Bingana 3:5, 6—“Kutula Ntima Ve na Mambu ya Nge Mosi Ke Yindulaka nde Nge Zaba”

“Tula ntima na nge ya mvimba na Yehowa, mpi kutula ve ntima na mayele na nge mosi ya kubakisa mambu. Na banzila na nge yonso, yindula yandi, ebuna yandi ta katula basakuba na banzila na nge.”—Bingana 3:5, 6, Mbalula ya Nsi-Ntoto ya Mpa.

“Tula ntima na nge yonso na MFUMU NZAMBI; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.”—Bingana 3:5, 6, Bible en Kituba.

Ntendula ya Bingana 3:5, 6

Beto fwete sosa lutwadisu ya Yehowaa Nzambi na kisika ya kubaka balukanu ya nene beto mosi.

“Tula ntima na nge ya mvimba na Yehowa.” Beto ke monisaka nde beto ke tulaka ntima na Yehowa kana beto ke sala mambu mutindu yandi ke zolaka. Beto fwete tula kibeni ntima na beto ya mvimba na Nzambi. Na Biblia, bo ke sadilaka ntima mbala mingi sambu na kutubila kimuntu na beto ya kati, disongidila mawi na beto, banzala na beto, bangindu na beto, mpi bikalulu na beto. Yo yina, kutula ntima ya mvimba na Nzambi ke suka ve kaka na mawi na beto. Yo ke lukanu ya beto ke bakaka sambu beto ke ndimaka kibeni nde Ngangi na beto me zaba mambu yina ke mfunu mingi sambu na beto.—Baroma 12:1.

“Kutula ve ntima na mayele na nge mosi ya kubakisa mambu.” Beto fwete tudila Nzambi ntima sambu beto fwete tula ve ntima na bangindu na beto ya kukonda kukuka. Kana beto ke tula ntima kaka na beto mosi to ke baka balukanu kaka na kulanda mawi na beto, ziku beto ta baka balukanu yina lenda monana ya mbote na luyantiku kansi nsuka-nsuka yo ta natila beto bampasi. (Bingana 14:12; Yeremia 17:9) Mayele ya Nzambi me luta kibeni mayele na beto. (Yezaya 55:8, 9) Kana bangindu ya Nzambi ke twadisa beto, beto ta nunga na luzingu.—Nkunga 1:1-3; Bingana 2:6-9; 16:20.

“Na banzila na nge yonso, yindula yandi.” Beto fwete zaba ngindu ya Nzambi na mambu yonso ya luzingu na beto mpi na konso lukanu ya mfunu ya beto ke baka. Beto ke salaka yo, kana beto ke samba yandi sambu yandi pesa beto lutwadisu mpi kana beto ke landa mambu yina yandi ke tuba na Ndinga na yandi, Biblia.—Nkunga 25:4; 2 Timoteo 3:16, 17.

“Yandi ta katula basakuba na banzila na nge.” Nzambi ke katulaka sakuba na Nzila na beto na mutindu yandi ke sadisaka beto na kuzinga na kuwakana ti minsiku na yandi ya mbote. (Bingana 11:5) Na mutindu yina, beto ke tinaka bampasi ya kukonda mfunu mpi ke vandaka ti luzingu ya kiese mingi.—Nkunga 19:7, 8; Yezaya 48:17, 18.

Mambu ya Bo Ke Tubila na Bingana 3:5, 6

Mukanda ya Bingana kele ti minsiku ya mfunu ya ke sadisaka sambu beto vanda ti luzingu ya kiese mpi beto nunga na meso ya Nzambi. Bakapu uvwa ya ntete kele bandongisila yina tata mosi ke pesa mwana yina yandi ke zolaka mingi. Kapu 3 ke tubila mambote yina bantu ya ke bakaka mayele ya Ngangi na beto na mbalu mpi ke sadilaka yo ke bakaka.—Bingana 3:13-26.