“Mono Ke Salaka Yina Mono Lenda Sala”

Irma ke zingaka na Allemagne. Yandi kele ti bamvula kiteso ya 90. Na nima ya kusala ba-aksida ya ngolo mbala zole mpi na nima ya kusala yandi operasio mbala mingi, yandi ke kukaka diaka ve kukwenda kulonga nsangu ya mbote nzo na nzo mutindu yandi vandaka kusala yo na ntwala. Irma me kumaka kusonikila bantu ya dibuta mpi banduku na yandi mikanda sambu na kusonga bo mambu ya me tala lukwikilu na yandi. Bantu ke sepelaka ti mikanda na yandi sambu yo ke pesaka bo kikesa mpi ke monisaka nde yandi ke kabulaka mpasi ti bantu yina me bwila mpasi ya lufwa. Yo yina, bantu ke yulaka yandi nki ntangu yandi ta tindila bo mikanda ya nkaka. Bantu ke tindilaka yandi mpi mikanda mingi sambu na kupesa yandi mersi mpi kulomba yandi na kusonikila bo diaka. Irma ke tuba nde: “Mambu yai yonso ke pesaka mono kiese mpi ke sadisaka mono na kulanda kulonga nsangu ya mbote.”

Irma ke tindaka mpi mikanda na banzo yina bo ke sansaka minunu. Yandi ke tuba nde: “Nkento mosi ya me kuma mbuta bingaka mono sambu na kusonga mono nde mukanda yina mono sonikilaka yandi pesaka yandi kikesa mingi ntangu bakala na yandi fwaka. Yandi me tulaka yo na kati ya Biblia mpi yandi ke tangaka yo mbala na mbala na nkokila. Nkento ya nkaka yina bakala na yandi me katuka kufwa songaka mono nde mukanda na mono sadisaka yandi mingi kuluta malongi ya mumpe. Yandi vandaka kusosa bamvutu na bangiufula mingi mpi yandi yulaka mono kana yandi lenda kwisa kutala mono.”

Ntangu nkento mosi ya zabanaka ti yandi kwendaka kuzinga kisika ya nkaka, nkento yai lombaka Irma na kusonikila yandi. Irma ke tuba nde: “Nkento yina me bumbaka mikanda na mono yonso. Ntangu yandi fwaka, mwana na yandi ya nkento bingaka mono mpi yandi songaka mono nde yandi tangaka mikanda yonso yina mono sonikilaka mama na yandi mpi yandi lombaka mono na kusonikila yandi mpi mikanda yina ke tubilaka mambu ya Biblia.”

Irma ke zolaka kibeni kusadila metode yina ya kulonga. Yandi ke tuba nde: “Mono ke bondilaka Yehowa sambu yandi landa kupesa mono ngolo ya kusadila yandi. Ata mono lenda longa diaka ve nzo na nzo, mono ke salaka yonso yina mono lenda sala.”