KAPU 48
Nge Lenda Zinga na Inza ya mpa ya Ngemba ya Nzambi
NZAMBI kutulaka Adami ti Eva na kilanga ya Edeni. Ata bo kolamaka mpi bo fwaka, Nzambi kusalaka yonso sambu bana na bo, ti beto mpi bubu yai, kuzinga mvula na mvula na Paladisu. Biblia kesila nde: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”—Nkunga 37:29.
Biblia ketubila “zulu ya mpa” ti “ntoto ya mpa.” (Yezaya 65:17; 2 Piere 3:13) Baguvernema ya bantu ya bubu yai kesala “zulu” ya ntangu na beto, kansi Yezu Kristu ti bayina tayala ti yandi na zulu tasala “zulu ya mpa.” Yo tavanda kyese mingi kibeni ntangu zulu yai ya mpa, yina kele guvernema ya lunungu ya Nzambi yina tanata ngemba, tayala ntoto ya mvimba!
Ebuna beto le tuba nki sambu na “ntoto ya mpa”?— Ntoto ya mpa tavanda bantu ya mbote yina kezolaka Yehowa. Nge fwe bakisa nde, ntangu Biblia ketubilaka “ntoto,” bantangu yankaka yo ketendulaka bantu yina kezingaka na ntoto, kansi ntoto ya kyeleka kaka ve. (Kuyantika 11:1; Nkunga 66:4; 96:1) Yo yina, bantu yina kesala ntoto ya mpa tazinga awa na ntoto yai.
Inza ya bubu yai ya bantu ya mbi tavanda dyaka ve. Kuvila ve nde, Mvula ya Ngolo ya bilumbu ya Noa kufwaka inza ya bantu ya mbi. Mpi mutindu beto melonguka, inza yai ya mbi tafwa na Armagedoni. Ntangu yai, beto tala mutindu luzingu tavanda na inza ya mpa ya Nzambi na nima ya Armagedoni.
Keti nge tazola kuzinga mvula na mvula na Paladisu ya Nzambi na inza ya mpa ya ngemba?— Ata munganga mosi ve le sala nde beto zinga mvula na mvula. Kele ve ti nkisi mosi ya le sala nde beto kufwa ve. Kima mosi kaka ya le sala nde beto zinga mvula na mvula kele kukwenda penepene ya Nzambi. Mpi Longi ya Nene kesonga beto mutindu ya kukwenda penepene na Nzambi.
Baka Biblia na nge mpi beto tanga na Yoane kapu 17, verse 3. Na verse yai beto kekuta bangogo yai ya Longi ya Nene: “Kana bo [longuka na kuzaba, NW] nge Nzambi mosi kaka ya kieleka, ti Yesu Kristo yina nge tindaka, yo ke songa nde bo ke na moyo ya mvula na mvula.”
Yezu kutubaka nde beto fwe sala nki sambu na kuzinga mvula na mvula?— Ntetentete, beto fwe longuka na kuzaba Tata na beto ya zulu, Yehowa, mpi Mwana na yandi, yina kupesaka luzingu na yandi sambu na beto. Yo kezola kutuba nde beto fwe longuka Biblia. Mukanda yai, Longuka na Longi ya Nene, kesadisa beto na kusala yo.
Kansi nki mutindu kulonguka mambu ya Yehowa tasadisa beto na kuzinga mvula na mvula?— Ee, kaka mutindu beto kevandaka na mfunu ya madya konso kilumbu, mutindu mosi mpi beto fwe longukaka mambu ya metala Yehowa konso kilumbu. Biblia ketuba nde: ‘Muntu kezingaka kaka ve na mampa, kansi na mambu yonso ya kebasikaka na munoko ya Yehowa.’—Matayo 4:4.
Beto fwe longuka mpi na kuzaba Yezu Kristu sambu Nzambi kutindaka Mwana na yandi na kukatula masumu na beto. Biblia ketuba nde: “Bantu lenda guluka kaka na yandi.” Biblia ketuba dyaka nde: “Konso muntu yina [kekwikila na Mwana, yandi tafwa ve, kansi yandi tavanda, NW] na moyo ya mvula na mvula.” (Bisalu 4:12; Yoane 3:36) ‘Kukwikila’ na Yezu ketendula inki?— Yo ketendula nde beto ketula mpenza ntima na Yezu mpi nde beto kezaba nde beto le zinga ve mvula na mvula kukonda yandi. Keti beto kekwikilaka na Yezu?— Kana beto kekwikilaka na Yezu, beto talanda kaka na kulonguka na Longi ya Nene konso kilumbu, mpi beto tasala mambu ya yandi ketuba.
