KAPU 39

Nzambi Meyibuka Mwana na Yandi

YEZU kudilaka ntangu nduku na yandi Lazare kufwaka. Keti nge keyindula nde Yehowa kuwaka mawa ntangu Yezu kumonaka mpasi mpi kufwaka?— Biblia ketuba nde Nzambi kewaka “mawa” mpi yandi kewaka nkutu “makasi” sambu na mambu yina kesalamaka.—Nkunga 78:40, 41; Yoane 11:35.

Keti nge le yindula mpasi yina Yehowa kuwaka na ntima ntangu yandi vandaka kumona lufwa ya Mwana na yandi ya yandi kezolaka mingi?— Yezu kuzabaka nde Nzambi tavila yandi ve. Yo yina yandi tubaka bangogo na yandi yai ya nsuka na ntwala nde yandi kufwa: “Tata, mono ke pesa [luzingu] na mono na maboko na nge.”—Luka 23:46.

Yezu kuzabaka nde yandi tafutumuka, nde Nzambi tabika yandi ve na mazyamu. Na nima ya lufutumuku ya Yezu, ntumwa Piere kuvutukilaka mambu yina bo sonikaka na Biblia sambu na Yezu nde: “Nzambi bikisaka yandi ve na nsi ya lufwa, yandi bikisaka mvumbi na yandi na kupola ve.” (Bisalu 2:31; Nkunga 16:10) Nitu ya Yezu kuzwaka ve ata fyoti ntangu ya kubeba na mazyamu, disongidila, yo polaka ve mpi yo basisaka ve nsudi ya mbi.

Ntangu Yezu kuvandaka na ntoto, yandi tubilaka nkutu balongoki na yandi nde yandi tafwa kansi yandi takinga ntangu mingi ve na lufwa. Yandi tendudilaka bo nde bantu ‘tafwa yandi. Ebuna na kilumbu ya tatu Nzambi ta tedimisa yandi na lufwa.’ (Luka 9:22) Ya kyeleka, balongoki zolaka kuyituka ve ntangu Yezu kufutumukaka. Kansi, keti bo kuyitukaka?— Beto tala.

Beto kele na Kitanu, penepene na ngunga ya tatu na nima ya midi, Longi ya Nene mefwa na zulu ya nti ya mpasi. Yozefi, yina kuvandaka mambre mosi ya Sanedreni mpi mvwama, vandaka kukwikila mpi na Yezu na kinsweki. Ntangu yandi waka nde Yezu mefwa, yandi kwendaka na Pilate, guvernere ya Roma. Yandi lombaka nswa ya kukatula nitu ya Yezu na nti sambu na kuzika yo. Na nima, Yozefi kunataka nitu ya Yezu na kilanga mosi kisika mazyamu kuvandaka. Mazyamu kele kisika ya bo kezikaka bamvumbi.

Na nima ya kutula nitu ya Yezu na mazyamu, bo mefika ditadi mosi ya nene na zulu ya mazyamu. Ebuna bo mekanga yo. Kilumbu ya tatu kulungaka na Lumingu. Ntangu kuvandaka yo mebasika ntete ve, mudidi kuvandaka kaka. Bantu kuvandaka pana sambu na kukengidila mazyamu. Mfumu ya banganga-Nzambi kutindaka bo na kukengidila yo. Keti nge kezaba sambu na inki?—

Banganga-Nzambi mpi kuwaka ntangu Yezu kutubaka nde yandi tafutumuka. Yo yina banganga-Nzambi kutulaka basoda na kukengidila mazyamu sambu balongoki ya Yezu kumona ve mpila ya kuyiba nitu na yandi na nima bo songa bantu nde yandi telamaka na lufwa. Na mbala mosi, ntoto yantikaka na kunikana. Nsemo mosi kubasikaka na kati ya mudidi. Wanzyo ya Yehowa kwisaka kubasika! Basoda kuwaka boma mingi mpenza na mpila nde bo kukaka ve kunikana. Wanzyo kukwendaka na mazyamu ebuna yandi katulaka ditadi yina. Mazyamu kubikalaka ya mpamba!

Ee, Ntumwa Piere kutubaka yo na nima nde: “Yesu yai . . ., Nzambi me tedimisaka yandi na lufwa.” (Bisalu 2:32) Nzambi kuvutulaka Yezu na luzingu ti nitu bonso yina ya yandi vandaka na yo na ntwala ya kukwisa na ntoto. Yandi futumukaka ti nitu ya kimpeve yina bawanzyo kevandaka na yo. (1 Piere 3:18) Yo yina, kana bantu kezola kumona Yezu, yo talomba nde yandi kulwata nitu ya kinsuni. Keti yandi salaka mutindu yina?— Beto tala.

Ntangu yai, mwini kuvandaka yo kebasika fyoti-fyoti. Basoda kutinaka dezia. Maria Magdala mpi bankento yankaka yina kuvandaka balongoki ya Yezu kukwendaka na mazyamu. Bo vandaka kutuba bo na bo nde: ‘Nani takatudila beto ditadi yina ya kilo?’ (Marko 16:3) Kansi ntangu bo kumaka na mazyamu, ditadi kuvandaka dezia ya kukatula. Ebuna mazyamu kuvandaka ya mpamba! Mvumbi ya Yezu kuvandaka dyaka ve! Na mbala mosi, Maria Magdala kwendaka ntinu sambu na kusosa bantumwa yankaka ya Yezu.

