Keti Bambangi ya Yehowa Ke Kabisaka Mabuta to Bo Ke Sadisaka Yo na Kuvanda Ngolo?
Beto Bambangi ya Yehowa, beto ke salaka yonso sambu na kuvukisa mabuta na beto mpi ya bantu yina ke zingaka pene-pene ti beto. Beto ke zitisaka Nzambi yina salaka dibuta. (Kuyantika 2:21-24; Baefezo 3:14, 15) Biblia kele ti minsiku ya Nzambi yina me sadisaka bantu mingi na ntoto ya mvimba na kuvanda ti makwela mosi ya ngolo mpi ya kiese.
Mutindu Bambangi ya Yehowa Ke Sadisaka Mabuta na Kuvanda Ngolo
Beto ke salaka yonso na kulanda bandongisila ya Biblia sambu yo ke sadisaka beto na kukuma babakala ya mbote, bankento ya mbote mpi bibuti ya mbote. (Bingana 31:10-31; Baefezo 5:22–6:4; 1 Timoteo 5:8) Mayele ya Biblia ke sadisaka mpi bantu ya mabuta yina ke sambilaka ve na mabundu ya mutindu mosi na kuvanda na kiese. (1 Piere 3:1, 2) Beto tadila mambu yai ya bantu yina kele ve Bambangi ya Yehowa tubaka, bayina bankwelani na bo me kumaka bambangi ya Yehowa:
Clauir yina ke zingaka na Brésil ke tuba nde: “Ntangu beto kwelanaka ti Ivete, na bamvula sambanu ya ntete beto vandaka kuswana mpi kubendana mingi. Ntangu Ivete kumaka Mbangi ya Yehowa, yandi kumaka kuzola mono mingi mpi kumonisila mono ntima nda. Yandi sobaka bikalulu na yandi mpi yo taninaka makwela na beto.”
Agness yina ke zingaka na Zambie ke tuba nde: “Mono vandaka kukanga bakala na mono Chansa nzila ntangu yandi bandaka kulonguka Biblia ti Bambangi ya Yehowa sambu mono yindulaka nde bo ta kabisa dibuta na beto. Kansi banda na ntangu yina, mono me bakisaka nde Biblia me sadisaka mpenza makwela na beto.”
Na kisalu ya kusamuna, beto ke songaka bantu yina ke zingaka pene-pene ti beto mutindu kusadila mayele ya Biblia lenda sadisa bo na
Keti kusoba dibundu ya muntu lenda nata kukonda kuwakana na makwela?
Ya kieleka, bantangu ya nkaka yo lenda nata kukonda kuwakana. Mumbandu na 1998 rapore ya kompani mosi (rapport de l’institut de sondage Sofres) tubaka nde makwela mosi na kati ya bamakwela 20 kutanaka ti bampasi ntangu nkwelani mosi kumaka Mbangi ya Yehowa.
Yezu tubaka nde bantangu ya nkaka bantu yina ta landa malongi na yandi ta mona mpasi sambu bantu ya mabuta na bo ta telemina bo. (Matayo 10:32-36) Will Durant, nsoniki mosi ya mambu yina vandaka kusalama na ntangu ya ntama ke tuba nde na luyalu ya Roma, “bantu vandaka kutuba nde Dibundu ya Bukristu vandaka kukabisa mabuta” mpi Bambangi ya Yehowa ya nkaka ke kutanaka ti mambu ya mutindu mosi bubu yai. Keti yo ke tendula nde nkwelani yina kele Mbangi ya Yehowa muntu ke nataka mavwanga na dibuta?
Tribinale ya Ke Nwaninaka Banswa ya Bantu na Eropa
Ntangu bo fundaka Bambangi ya Yehowa nde bo ke kabisaka mabuta, Tribinale ya Ke Nwaninaka Banswa ya Bantu na Eropa (Cour européenne des droits de l’homme (CEDH)) tubaka nde mbala mingi bampangi ya dibuta yina kele ve Bambangi ya Yehowa ke nataka mavwanga sambu bo ke buyaka “kundima mpi kuzitisa kimpwanza yina bantu ya dibuta na bo ke vandaka ti yo ya kusambila na dibundu yina bo me zola.” Tribinale yina yikaka diaka nde “mambu yai ke salamaka na mabuta yonso yina ke sambilaka ve na dibundu mosi ata na Bambangi ya Yehowa mpi.” Ata ntangu bantu ke teleminaka dibundu ya Bambangi ya Yehowa, bo ke landaka ndongisila yai ya Biblia ya ke tuba nde: “Beno vutula mbi sambu na mbi ata na muntu mosi ve. . . . Kana mpila kele, beno sala yonso sambu na kuzinga na ngemba ti bantu yonso.”—Baroma 12:17, 18.
Sambu na Nki Bambangi ya Yehowa ke kwelanaka kaka bo na bo?
Bo ke landaka ndongisila ya Biblia ya kukwela “kaka na Mfumu,” disongidila kukwela muntu yina ke ndimaka mambu ya mutindu mosi ti bo. (1 Bakorinto 7:39) Ndongisila yai me katuka na Biblia mpi yo kele mfunu na kusadila yo. Mumbandu, na 2010, disolo ya zulunalu mosi (Journal of Marriage and Family) tubaka nde: “bankwelani yina kele na dibundu mosi, yina ke salaka mambu ya mutindu mosi mpi ke ndimaka na mambu ya mutindu mosi” ke vandaka mbala mingi ti kinduku mosi ya mbote.
Ata mpidina, Bambangi ya Yehowa ke lombaka ve bampangi na bo na kukabwana ti nkwelani yina kele ve Mbangi ya Yehowa. Biblia ke tuba nde: “Kana mpangi mosi kele ti nkento yina ke kwikilaka ve, mpi yandi ke zola kuzinga ti yandi, yandi bikisa ve nkento yina; mpi kana nkento mosi kele ti bakala yina ke kwikilaka ve, mpi yandi ke zola kuzinga ti yandi, yandi bikisa ve bakala na yandi.” (1 Bakorinto 7:12, 13.) Bambangi ya Yehowa ke zitisaka ndongisila yai.