DILONGI 22
Mutindu Nge Lenda Longa Nsangu ya Mbote
Mutindu nge ke landa kulonguka malongi ya Biblia, nge lenda tuba nde: ‘Bantu yonso fwete zaba mambu yai!’ Ya kieleka, yo kele mfunu nde bantu yonso kuzaba yo! Kansi mbala ya nkaka nge ke wa mwa boma ya kusonga bantu ya nkaka mambu ya nge ke longuka. Beto tala mutindu nge lenda katula boma mpi kukuma kulonga na kiese yonso nsangu ya mbote ya Biblia.
1. Inki mutindu nge lenda songa bantu ya nge me zaba mambu ya nge ke longuka?
Balongoki ya Yezu tubaka nde: “Beto lenda bika ve kutubila mambu yina beto monaka mpi beto waka.” (Bisalu 4:20) Bo vandaka kuzola malongi ya Biblia mingi, yo yina bo vandaka kuzola kusonga yo na bantu yonso. Keti nge ke kudiwaka mpi mutindu yai? Kana mpidina, sala yonso sambu na kusonga na luzitu yonso bantu ya dibuta na beno mpi banduku na nge, mambu ya nge ke longuka.—Tanga Bakolosai 4:6.
Mwa mambu ya nge lenda sala sambu na kuyantika
Ntangu nge ke solula ti muntu mosi ya dibuta na beno, tuba mambu yai sambu na kukotisa disolo mosi ya Biblia: “Mono longukaka kima mosi ya kitoko na mposo yai.”
Tangila nduku na nge mosi ya ke bela to ya ke kudiyangisa verse mosi ya ke pesa kikesa.
Kana banduku na nge ya kisalu kuyula nge mambu ya nge me sala na mposo mpi lumingu, nge lenda songa bo mambu ya nge longukaka na Biblia to na lukutakanu mosi ya dibundu.
Songa banduku na nge site Internet jw.org.
Bingisa bantu ya nkaka ntangu nge ke longuka Biblia to songa bo mutindu ya kulomba na jw.org nde muntu mosi kukwisa kulonguka ti bo Biblia.
2. Sambu na nki kulonga nsangu ya mbote ti dibundu kele kima ya mbote ya kusala?
Balongoki ya Yezu sukaka ve kaka na kulonga nsangu ya mbote na bantu yina bo zabaka. Yezu “tindaka bo zole-zole . . . na konso mbanza” sambu na kulonga nsangu ya mbote. (Luka 10:1) Mutindu bo salaka kisalu ya kulonga nsangu ya mbote na ndonga, yo salaka nde bantu mingi kibeni kuwa nsangu yango. Balongoki ya Yezu vandaka na kiese mingi ya kulonga ti bampangi na bo. (Luka 10:17) Keti nge mpi lenda baka lukanu ya kulonga nsangu ya mbote ti dibundu?
LONGUKA MAMBU MINGI
Beto tala mutindu nge lenda nunga na kukatula boma mpi mutindu kulonga bantu ya nkaka nsangu ya mbote lenda natila nge kiese.
3. Yehowa ta vanda ti nge
Bantu ya nkaka ke vandaka ti nzala ya kulonga nsangu ya mbote. Kansi bo ke waka boma kana bo me yindula mutindu bantu ta tadila bo mpi mutindu bo ta yamba bo.
Keti nge ke waka boma ya kusonga bantu ya nkaka mambu ya nge ke longuka? Kana mpidina to ve, sambu na nki?
Beno tala VIDEO mpi na nima beno pesa mvutu na ngiufula ya ke landa.
Inki sadisaka Bambangi ya Yehowa yai ya baleke na kukatula boma?
Beno tanga Yezaya 41:10 mpi na nima beno pesa mvutu na ngiufula yai:
Sambu na nki nge fwete samba kana nge ke wa boma ya kulonga nsangu ya mbote?
Keti nge zabaka yo?
