Yezu Ta Manisa Bitumba

Ntangu Yezu vandaka na ntoto, yandi monisaka nde yandi ke zolaka kibeni bantu. Yandi zolaka bantu mingi kibeni yo yina pesaka luzingu na yandi sambu na bo. (Matayo 20:28; Yoane 15:13) Ntama mingi ve, yandi ta monisa diaka nde yandi ke zolaka bantu ntangu yandi ta sadila kiyeka na yandi bonso Ntotila ya Kimfumu ya Nzambi sambu na ‘kumanisa bitumba na ntoto ya mvimba.’​—Nkunga 46:9.

Tala mutindu Biblia ke tubila mambu yina Yezu ta sala:

• “Yandi ta gulusa nsukami yina ke dila sambu na kulomba lusadisu, mpi muntu ya kukonda mfunu ti konso muntu yina me konda nsadisi. Yandi ta wila muntu ya kukonda mfunu mpi nsukami mawa, mpi yandi ta gulusa luzingu ya bansukami. Yandi ta gulusa bo na bampasi mpi na mubulu.”​—Nkunga 72:12-14.

Inki mutindu beto lenda pesa Yezu mersi sambu na mambu yonso yina yandi me salaka sambu na beto mpi sambu na mambu yina yandi ta sala ntama ve sambu na beto? Na kati ya mambu yina beto lenda sala, beto lenda tanga kusosa kuzaba mambu mingi na yina me tala “nsangu ya mbote ya Kimfumu ya Nzambi,” yo kele nsangu yina yandi vandaka kulonga. (Luka 4:43) Tanga disolo “Kimfumu ya Nzambi Kele Inki?”