Kulolula Kele Mfunu

Piere me katuka kuwa ndongisila ya Yezu me pesa na mutindu ya kuyidika mambu ya mpasi yina lenda basika na kati ya bampangi, disongidila kulanda kitambi mosi-mosi. Kansi, Piere ke zola kuzaba mbala ikwa kibeni muntu fwete sala yo.

Piere me yula Yezu nde: “Mfumu, mbala ikwa mpangi na mono lenda sala disumu na ntwala na mono mpi mono fwete lolula yandi? Mbala nsambwadi?” Bamfumu ya nkaka ya mabundu vandaka kulonga nde muntu fwete lolula mpangi na yandi mbala tatu. Yo yina, Piere me mona nde kana yandi lolula mpangi na yandi “mbala nsambwadi,” yandi ta monisa nde yandi kele kibeni ntima-mbote.—Matayo 18:21.

Kansi, kutanga bambala yina muntu me sala beto mbi ke wakana ve ti malongi ya Yezu. Yo yina, yandi me sungika Piere nde: “Mono ke tubila nge nde, tii mbala nsambwadi ve, kansi tii mbala 77.” (Matayo 18:22) Na Kikongo ya nkaka, yo ke tendula nde kukonda nsuka. Kele ve ti nsuka na bambala yina Piere fwete lolula mpangi na yandi.

Yezu me pesa Piere ti bantumwa ya nkaka mbandu mosi sambu yo sadisa bo na kubakisa nde bo fwete lolula bantu ya nkaka. Yo kele mbandu ya mpika mosi yina me landa ve mbandu ya mfumu na yandi na yina me tala kuwila bankaka mawa. Ntotila ke zola nde bampika na yandi kufuta mbongo na yandi. Bo me natila yandi mpika mosi ya kele ti mfuka na yandi ya mingi ya batalanta 10 000 [badenari 60 000 000]. Yandi kele ve ata fioti na mpila ya kufuta yo. Yo yina, ntotila me lomba nde bo teka mpika yina, nkento na yandi mpi bana na yandi sambu bo futa mfuka yina. Ntangu mpika me wa mpidina, yandi me fukama na makulu ya mfumu na yandi mpi me bondila yandi nde: “Bikila mono ntangu, mpi mono ta futa mfuka na nge yonso.”—Matayo 18:26.

Ntotila me wila mpika yai mawa mpi me lomba yandi na kufuta diaka ve mfuka yina ya mingi. Ntangu ntotila me lolula yandi, mpika yai me kwenda mpi me kutana ti nduku na yandi ya mpika yina kele ti mfuka na yandi ya badenari 100. Mpika yai me simba nduku na yandi, me bweta yandi na nkingu mpi me songa yandi nde: “Futa mfuka na mono yonso.” Kansi, nduku na yandi ya mpika me fukama na makulu na yandi mpi me yantika kubondila yandi nde: “Bikila mono ntangu, mpi mono ta futa mfuka na nge.” (Matayo 18:28, 29) Kansi, mpika yina ntotila lolulaka mfuka me landa ve mbandu ya mfumu na yandi. Yandi me lomba nde bo tula nduku na yandi yina vandaka ti mfuka ya fioti na boloko tii ntangu yandi ta futa mfuka na yandi.

Na nima, Yezu me tuba nde ntangu banduku na yandi bampika me mona mutindu yandi me sadila nduku na yandi mambu kukonda mawa, bo me kwenda kutela mfumu na bo. Mfumu me wa makasi, me binga mpika yina mpi me songa yandi nde: “Mpika ya mbi, mono katulaka mfuka na nge yonso ntangu nge bondilaka mono. Keti yo lombaka ve nde nge mpi nge wila nduku na nge ya mpika mawa, mutindu mono wilaka nge mawa?” Ntotila yai ya me wa makasi me pesa mpika yina ya nku na maboko ya bantu ya ke kengilaka boloko tii ntangu yandi ta futa mfuka na yandi yonso. Na nsuka ya disolo, Yezu me tuba nde: “Tata na mono yina kele na zulu ta sadila beno mpi mambu mutindu mosi kana konso muntu na kati na beno ke lolula ve mpangi na yandi na ntima ya mvimba.”—Matayo 18:32-35.

Yai dilongi mosi ya mbote kibeni na yina me tala kulolula. Nzambi me lolulaka masumu na beto, yo kele mfuka mosi ya nene. Ata mpangi na beto me sala beto mbi ya nki mutindu, yo kele fioti kana beto fwanisa yo ti disumu yina Nzambi me lolulaka beto. Diaka, Yehowa ke lolulaka beto ve kaka mbala mosi, kansi mbala mingi. Keti beto fwete lolula ve bampangi na beto mbala mingi ata beto kele ti bikuma ya kubokuta? Yezu longaka na disolo na yandi na Zulu ya Ngumba nde Nzambi ta “lolula masumu na beto, mutindu beto mpi me lolulaka bantu yina me salaka beto mbi.”—Matayo 6:12.