Bika nde Luswaswanu Kusadisa Nge

Keti nge ke ndima ve nde Yezu vandaka Longi ya kuluta nene ya me zingaka na nsi-ntoto ya mvimba? Mbala ya nkaka, nge ke landaka mayele ya nkaka yina yandi vandaka kulongila, mu mbandu kusadila bangiufula mpi bambandu. Kansi, keti nge me zaba nde mbala mingi yandi vandaka kusadila luswaswanu na malongi na yandi?

Bantu mingi ke sadilaka luswaswanu ntangu bo ke tuba. Ziku nge mpi ke salaka yo, mbala mingi kukonda kuyindula. Muntu lenda tuba nde: “Bo tubaka nde bambuma yonso me tela; kansi yai kele ntete ya mubisu.” To, nde: “Yandi vandaka nsoni-nsoni ntangu yandi vandaka mwana-fioti, kansi ntangu yai yandi ke solulaka ti bantu kukonda mpasi.”

Sambu na kumonisa luswaswanu na mambu zole, nge fwete tuba ntete diambu to ngindu mosi mpi na nima kusadila ngogo bonso kansi, ata mpidina, to na ndambu ya nkaka sambu na kusala luswaswanu. To na ndambu ya nkaka nge lenda yika diambu mosi ya mpa to kubenda dikebi na diambu yina nge tubaka ntete. Kana nge ke tuba mutindu yina, nge ta tuba mambu pwelele mpi yo ta sadisa bankaka na kubakisa mambu ya nge ke tuba.

Ata bantu ke sadilaka ve luswaswanu na bandinga to na binkulu ya nkaka, yo ta vanda mbote na kubakisa mfunu na yo. Sambu na nki? Sambu Ndinga ya kupemama ya Nzambi ke sadilaka yo mingi. Mbala mingi, Yezu vandaka kusadila luswaswanu. Yibuka bangogo yai: “Bo ke pedisaka ve mwinda sambu na kutula yo na nsi ya kitunga ya kutesila bima, kansi bo ke tulaka yo na zulu ya kima ya kutudila mwinda.” “Mono kwisaka ve sambu na kufwa [Nsiku], kansi sambu na kulungisa yo.” “Beno waka nde bo tubaka: ‘Nge fwete sala ve bizumba.’ Kansi, mono ke tubila beno nde konso muntu yina ke landa na kutala nkento mosi . . . ” “Bo tubaka: ‘Disu na disu mpi dinu na dinu.’ Kansi, mono ke tubila beno nde: Beno nwana ve ti muntu yina kele muntu ya mbi, kansi konso muntu yina ke bula nge mbata na ditama ya kitata, pesa yandi mpi ditama yina ya nkaka.”—Mat. 5:15, 17, 27, 28, 38, 39.

Mikanda ya nkaka ya Biblia ke sadilaka mpi luswaswanu. Yo lenda sadisa nge na kubakisa ngindu to mutindu ya mbote ya kusala diambu mosi. Kana nge kele kibuti, tadila luswaswanu yai: “Beno batata, beno pesa ve bana na beno makasi, kansi beno landa na kusansa bo na malongi mpi na balukebisu ya Yehowa.” (Baef. 6:4) Kana ntumwa Polo sonikaka kaka nde tata (to mama) fwete sansa mwana na disipline ya Nzambi, yo zolaka kuvanda diambu ya kieleka mpi mayele. Kansi, beto ke bakisa dibanza yina pwelele na mutindu yo ke sala luswaswanu nde: ‘Beno pesa bo ve makasi, kansi beno landa na kusansa bo na malongi mpi na balukebisu ya Yehowa.’

Na nima kaka na kapu yina, Polo sonikaka nde: “Beto ke nwanaka ve ti menga mpi nsuni, kansi . . . ti bampeve ya mbi yina kele na bisika ya zulu.” (Baef. 6:12) Ntembe kele ve nde, luswaswanu yina ke sadisa nge na kubakisa nde nge fwete nwana mvita ya ngolo kibeni. Mpi nge ke nwana ve ti bantu; kansi ti bampeve ya mbi ya ngolo.

MAMBOTE YA LUSWASWANU

Kaka na mukanda ya Baefezo, nge ta mona baverse mingi yina Polo sadilaka luswaswanu. Kuyindulula baverse yai lenda sadisa beto na kuzaba dibanza ya Polo mpi kubakisa pwelele kibeni mambu yina beto fwete sala.

Kutadila lupangu yina kele ti mwa baluswaswanu ya kele na Baefezo kapu ya 4 mpi ya 5 ta sepedisa nge mpi ta sadisa nge. Ntangu nge ke tanga luswaswanu mosi mosi, yindulula luzingu na nge mosi. Kudiyula nde: ‘Na masonga yonso, inki kele nkadilu na mono? Mono ke salaka inki na diambu yai to ya me fwanana ti yo? Bantu ya nkaka ta tuba nde mono ke sadilaka inki diambu na mambu yai zole?’ Kana luswaswanu mosi ke sadisa nge na kubakisa nde kele ti diambu mosi yina nge fwete soba, sala bikesa sambu na kusoba yo. Bika nde luswaswanu kusadisa nge.