Bankento yina yankaka kubikalaka na mazyamu. Bo vandaka kudiyula nde: ‘Inki kisika nitu ya Yezu lenda vanda?’ Na mbala mosi, bantu zole ya kulwataka bilele ya kengenga kwisaka kubasika. Bantu yango kuvandaka bawanzyo! Bo songaka bankento yina nde: ‘Sambu na nki beno kesosa Yezu awa? Nzambi metedimisa yandi na lufwa. Beno kwenda nswalu kuzabisa balongoki na yandi.’ Ya kyeleka, bankento yango kukwendaka nswalu mpenza! Na nzila, bo kutanaka ti bakala mosi. Keti nge mezaba nani yandi yina?—

Muntu yango kuvandaka Yezu yina kulwataka nitu ya kinsuni! Yandi mpi kutubilaka bankento yina nde: ‘Beno kwenda kutubila balongoki na mono.’ Bankento yina kuvandaka na kyese mpenza. Bo kwendaka kumona balongoki mpi bo tubilaka bo nde: ‘Yezu kele na luzingu! Beto memona yandi!’ Maria kutubilaka dezia Piere ti Yoane nde mazyamu kuvandaka ya mpamba. Ebuna bo kwendaka kutala yo, mutindu nge kemona awa na kifwanisu. Bo ketala bilele yina bo lwatisaka Yezu, kansi bo kebakisa ve ata kima mosi. Bo kezola kundima nde Yezu kele dyaka na luzingu, kansi yo kemonana kima mosi ya kuyituka kibeni, na mpila nde bo kemona ve mpila ya kukwikila yo.

Na nkokila ya Lumingu yina, Yezu kumonanaka na balongoki na yandi zole yina vandaka kutambula sambu na kukwenda na bwala Emausi. Yezu kutambulaka ti bo mpi yandi vandaka kusolula ti bo, kansi bo vandaka kuzaba yandi dyaka ve sambu yandi vandaka ve ti nitu ya kinsuni bonso yina ya yandi vandaka na yo ntete. Bo kwisaka kuzaba yandi kaka na ntangu yandi salaka kisambu ti bo sambu na kudya. Balongoki kuwaka kyese mpenza mpi bo vutukaka nswalu na Yeruzalemi yina kuvandaka na kitamina ya bakilometre mingi ti kisika yina ya bo vandaka! Ziku yo vandaka ntangu fyoti na nima ya ntangu yina Yezu kumonanaka na Piere sambu na kusonga yandi nde Yandi kele na luzingu.

Ebuna na nima, na nkokila ya Lumingu yina, balongoki mingi kuvukanaka na kati ya suku mosi. Bakyelo kuvandaka ya kukangama. Na mbala mosi, Yezu kumonanaka na kati ya suku yina ti bo! Ntangu yai, bo bakisaka nde Longi ya Nene kele mpenza na luzingu. Yindula kyese ya bo vandaka na yo!—Matayo 28:1-15; Luka 24:1-49; Yoane 19:38–20:21.

Yezu kumonanaka ti nitu ya kinsuni ya kuswaswana na nsungi mosi ya bilumbu 40, sambu na kusonga balongoki na yandi nde yandi kele na luzingu. Na nima, yandi katukaka na ntoto mpi yandi vutukaka na Tata na yandi na zulu. (Bisalu 1:9-11) Ntama mingi ve, balongoki kuyantikaka na kuzabisa bantu yonso nde Nzambi kutedimisaka Yezu na lufwa. Ata na ntangu banganga-Nzambi vandaka kubula bo mpi kufwa bamingi na kati na bo, bo landaka kaka na kusonga bantu. Bo vandaka kuzaba nde kana bo fwa, Nzambi tayibuka bo kaka mutindu yandi yibukaka Mwana na yandi.

Balongoki ya Yezu yai ya ntete kuvandaka mpenza ya kuswaswana ti bantu mingi bubu yai! Ntangu beto kekumaka na nsungi ya mvula yina Yezu kufutumukaka, na bansi mingi bantu ya bubu yai keyindulaka kaka balapen ti maki ya Pake ya lufutumuku. Kansi Biblia ketubila ve ata dyambu mosi ya metala balapen ti maki ya Pake ya lufutumuku. Biblia ketubila kusadila Nzambi.

Beto le vanda bonso balongoki ya Yezu kana beto kezabisa bantu nde Nzambi mesalaka dyambu mosi ya kuyituka mpenza ntangu yandi futumunaka Mwana na yandi. Beto fwete vandaka ve na boma, ata bantu ketuba nde bo tafwa beto. Kana lufwa mekumina beto, Yehowa tayibuka beto mpi yandi tafutumuna beto, mutindu yandi futumunaka Yezu.

Keti beto kele ve na kyese na kuzaba nde Nzambi keyibukaka bayina kesadilaka yandi mpi nde yandi tafutumuna bo nkutu na lufwa?— Kuzaba mambu yai fwete pusa beto na kuzola kuzaba mutindu ya beto lenda sala sambu na kupesa Nzambi kyese. Keti nge mezabaka nde beto lenda pesa mpenza Nzambi kyese?— Beto tatubila dyambu yai na Kapu yai kelanda.

Lukwikilu na lufutumuku ya Yezu fwete kumisa kivuvu mpi lukwikilu na beto ngolo. Tanga Bisalu 2:22-36; 4:18-20; mpi 1 Korinto 15:3-8, 20-23.

[Kifwanisu ya kele na lutiti 202]

Sambu na nki mazyamu ke ya mpamba? Inki mambu mesalama?

[Kifwanisu ya kele na lutiti 205]

Mbala yankaka Piere ti Yoane ke na kuyindula inki?

[Kifwanisu ya kele na lutiti 206]

Na ntangu beto kekumaka na nsungi ya mvula yina Yezu kufutumukaka, bantu mingi keyindulaka inki? Kansi, nge keyindula inki?