Yehowa Sadisaka Beto na Kuvanda na Kiese Konso Kisika Yina Beto Vandaka Kukwenda

Mpangi Kassholm ti nkento na yandi kele bantu ya Suède. Bo kotaka Nzo-Nkanda ya Gileade na 1979 mpi na nima bo tindaka bo na Iran, na Île Maurice, na Birmanie, na Tanzanie, na Ouganda mpi na Zaïre. Mpangi Jack Redford, longi mosi ya Gileade, pesaka bo ndongisila ya kundima bansoba mpi ya kuvanda na kiese konso kisika yina bo ke tinda bo. Ndongisila yina sadisaka bo ntangu yonso yina bo vandaka kutinda bo kisika ya nkaka. Beto wa mambu ya bo ke tuba.

Mats, songa beto mutindu nge zabaka kieleka.

Mats: Mono vandaka kuzinga na Pologne na Mvita ya Zole ya Ntoto ya Mvimba. Papa monaka mambu mingi ya mbi na dibundu ya Katolika. Yo yina yandi vandaka kutuba mbala na mbala nde: “Kieleka kele ve na dibundu yai.” Nsuka-nsuka, mono ndimaka nde mambu yina papa tubaka vandaka kieleka. Mono sumbaka mikanda mingi na bantu. Mukanda mosi vandaka ya bleu, yo vandaka ya kusonika La vérité qui conduit à la vie éternelle. Mono sepelaka mingi ti titre yango mpi mono tangaka yo yonso kaka na mpimpa yina. Na suka, mono bakisaka nde mono zwaka kieleka.

Banda na avril 1972, mono kumaka kutanga mikanda mingi ya Bambangi ya Yehowa mpi mono zwaka bamvutu na bangiufula na mono. Mono kudiwaka bonso muntu ya mumbongo yina Yezu tubilaka na mbandu yina yandi pesaka. Yezu tubilaka muntu yina zwaka diyaka ya valere mingi mpi yandi tekaka bima na yandi yonso sambu na kusumba yo. Mono salaka mpi mutindu mosi, disongidila mono yambulaka balukanu na mono ya kusala iniversite mpi ya kukuma munganga sambu na kieleka yina mono zwaka. (Mat. 13:45, 46) Na 10 décembre 1972, mono bakaka mbotika.

Na nima ya mvula mosi, bibuti mpi leki na mono ya bakala ndimaka kieleka mpi bo bakaka mbotika. Na juillet 1973, mono kumaka mupasudi-nzila ya ntangu yonso. Mpangi-nkento mosi ya kitoko mpi ya kimpeve vandaka na kati ya bapasudi-nzila ya kikesa ya dibundu na beto, zina na yandi Ann-Catrin. Beto zolanaka mpi na 1975, beto kwelanaka. Na nima, beto salaka bamvula iya na mbanza Strömsund na Suède, mbanza mosi ya kitoko yina bantu vandaka kundima nsangu ya mbote.

Ann-Catrin: Papa zabaka kieleka na bamvula na yandi ya nsuka na iniversite na mbanza Stockholm. Na ntangu yina, mono vandaka ti bangonda tatu kansi yandi vandaka kunata mono na balukutakanu mpi na kulonga nsangu ya mbote. Mama vandaka kusepela ve mpi yandi sosaka kumonisa nde Bambangi ya Yehowa ke longaka ve kieleka. Kansi yo simbaka ve, nsuka-nsuka yandi mpi bakaka mbotika. Ntangu mono lungisaka bamvula 13, mono bakaka mbotika mpi mono kumaka mupasudi-nzila ti bamvula 16. Mono salaka na mbanza Umeå, kisika mpusa ya bansamuni ya Kimfumu vandaka mingi. Na nima mono kumaka mupasudi-nzila ya nene.

Na nima ya makwela, beto sadisaka bantu mingi na kuzaba kieleka mpi yo vandaka kupesa beto kiese. Maivor, mwana-nkento mosi ya bamvula 10 ti ndambu vandaka na kati ya bantu yina. Yandi yambulaka kusala bansaka yina yandi vandaka kuzola mpi yandi kumaka mupasudi-nzila mpi nduku ya kisalu ya leki na mono ya nkento yina kumaka mpi mupasudi-nzila. Na 1984, bo kotaka Nzo-Nkanda ya Gileade mpi bo tindaka bo bamisionere na insi Équateur.

Inki sadisaka beno na kuyikama mpi na kulanda kuvanda na kiese konso kisika yina bo vandaka kutinda beno?

