Bantu ya Politiki Ke Tuba nde Armagedoni Ta Salama Ntama Ve—Inki Biblia Ke Tuba?

Na Kintete 10 octobre 2022 na suka, Basoda ya Russie bulaka bamisile na insi Ukraine mpi yo salaka eksplozio mosi ya nene. Basoda ya Russie bulaka bamisile yai bilumbu zole na nima ya eksplozio mosi ya salamaka na pont mosi ya mfunu mingi ya ke vukisaka insi Russie ti insi Crimée. Mambu yai salamaka ntangu fioti na nima ya ntangu yina bantu ya nkaka ya Politiki tubaka nde Armagedoni lenda salama ntama mingi ve.

Prezida ya Étas-Unis Joe Biden tubaka na Kiya 6 octobre 2022 nde: “Beto me kumaka ntete ve pene-pene ya Armagedoni banda ntangu yina Kennedy vandaka [prezida ya Étas-Unis] mpi Mpasi ya Bamisile ya Cuba salamaka. . . . Mono ke yindula ve nde muntu lenda sadila munduki (arme nucléaire) kukonda nde diambu yai kunata Armagedoni.”
Ntangu bo yulaka prezida ya insi Ukraine Volodymyr Zelensky na BBC News na Mposo 8 octobre 2022 dibanza na yandi na yina me tala bampasi yina ta basika kana bo sadila minduki ya ngolo (armes nucléaires), yandi tubaka nde: “Mono ke ndima nde ntama mingi ve, Armagedoni ta salama mpi beto ta mona malanda na yo na ntoto ya mvimba.”

Keti kusadila minduki ya ngolo (armes nucléaires) lenda sala nde Armagedoni kusalama? Inki Biblia ke tuba?

**Keti minduki ya ngolo (armes nucléaires) ta sala nde Armagedoni kusalama?**

Ve. Ngogo “Armagedoni” ke vandaka kaka mbala mosi na Biblia na mukanda ya Kusonga 16:16. Ngogo yai ke tadilaka ve bitumba yina bansi ke nwana kansi yo ke tadilaka bitumba na kati ya nzambi ti “bantotila ya ntoto ya mvimba.” (Kusonga 16:14) Nzambi ta sadila Armagedoni sambu na kufwa luyalu ya bantu.—Daniele 2:44.

Sambu na kuzaba mambu mingi na yina me tala inki Armagedoni ta tendula sambu na ntoto, tanga disolo Bitumba ya Armagedoni Kele Nki?

**Keti ntoto ti bantu ya kele na kati ta fwa na bitumba yina bo ta sadila minduki ya ngolo (armes nucléaires)?**

Ve. Ata bantwadisi ya bantu lenda sadila minduki ya ngolo na bilumbu ke kwisa, Nzambi ta bika ve nde ntoto kufwa. Biblia ke tuba nde:

“Ntoto ke bikalaka kimakulu.”—Longi 1:4.
“Bantu ya lunungu ta baka ntoto, mpi bo ta zinga kimakulu na zulu na yo.”—Nkunga 37:29.

Kansi, mambu yina Biblia me tubaka dezia mpi mambu ya ke salama bubu yai ke monisa nde ntama mingi ve nsoba mosi ya nene ta salama na ntoto. (Matayo 24:3-7; 2 Timoteo 3:1-5) Sosa kuzaba mambu yina Biblia ke tubaka na yina me tala bilumbu ke kwisa na nzila ya kulonguka na beto ya Biblia ya ofele.