Beno lenda sadila lupangu yina na lusambu na beno ya dibuta. Ntete-ntete, bantu yonso ya dibuta lenda tanga baluswaswanu yina. Na nima, muntu mosi lenda tubila kitini ya ntete ya luswaswanu, mpi kupesa bankaka nzila ya kubasisa ngindu ya kele na kitini ya zole. Yo lenda pesa dibuta na beno dibaku ya kusolula mbote na mutindu beno lenda sadila mbote-mbote kitini ya zole ya luswaswanu. Ya kieleka, kutadila luswaswanu na mutindu yina lenda sadisa baleke mpi bambuta na kulanda kumonisa bikalulu ya Bukristu na kati ya dibuta mpi na bisika ya nkaka.

Keti nge lenda yibuka kitini ya zole ya luswaswanu?

Ntangu nge ta bakisa mfunu ya luswaswanu, nge ta kuma ti makuki mingi ya kumona yo mbala mosi na Biblia, mpi yo ta sadisa nge na kisalu ya kusamuna. Mu mbandu, nge lenda zabisa muwi mosi nde: “Bantu mingi ke tubaka nde muntu yonso ke vandaka ti moyo yina ke fwaka ve, kansi tala mambu yina Ndinga ya Nzambi ke tuba awa.” To, ntangu nge ke longuka Biblia ti muntu, nge lenda yula yandi nde: “Bantu mingi ya teritware na beto ke kwikilaka nde Nzambi ti Yezu kele muntu mosi; kansi, beto me mona nde Biblia ke tuba inki? Mpi inki kele dibanza na nge?”

Ya kieleka, Masonuku kele ti baluswaswanu mingi ya mfunu, yina lenda sadisa beto na kutambula na banzila ya Nzambi. Mpi beto lenda sadila luswaswanu sambu na kusadisa bankaka na kuzaba kieleka ya Biblia.

Mwa Baluswaswanu Yina Kele na Baefezo Kapu 4 mpi 5

Meka kusadila lupangu yai na lusambu na beno ya dibuta!

‘Beto fwete vanda diaka ve bantu yina bo ke nata ndambu na ndambu na nzila ya mayele ya mbi na kusadilaka bangindu ya luvunu.’—4:14.

“Kansi ntangu beto ke tuba kieleka, bika beto yela na zola na mambu yonso na kuwakana ti muntu yina kele ntu, disongidila Kristu.”—4:15.

“[Makanda] kele na mudidi na mabanza, . . . sambu na bantima na bo ya ngolo.”—4:18, 19.

“Kansi beno longukaka ve nde Kristu kele mutindu yai. Beno waka yandi mpi bo longaka beno na nzila na yandi.”—4:20, 21.

“Beno fwete katula kimuntu ya ntama, yina ke wakana ti bikalulu na beno ya ntama.”—4:22.

“Mpi beno fwete landa na kukuma ya mpa na ngolo yina ke twadisaka mabanza na beno, mpi beno fwete lwata kimuntu ya mpa.”—4:23, 24.

“Bika nde muyibi kuyiba diaka ve.”—4:28.

“Kansi bika nde yandi sala kisalu ya ngolo, yandi sala kisalu ya mbote na maboko na yandi.”—4:28.

“Bika nde ata ngogo mosi ve ya kupola kubasika na munoko na beno.”—4:29.

“Kansi kaka mambu yina kele mbote sambu na kutunga.”—4:29.

“Beno katula na kati na beno kimbeni ya ngolo ya mitindu yonso, makasi, nganzi, makelele, ti mafingu, mpi mambu yonso ya mbi.”—4:31.

“Kansi beno monisana ntima ya mbote, beno wilana mawa, beno lolulana na ntima ya mvimba.”—4:32.

“Bika nde bo tubila nkutu ve pite mpi mitindu yonso ya mambu ya mvindu to lukasi na kati na beno.”—5:3.

“Kansi kupesa matondo na Nzambi.”—5:4.

“Beno vandaka ntete na mudidi.”—5:8.

“Kansi ntangu yai beno kele na nsemo na kuwakana ti Mfumu.”—5:8

“Beno bika kuvukana na bisalu ya mudidi yina ke butaka ve mbuma.”—5:11.

“Kansi beno tungulula yo.”—5:11.

“Yo yina, beno keba mbote-mbote na mpila nde mutindu beno ke tambula kuvanda ve bonso bazoba.”—5:15.

“Kansi bonso bantu ya mayele, beno sadila ntangu na beno mbote kibeni.”—5:15, 16.

“Yo yina, beno bika kuvanda bazoba.”—5:17.

“Kansi beno landa na kubakisa kana luzolo ya Yehowa kele inki.”—5:17.

“Beno lauka ve vinu, sambu yo ke nataka na luzingu ya mansoni.”—5:18.

“Kansi beno landa na kufuluka ti mpeve.”—5:18.

“Sambu [Kristu] kumisa dibundu kitoko na meso na yandi, yo vanda kukonda ditono to kifu to konso kima ya mutindu yai.”—5:27.

“Kansi yo fwete vanda ya santu mpi ya kukonda mvindu.”—5:27.

“Ata muntu mosi ve ke mengaka nitu na yandi mosi.”—5:29.

“Kansi yandi ke disaka yo mpi ke kebaka yo, kaka mutindu Kristu ke salaka sambu na dibundu.”—5:29.

[Kifwanisu]