Mats: Bo vandaka kutinda beto mbala na mbala na bisika ya nkaka. Beto vandaka kuyikama na bisika yina sambu beto vandaka kulanda mbandu ya kudikulumusa ya Yezu. (Bakol. 2:6, 7) Mu mbandu, beto vandaka kuvingila ve nde bampangi kuyikama ti mutindu na beto ya kuzinga, kansi beto bantu vandaka kusala bikesa ya kuyikama ti mutindu na bo ya kuyindula mpi ya kuzinga. Kulanda mbandu ya Yezu sadisaka beto na kudiwa bonso banti yina bo “kunaka pene-pene ya bamasa” disongidila, beto vandaka na kiese na bisika yina bo vandaka kutinda beto.​—Nk. 1:2, 3.

Ann-Catrin: Sambu nti yina bo me kuna kuyela mbote, yo ke vandaka mpi mfunu nde ntangu kubula yo. Yehowa vandaka “ntangu” sambu na beto. (Nk. 84:11) Yandi vandaka kupesa beto nsemo, disongidila zola yina bampangi vandaka kumonisila beto. Mu mbandu, na dibundu mosi ya fioti na mbanza Téhéran, na Iran, bampangi yambaka beto mbote, yo vandaka bonso kikalulu ya kuyamba banzenza ya bantu ya ntangu ya ntama, yina Biblia ke tubilaka. Beto vandaka kuzola kuzinga mingi na Iran, kansi na juillet 1980, bamfumu ya leta buyisaka kisalu ya Bampangi ya Yehowa na Iran mpi bo lombaka beto na kukatuka na insi na bo na nima ya bilumbu zole. Na ntangu yina, dibundu ya Yehowa tindaka beto na Zaïre (ya bo ke binga bubu Congo-Kinshasa) na Afrique.

Ntangu bo songaka mono na mbala ya ntete nde bo me tinda beto na Afrique, mono dilaka. Sambu bansangu ya banioka mpi bamaladi yina mono ke waka na Afrique pesaka mono boma. Kansi banduku zole yina me sadilaka Yehowa bamvula mingi na Afrique songaka beto nde: “Beno me kwendaka ntete ve kuna. Beno ndima ntete kukwenda, beno ta sepela ti Afrique.” Bo tubaka masonga. Bampangi ya Afrique ke vandaka ti zola ya mingi mpi bo ke tudilaka bantu dikebi. Yo yina, na nima ya kulutisa bamvula 6 na Zaïre, ntangu yo lombaka nde beto katuka sambu leta buyisaka kisalu ya Bambangi ya Yehowa, mono sekaka sambu mono yibukaka nde mono sambaka nde, “Yehowa, mono ke bondila nge, sadisa beto na kubikala na Afrique.”

Inki me sepedisaka beno na bamvula yai yonso?

Mats: Na bisika mingi yina beto vandaka kukwenda, beto vandaka kusala kinduku ya mbote ti bamisionere yina katukaka na bansi mingi. Diaka, na bisika ya nkaka, beto vandaka na kiese mingi ya kulonguka Biblia ti bantu mingi, bantangu ya nkaka konso muntu na kati na beto vandaka kulonguka ti bantu kiteso ya 20. Mono ke landaka mpi kuyibuka zola mpi kikalulu ya kuyamba banzenza ya bampangi ya Afrique. Ntangu beto vandaka kutala mabundu na Tanzanie, kana beto me kanga kamio na beto yina beto vandaka kulala na kati, na lweka ya banzo ya bampangi, bo vandaka bansukami kansi bo vandaka kukabila beto bima mingi. (2 Bak. 8:3) Kima ya nkaka ya vandaka kusepedisa mono mingi, vandaka ntangu ya masolo. Beto vandaka kusolula konso nkokila, mono ti nkento na mono Ann-Catrin, beto vandaka kutubila mutindu kilumbu me luta mpi kupesa Yehowa mersi mutindu yandi ke sadisa beto.

Ann-Catrin: Kuvanda na dibuta ya bampangi ya ntoto ya mvimba ke pesaka mono kiese mingi. Beto me longukaka bandinga ya nkaka, mu mbandu Farsi, Kifalansa, Luganda mpi Kiswahili, ntangu beto vandaka kusosa kuyikama ti luzingu ya bantu ya bisika yina. Beto kumisaka bantu ya nkaka balongoki, beto zwaka banduku mpi beto salaka “dipeka na dipeka” ti bo na kisalu ya Yehowa.​—Sef. 3:9.

