Kuvanda Mukristu Ke Tendula Inki?​—Inki Biblia Ke Tuba?

Bubu yai, bantu mingi na nsi-ntoto ke tubaka ti lulendo yonso nde bo kele Bakristu. Kansi bikalulu na bo ke lwadisaka bantu ya nkaka. Bankaka na kati na bo ke sosaka kaka mambote na bo mosi, bo ke salaka mambu ti luvunu to bo ke vandaka nku. Bankaka ke kangamaka ve na bankwelani na bo. Mutindu bo ke zingaka mpidina ke pusaka bantu ya nkaka na kudiyula nde: ‘Kuvanda Mukritu Ke Tendula Kibeni Inki?’

Kuvanda Mukritu Ke Tendula Kibeni Inki?

Kutuba nde mono kele Mukristu ke vandaka ve mpasi. Kansi kutuba mutindu yina me fwana ve. Biblia ke tubaka nde Mukristu kele muntu yina kele longoki ya Yezu Kristu. (Bisalu 11:26) Yezu yandi mosi tubaka nde: “Kana beno bikala na ndinga na mono, beno kele kibeni balongoki na mono.” (Yoane 8:31) Ya kieleka, ata muntu mosi ve lenda sadila na mutindu ya kukuka mambu yina Yezu tubaka. Kansi muntu yina kele Mukristu ke salaka bikesa sambu na kulanda mambu yina Yezu longaka mpi kusadila yo na luzingu na yandi ya konso kilumbu. Beto tadila mwa bambandu.

Bakristu ke zolaka kibeni bantu

Mambu yina Yezu tubaka: “Mono ke pesa beno nsiku mosi ya mpa, nde beno zolana beno na beno; mutindu mono zolaka beno, beno mpi beno zolana beno na beno. Na diambu yai, bantu yonso ta zaba nde beno kele balongoki na mono​—kana beno ke zolana beno na beno.”​—Yoane 13:34, 35.

Mambu yina Yezu salaka: Yezu monisaka nde yandi ke zolaka bantu yonso, yo vanda bantu yango vandaka bansukami to ve mpi yo vanda bo vandaka bantu ya wapi. Yandi belulaka bambefo, yandi pesaka bantu yina vandaka nzala madia mpi nkutu yandi pesaka luzingu na yandi sambu na bantu.​—Matayo 14:14-21; 20:28.

Mutindu Bakristu fwete sala mambu: Bakristu ke kabaka, bo ke vandaka ve ti kikalulu ya kupona-pona mpi bo ke lolulaka, mpidina bo ke monisaka nde bo ke zolaka bantu. Bo ke sadisaka bantu yina kele ti mfunu ya lusadisu mpi bo ke vandaka ya kuyilama na kutula mambote ya bantu ya nkaka na kisika ya ntete.​—1 Yoane 3:16.

Bakritu ke salaka mambu na masonga

Mambu yina Yezu tubaka: “Mono kele . . . kieleka.”​—Yoane 14:6.

Mambu yina Yezu salaka: Yezu vandaka kusala mpi kutuba mambu yonso na masonga. Ntangu yandi vandaka awa na ntoto, yandi sadilaka ve bantu mambu ti luvunu mpi yandi tubaka ve mambu ya luvunu. Bantu zabaka nde yandi vandaka kusala mpi kutuba mambu na masonga yonso, yo vanda kusala mpidina vandaka kunatila yandi makambu.​—Matayo 22:16; 26:63-67.

Mutindu Bakristu fwete sala mambu: Bakristu ke kusaka ve. Bo ke futaka bampaku, bo ke yibaka ve mpi ke salaka bangunga yina yo ke lombaka nde bo sala na kisalu. (Baroma 13:5-7; Baefezo 4:28) Bo ke yibaka ve bantu ya nkaka, bo ke yibaka mpi ve na nzo-nkanda ntangu bo ke salaka bizama. Bo ke pesaka mpi ve bansangu ya luvunu ntangu bo ke fulusaka mikanda sambu na kusosa kisalu to mikanda ya nkaka.​—Baebreo 13:18.

Bakristu ke salaka mambu na ntima ya mbote

Mambu yina Yezu tubaka: “Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.”​—Matayo 11:28-30.

Mambu yina Yezu salaka: Bantu vandaka kusolula ti Yezu kukonda mpasi mpi yandi vandaka muntu ya mawete. Yandi vandaka kubaka na kiese yonso bana ya fioti. Yandi vandaka kupesa bantu yina vandaka kuniokwama kikesa mpi yandi vandaka kusadila bantu mambu ti luzitu.​—Marko 10:13-15; Luka 9:11.

Mutindu Bakristu fwete sala mambu: Bakristu ke tubaka ti mawete ntangu bo ke solulaka ti bantu ya nkaka. Bo ke kondaka ve bantu luzitu mpi bo ke tubaka ve mambu ya ke kondaka bantu luzitu. (Baefezo 4:29, 31, 32) Bakristu ke tudilaka bantu ya nkaka dikebi mpi bo ke sosaka mabaku ya kusadisa bo.​—Bagalatia 6:10.

Bakristu ke kangamaka kaka na bankwelani na bo

Mambu yina Yezu tubaka: “Bika nde muntu kukabula ve yina ya Nzambi me vukisaka.”​—Marko 10:9.

Mambu yina Yezu salaka: Yezu balaka ve. Ata mpidina, yandi siamisaka bankwelani na kukangama kaka na bankwelani na bo. (Matayo 19:9) Yandi songaka bo nde bo fwete keba na mambu yina lenda sala nde makwela na bo kufwa.​—Matayo 5:28.

Mutindu Bakristu fwete sala mambu: Bakristu ke salaka ve ata kima mosi ya lenda pesa makwela na bo nsoni. (Baebreo 13:4) Bakala ti nkento fwete sadilana mambu ti luzitu mpi zola.​—Baefezo 5:28, 33.