Sambu na Nki Bambangi ya Yehowa Ke Salaka Ve Bafeti ya Aniversere ya Lubutuku?
Bambangi ya Yehowa ke salaka ve ba-aniversere ya lubutuku sambu bo ke zabaka nde yo ke sepedisaka ve Nzambi. Biblia ke tubaka ve na pwelele yonso nde beto fwete sala ve ba-aniversere ya lubutuku, kansi yo ke sadisaka beto na kutadila mambu ya nkaka ya me tala ba-aniversere yango mpi kuzaba mutindu Nzambi ke tadilaka yo. Beto tadila mambu iya mpi mambu yina Biblia ke tubaka sambu na yo.
Ba-aniversere ya lubutuku me katukaka na bantu yina vandaka ve kusambila Nzambi. Mukanda mosi (Funk & Wagnalls Standard Dictionary of Folklore, Mythology, and Legend) ke tuba nde, bantu vandaka kusala bafeti ya aniversere ya lubutuku sambu bo vandaka kundima nde na kilumbu ya aniversere ya lubutuku ya muntu, “bampeve ya mbi lendaka kusala yandi mbi” mpi nde “kana banduku na yandi kele pana mpi bo me zodila yandi luzingu ya mbote, yandi ta vanda na lutaninu.” Mukanda ya nkaka (The Lore of Birthdays) ke tuba nde na ntangu ya ntama, kusonika bazina ya bantu yina me butuka na mukanda mosi “vandaka kusadisa mingi kibeni sambu na kuzaba, na nzila ya bambwete, mambu yina ta kumina yandi (horoscope), na nsadisa ya mayele ya mudidi ya astrolozi.” Mukanda yango ke tuba diaka nde, “bantu vandaka kuyindula nde babuzi yina bo ke sadilaka na aniversere ya lubutuku ya muntu ke vandaka ti kiyeka mosi mpidina ya mazi yina ke pesaka bantu bima yina bo ke zola.”
Kansi Biblia ke buyisaka beto na kusala mambu ya mazi, kutubila mambu yina me bumbanaka, bisalu ya bampeve ya mbi, to “konso kima ya mutindu yai.” (Kulonga 18:14; Bagalatia 5:19-21) Nkutu, na kati ya bikuma yina Nzambi pesilaka bantu ya mbanza Babilone ya ntama ndola beto lenda tubila kikalulu yina bo vandaka ti yo ya kusadila astrolozi, mayele ya mbi yina bantu vandaka kusadila sambu na kuzaba mambu yina me bumbanaka. (Yezaya 47:11-15) Bambangi ya Yehowa (Ba Témoins de Jéhovah) ke sosaka kaka ve kuzaba kisika yina mambu yonso yina bantu me yikamaka kusala me katukaka, kansi kana mambu yina Biblia ke tuba sambu na diambu mosi kele pwelele, bo ke tudilaka yo dikebi.
Bakristu ya ntete vandaka ve kusala ba-aniversere ya lubutuku. Mukanda mosi (The World Book Encyclopedia) ke tuba nde, Bakristu ya ntete “vandaka kutadila kuta nkinsi ya lubutuku ya konso muntu yina bonso kikalulu ya mimpani.” Biblia ke monisa nde bantumwa mpi bantu ya nkaka yina Yezu longaka me bikaka mbandu yina Bakristu yonso fwete landa.—2 Batesalonika 3:6.
Aniversere mosi mpamba yina Bakristu kele ti nswa ya kusala kele aniversere ya lufwa ya Yezu kansi ve aniversere ya lubutuku. (Luka 22:17-20) Yo kele ve diambu yina fwete yitukisa beto sambu Biblia ke tubaka nde, “kilumbu ya lufwa kele mbote kuluta kilumbu ya kubutuka.” (Longi 7:1) Tii na nsuka ya luzingu ya Yezu awa na ntoto, yandi kudisadilaka zina ya mbote na meso ya Nzambi, yo yina kilumbu yina yandi fwaka vandaka mfunu mingi kuluta.—Baebreo 1:4.
Ata kisika mosi ve Biblia me tubaka nde yo kele ti nsadi mosi ya Nzambi yina salaka aniversere ya lubutuku na yandi. Kana Biblia ke tubilaka yo ve, yo kele ve sambu bo vilaka kusonika yo, sambu Biblia me tubilaka ba-aniversere ya lubutuku ya bantu zole. Bantu yango vandaka ve kusambila Nzambi. Ata mpidina, Biblia ke tubilaka ve bafeti yango na mutindu ya mbote.—Kuyantika 40:20-22; Marko 6:21-29.
Keti bana ya Bambangi ya Yehowa ke monaka nde bo me konda kima mosi buna mutindu bo ke salaka ve ba-aniversere ya lubutuku?
Kaka bonso bibuti yonso ya mbote, Bambangi ya Yehowa ke zolaka bana na bo na bunda ya mvula ya mvimba. Bo ke pesaka bo bakado, bo ke sakanaka ti bo mpi bo ke sepelaka kulutisa ntangu ti banduku na bo. Bo ke landaka mbandu ya mbote ya Nzambi yina ke pesaka bana na yandi bima ya mbote. (Matayo 7:11) Bana ya Bambangi ya Yehowa ke monaka ve nde bo me konda kima mosi. Tala mambu yina bo ke tuba:
“Kiese ke vandaka mingi kibeni kana bo me kabila nge kima na ntangu yina nge vandaka ve kuvingila yo.”—Tammy, yandi kele ti bamvula 12.
“Bibuti na mono ke kabilaka mono ve bima na kilumbu yina mono butukaka, kansi bo ke salaka yo na bilumbu ya nkaka. Mono ke zolaka mpidina mpi yo ke sepedisaka mono mingi.”—Gregory, yandi kele ti bamvula 11.
“Kulutisa mwa minuta ti bantu ya nkaka, kudia mwa bagato mpi kuyimba mwa bankunga, yo yina nde kusala feti? Beno kwisa na nzo na beto sambu beno mona mutindu feti ke vandaka!”—Eric, yandi kele ti bamvula 6.