Kutangaka mukanda yai mbala na mbala mpi kutalaka ti kuyindululaka na bifwanisu yonso kele mutindu mosi ya mbote ya kulonguka na Longi ya Nene. Meka kana nge le pesa bamvutu na bangyufula yina ke na bifwanisu yai. Dyaka, tanga mukanda yai ti mama to tata na nge. Kana nge kezingaka ve ti bibuti na nge, tanga yo ti bambuta mpi bana yankaka. Yo tavanda kyese mpenza kana nge le sadisa bankaka na kulonguka na Longi ya Nene mambu ya bo fwe sala sambu na kuzinga mvula na mvula na inza ya mpa ya Nzambi, mpidina ve?—
Biblia kezabisa beto nde: “Inza kele na kuluta.” (NW) Kansi na nima yo kesonga mambu ya beto le sala sambu na kuzinga mvula na mvula na inza ya mpa ya Nzambi. Yo ketuba nde: “Muntu yina ke salaka mambu yina ya Nzambi ke zolaka, yandi [tazinga] mvula na mvula.” (1 Yoane 2:17) Ebuna, inki mutindu beto le zinga mvula na mvula na inza ya mpa ya Nzambi?— Kana beto longuka na kuzaba Yehowa ti Mwana na yandi ya yandi kezolaka mingi, Yezu. Kansi beto fwe sadila mpi mambu ya beto kelonguka. Bika nde kulonguka na nge ya mukanda yai kusadisa nge na kusala mambu yai.
[Lupangu ya kele na lutiti 251]
Kana nge tanga Yezaya 11:6-9 mpi 65:25, nge talonguka mutindu bambisi kezinga na ngemba. Tala bifwanisu yai. Tala mwana-dimeme, mwana-nkombo, nkoi, ngombe, ntambu, mpi bana yina kele ti bo. Keti nge le pesa bazina ya bambisi yankaka yai kele awa yina Biblia ketubila?— Tala mwana-bakala yina ya fyoti kesakana ti kobra! Ata muntu mosi ve ya kezinga na inza ya mpa tavanda na boma. (Ozea 2:20) Nge keyindula nki sambu na mambu yai?—
[Lupangu ya kele na lutiti 252, 253]
Ntangu yai, tala ngemba yina kele na kati ya bantu ya mitindu yonso. Bo yonso kezolana bo na bo, mutindu Yezu kutubaka nde balongoki na yandi tazolanaka. (Yoane 13:34, 35) Bo ke na kubalula binwaninu ya bitumba sambu bo kubundudila yo ntoto. Biblia ketubila ngemba ti lutaninu ya mbote yina bantu tavanda na yo na inza ya mpa ya Nzambi. Beto le tanga mambu yango na baverse bonso Nkunga 72:7; Yezaya 2:4; 32:16-18; mpi Ezekiele 34:25.
Tala bantu na lutiti yai. Bo ke na kubongisa ntoto, bo ke na kusala nde yo vanda kisika mosi ya kitoko mpenza. Tala banzo ya kitoko ya bo ke na kutunga mpi bambuma ti bandunda yonso ya kitoko ya kifwanisu yai kesonga. Bantu kezinga na ngemba ti ntoto, ebuna ntoto mekuma paladisu bonso kilanga ya Edeni. Beto le tanga mambu yai ya kitoko na Nkunga 67:7; 72:16; Yezaya 25:6; 65:21-24; mpi Ezekiele 36:35.
[Lupangu ya kele na lutiti 254]
Mutindu nge kemona awa, bantu yonso ke na mavimpi ya mbote mpi bo ke na kyese. Bantu le pamuka na zulu kibeni bonso mbambi. Ata muntu mosi ve ke kikata, kele ti meso ya kufwa, to maladi. Mpi tala bantu yina metelama na lufwa! Biblia ketubila mambu yai na Yezaya 25:8; 33:24; 35:5, 6; Bisalu 24:15; mpi Kusonga 21:3, 4.