Beto me monaka mpi bima mingi ya kitoko yina Yehowa me salaka. Konso ntangu yina beto vandaka kukwenda na kisika ya mpa, yo vandaka bonso nde Yehowa kele na lweka na beto mpi yandi ke twadisa beto. Yandi me sadisaka beto na kuzaba mambu mingi yina beto zolaka ve kuzaba na luzingu na beto.

Inki bampasi beno kutanaka ti yo mpi nki sadisaka beno?

Mats: Na bamvula yina beto salaka na Afrique, beto belaka bamaladi mingi yina kele kuna, mu mbandu malaria. Bo salaka mpi nkento na mono Ann-Catrin, mwa ba-operasio. Beto vandaka mpi kudiyangisa sambu na bibuti na beto yina kumaka bambuta, yo yina beto ke pesaka bantu ya mabuta na beto mersi mingi mpila bo ke sadisaka bo mingi mpi bo me kumaka bonso minganga na bo. Bo ke sadisaka bo na ntima ya mvimba mpi ke salaka yo ti ntima-madidi, na kiese mpi na zola. (1 Tim. 5:4) Ata mpidina, bantangu ya nkaka beto vandaka kukuma mawa-mawa, beto vandaka kutuba nde kana beto vandaka kisika mosi ti bibuti, beto zolaka kusadisa bo mingi kuluta lusadisu yina beto ke pesaka bo na kintama.

Ann-Catrin: Na 1983, ntangu beto vandaka na Zaïre, mono belaka kolera. Munganga songaka Mats nde: “Beno kwenda ti yandi nswalu na insi ya nkaka kaka bubu yai.” Na kilumbu yina landaka, beto zwaka avion mosi yina ke nataka bima. Sambu avion ya nkaka vandaka ve, beto kotaka na kati mpi kwendaka na Suède.

Mats: Beto yindulaka nde kisalu na beto ya kimisionere me suka, beto dilaka mingi. Mambu salamaka ve mutindu doktere tubaka. Ann-Catrin belukaka mpi mvula mosi na nima, beto vutukaka na Zaïre, na dibundu mosi ya fioti ya Kiswahili na Lubumbashi.

Ann-Catrin: Na Lubumbashi, mono bakaka divumu kansi mono butaka mwana ya kufwa. Ata divumu yina kotaka na kidiba, lufwa ya mwana yina pesaka mono mpasi mingi. Na ntangu yina ya mpasi, Yehowa sadilaka beto mambu mingi ya kuyituka. Beto kumaka kulonguka ti bantu mingi kuluta. Na ntwala nde mvula mosi kulunga, dibundu yina vandaka ti bansamuni 35 kumaka ti bansamuni 70. Ntalu ya bantu na balukutakanu vandaka 40, kansi bo kumaka 220. Beto vandaka kulonga mingi mpenza nsangu ya mbote. Sambu Yehowa vandaka kusakumuna beto, yo pesaka mono kikesa mingi. Ata mpidina, beto vandaka kaka kutubila masolo ya bebe na beto yina fwaka. Beto ke vingilaka na kiese ntangu yina Yehowa ta belula kimakulu mpasi ya lufwa ya bebe na beto.

Mats: Na ntangu mosi, Ann-Catrin kumaka kudiyangisa mingi mpenza. Minganga tubaka nde mono kele ti kansere na musopo ya nene mpi yo lombaka nde bo sala mono operasio. Bubu sante na mono kele mbote, Ann-Catrin ke sadisaka mono mingi na kiteso ya ngolo na yandi.

Beto me bakisaka nde beto mpamba ve ke kutanaka ti bampasi. Na nima ya bitumba ya Rwanda ya 1994 yina bantu ya bikanda fwaka mingi, beto kwendaka kutala bampangi mingi na bisika yina bo ke tulaka bantu ya me tina bitumba. Beto monaka lukwikilu ya bampangi, kukanga-ntima na bo, kikalulu na bo ya kuyamba yina bo ke yambulaka ve. Yo longaka beto nde Yehowa kele ti ngolo ya kusadisa bansadi na yandi na kukanga ntima na konso mpasi yina.​—Nk. 55:22.

Ann-Catrin: Diambu ya nkaka ya mpasi salamaka ntangu beto kwendaka na nkinsi ya kukangula Betele ya Ouganda na 2007. Na nima ya nkinsi yango, beto salaka voyage ti bamisionere mpi bampangi ya dibuta ya Betele kiteso ya 25, beto vandaka kukwenda na mbanza Nairobi, na Kenya. Na ntwala ya kukuma na Kenya, kamio mosi ya nene kwisaka na diboko yina beto vandaka mpi ntu na yo tutanaka ti kamio yina beto vandaka na kati. Shofere ti bampangi tanu fwaka; na nima mpangi-nkento mosi yina bo nataka na opitale mpi fwaka. Beto ke vingila na kiese kumona diaka banduku na beto yina.​—Yobi 14:13-15.

