Inki Ntwadisi Nge Ta Pona? Inki Biblia Ke Tuba?

Ntama mingi ve na bamposo ya ke landa, bantu ta pona bamfumu na bo na bansi mingi na ntoto ya mvimba. Bantu ke bakaka balukanu ya mfunu na yina me tala bantwadisi yina bo ta pona.

Inki Biblia ke tuba?

Bantwadisi ya bantu ke vandaka ti bandilu

Biblia ke tubilaka bandilu yina bantwadisi yonso ya bantu ke vandaka ti yo.

• “Beno tula ve ntima na bamfumu to na mwana ya muntu, yina lenda gulusa ve. Mpeve na yandi ke basikaka, yandi ke vutukaka na ntoto; kaka na kilumbu yina mabanza na yandi ke vilaka.”—Nkunga 146:3, 4, noti na nsi ya lutiti.

Yo vanda bantwadisi ya me fwana kibeni, bo ke fwaka. Diaka, bo lenda sala ata kima mosi ve ya lenda sala nde bantu yina ta baka kisika na bo kulanda kusala mambu ya mbote yina bo vandaka kusala.—Longi 2:18, 19.

Diambu ya masonga kele nde, Biblia ke tubaka nde Nzambi me salaka ve bantu sambu bo kuditwadisa.

• “Muntu yina ke tambula kele ve ti kiyeka ya kutwadisa kitambi na yandi mosi.”—Yeremia 10:23.

Keti yo kele ti muntu yina lenda vanda ntwadisi ya mbote bubu yai?

Ntwadisi yina Nzambi me ndimaka

Biblia ke tuba nde Nzambi me ponaka ntwadisi mosi ya me fwana kibeni mpi ya bantu lenda tudila ntima. Ntwadisi yango kele Yezu Kristu. (Nkunga 2:6) Yezu kele Ntotila ya Kimfumu ya Nzambi. Kimfumu ya Nzambi kele luyalu yina ta yala bantu katuka na zulu.—Matayo 6:10.

Keti nge ta ndima lutwadisu ya Yezu? Biblia ke monisa sambu na nki ngiufula yai kele mfunu:

• “Beno pesa mwana lukumu, kana ve Nzambi ta wa makasi ebuna beno ta fwa ntama ti nzila, sambu makasi na yandi lenda mata nswalu. Kiese na bantu yonso yina ke tinaka na yandi.”—Nkunga 2:12.

Yai kele ntangu ya kubaka lukanu. Mambu yina Biblia me tubaka dezia na ntwala ke monisa nde Yezu yantikaka kuyala na 1914 mpi nde ntama mingi ve, Kimfumu ya Nzambi ta baka kisika ya baluyalu yonso ya bantu.—Daniele 2:44.

Sambu na kuzaba mambu mingi na yina me tala mutindu nge lenda pesa maboko na lutwadisu ya Yezu, tanga disolo “Pesa Maboko na Kimfumu ya Nzambi Bubu Yai!”