Bambangi ya Yehowa mingi vandaka kuyindula ntete nde bo ta kuka ve ata fioti kulonga bantu ya nkaka nsangu ya mbote. Mu mbandu, mpangi Sergey vandaka kudimona kukonda mfunu mpi yandi vandaka kukuka ve kusolula ti bantu ya nkaka. Kansi na nima, yandi longukaka Biblia. Yandi ke tuba nde: “Ata mono vandaka kuwa boma, mono yantikaka kusonga bantu ya nkaka mambu yina mono vandaka kulonguka. Mono ke yitukaka na kumona mpila yo ke sadisaka mono na kudimona ve mpamba mpi yo ke kumisaka lukwikilu na mono ngolo.”
4. Vanda luzitu
Ntangu nge ke longa nsangu ya mbote, kutula ve dikebi kaka na mambu ya nge ke tuba kansi tula mpi dikebi na mutindu nge ke tuba yo. Beno tanga 2 Timoteo 2:24 mpi 1 Piere 3:15. Na nima beno pesa mvutu na bangiufula yai:
Inki mutindu nge lenda sadila baverse yai ntangu nge ke solula ti bantu ya nkaka mambu ya Biblia?
Bantu ya nkaka ya dibuta na beno mpi banduku na nge lenda ndima ve mambu yina nge ke songa bo. Inki nge lenda sala? Inki nge fwete sala ve?
Sambu na nki yo kele mbote na kuyula bangiufula na luzitu yonso na kisika ya kundimisa bantu na ngolo mambu ya nge ke songa bo?
5. Kulonga nsangu ya mbote ke pesaka kiese
Yehowa pesaka Yezu kisalu ya kulonga nsangu ya mbote. Inki mutindu Yezu vandaka kutadila kisalu yai? Beno tanga Yoane 4:34 mpi na nima beno pesa mvutu na bangiufula yai:
Kudia madia ya mbote ke sadisaka beto na kuzinga mpi yo ke pesaka beto kiese. Sambu na nki Yezu tubaka nde kusala luzolo ya Nzambi, mu mbandu kulonga bantu ya nkaka nsangu ya mbote kele bonso kudia madia?
Inki mambote kulonga nsangu ya mbote lenda natila nge?
Mambu ya nge lenda sala
Ntangu nge ta kwenda na lukutakanu mosi ya kati-kati ya mposo, tula dikebi na mutindu nge lenda yantika disolo ti muntu.
Sonikisa zina sambu nge yantika kusala masolo ya bana ya nzo-nkanda na balukutakanu ya kati-kati ya mposo. Yo ta sadisa nge na kudibongisa mpenza sambu na kusonga bantu ya nkaka mambu ya nge ke longuka.
Sadila kitini “Bantu ya Nkaka Ke Tubaka nde” to “Muntu ya Nkaka Lenda Yula Nge nde,” ya mukanda yai sambu na kuzaba mvutu ya kupesa na bangiufula yina bantu ke yulaka mingi mpi bantembe yina bo ke basisaka mingi.
MUNTU YA NKAKA LENDA YULA NGE NDE: “Inki nsangu?”
Inki mutindu nge lenda sadila dibaku yai sambu na kusonga muntu yango mambu ya nge ke longuka?
NA BUNKUFI
Kulonga bantu ya nkaka nsangu ya mbote ke pesaka kiese mpi yo lenda vanda diaka pete kuluta mpila nge vandaka kuyindula.
Inki Nge Me Simba?
Sambu na nki beto fwete longa bantu ya nkaka nsangu ya mbote?
Inki mutindu nge lenda sala yo na luzitu yonso?
Inki lenda sadisa nge na kukatula boma ya kulonga nsangu ya mbote?
TALA MPI
Tala mitindu iya ya pete ya kusadila karti ya jw.org sambu na kulonga nsangu ya mbote.
Tala bikalulu iya yina ta sadisa nge na kulonga nsangu ya mbote.
“Keti Nge Kele ya Kuyilama na Kukuma Mulobi-Bantu?” (Nzozulu ya Nkengi, Septembri 2020)
Tala mbandu mosi ya Biblia ya lenda sadisa nge na kulonga nsangu ya mbote ti kikesa ata nge kele leke.
Tala mutindu nge lenda songa bantu ya dibuta na beno yina me zaba ntete ve Yehowa mambu ya Biblia.