Beto lwalaka, bo sansaka beto mpi nsuka-nsuka beto belukaka. Kansi mono ti Mats vandaka na kati ya bantu yina mabanza kumaka kuyangisa mingi na nima ya aksida yina. Na mpimpa yina kaka, mabanza kumaka bisaka-saka mpi ntima kumaka kubula ngolo. Mono kumaka kuzinga na boma ya mingi. Kansi bisambu mpi kutanga baverse yina ke pesaka beto kikesa, sadisaka beto mingi. Beto kwendaka mpi kubaka lusansu na bantu yina ke sansaka bantu yina ke niokwama na mabanza, yo sadisaka beto mpi mingi. Bubu yai, mabanza ke yangisaka beto diaka ve mingi, beto ke lombaka mpi Yehowa na kupesa beto kikesa ya kusadisa bampangi yina ke kutana ti mpasi bonso yina beto kutanaka ti yo.

Beno tubaka nde ntangu beno vandaka kukutana ti bampasi yai yonso, Yehowa nataka beno “bonso maki.” Yo ke tendula nki?

Mats: Bangogo yina kele kingana ya Kiswahili ya ke tuba nde “Tumebebwa kama mayai mabichi,” disongidila “bo nataka beto bonso maki.” Kaka mutindu bo ke nataka maki na lutaninu sambu yo pasuka ve, Yehowa sadisaka beto na bisika yonso yina bo vandaka kutinda beto. Beto kondaka kima ve, nkutu beto vandaka ti bima mingi kuluta. Zola ya mingi yina Nto-Kimvuka vandaka kumonisila beto monisaka nde Yehowa ke zolaka beto.

Ann-Catrin: Bika mono tubila kima mosi ya Yehowa sadilaka beto. Kilumbu mosi, bo songaka mono na telefone nde papa na Suède kele na opitale, yandi ke bela ngolo. Na ntangu yina bakala na mono Mats katukaka kubeluka na malaria. Beto vandaka ve ti mbongo ya kufuta avion sambu na kukwenda na Suède, yo yina beto bakaka lukanu ya kuteka kamio na beto. Ntangu fioti na nima, bampangi zole bingaka beto na telefone; ya ntete vandaka mpangi-bakala mosi ti nkento na yandi, bo waka nsangu ya mpasi yina beto vandaka na yo mpi ndimaka kufutila beto tike ya avion ya kukwenda. Ya zole vandaka mpangi-nkento mosi ya mbuta yina bumbaka mbongo na caisse mpi sonikaka na zulu na yo nde “sambu na muntu yina kele na mpasi.” Na nima ya ntangu fioti, Yehowa sadisaka beto na kuzwa mbongo ya me fwana.​—Baeb. 13:6.

Inki mambu beno me longukaka na bamvula 50 ya beno me sala na kisalu ya ntangu yonso?

Ann-Catrin: Mono me bakisaka nde beto ‘ta vanda ngolo kana beto bikala pima mpi beto tudila Yehowa ntima.’ Kana beto sala mpidina, yandi ta nwana sambu na beto. (Yez. 30:15; 2 Bans. 20:15, 17) Sambu beto salaka bikesa ya kusala mbote kisalu ya Yehowa na konso kisika yina bo vandaka kutinda beto, beto me bakaka mambote mingi yina beto zolaka ve kubaka kana beto ponaka kusala mambu ya nkaka.

Mats: Dilongi ya mfunu ya mono me longukaka kele nde kana beto ke tudila Yehowa ntima na konso mambu ya beto ke kutana ti yo, yandi ta sadisa beto. (Nk. 37:5) Yandi vandaka ntangu yonso kusadisa beto ntangu beto vandaka kutudila yandi ntima. Bubu yai beto kele na Betele ya Birmanie mpi beto ke landa kumona mutindu yandi ke sadisa beto.

Beto ke ndima nde baleke yonso yina ke zola kusadila Yehowa mingi, ta mona mpi mutindu Yehowa ta monisila bo zola kaka mutindu yandi monisilaka beto. Beto ke ndima nde kana bo ke bika nde Yehowa kusadila bo na konso mutindu yina, bo ta vanda na kiese mingi na konso kisika yina bo ta kwenda.