulanda kundima nde Yehowa ke zolaka nge?

¹⁸ Sambu na kulanda kundima nde Yehowa ke zolaka nge, landa kusamba yandi sambu yandi sadisa nge na kudimona mutindu yandi ke monaka nge. Yindula mingi baverse yina ke tubila mutindu Yehowa ke zolaka bansadi na yandi. Kuvila ve nde Yehowa ta yambula ve ata fioti kuzola bantu yina ke zolaka yandi. Yindula mingi bikuma yina fwete pusa nge na kutadila kimenga ya Yezu bonso dikabu yina Yehowa me pesaka nge. Ndima mambu yina Yezu tubaka sambu na kundimisa nge nde Yehowa kele Tata na nge ya zulu. Ebuna kana muntu mosi me yula nge nde: “Keti nge ke ndimaka kibeni nde Yehowa ke zolaka nge?” Nge ta vutula kukonda ntembe nde: “Ee, yandi ke zolaka mono! Diaka, konso kilumbu mono ke salaka yonso sambu na kumonisa yandi nde mono ke zolaka yandi!”