“Masonuku yonso kele ya kupemama na Nzambi mpi yo kele mfunu sambu na kulonga, sambu na kunganina, sambu na kuvutula mambu na ndonga, sambu na kupesa disipline na lunungu, na mpila nde muntu ya Nzambi lenda vanda ya kukuka mpenza, mpi ti mambu yonso sambu na konso kisalu ya mbote.”​—2 TIMOTEO 3:16, 17, NW.

YAI kele bangogo ya ngolo mpenza ya ntumwa Polo kusadilaka sambu na kutubila mbalu ya nene ya Biblia! Ya kyeleka, yandi vandaka kutubila ntetentete kitini ya Biblia yina yandi vandaka na yo na ntangu yina​—masonama yina bantu kebingaka bantangu yankaka nde Kuwakana ya Ntama. Kansi na kutuba ya mbote bangogo na yandi ketadila mpi mikanda 66 yonso ya Biblia, tanga mpi mikanda yina balongoki ya kwikama ya Yezu kusonikaka na mvu-nkama ya ntete T.B.

Keti nge kebakaka Biblia na valere mingi bonso Polo? Keti nge keyindula nde bansoniki ya Biblia kuvandaka mpenza ya kupemama na Nzambi? Bakristu ya mvu-nkama ya ntete vandaka kuyindula mutindu yai. Bakristu ya kyeleka kelandaka kukwikila na dyambu yina. Mu mbandu, mfumu ya dibundu John Wycliffe, muntu ya Angleterre ya mvu-nkama ya kumi na iya, kumonaka Biblia bonso “nsiku ya kyeleka ya kukonda kifu.” Ntangu yo ketubila bangogo ya Polo ya beto tubilaka na zulu, mukanda The New Bible Dictionary, ketuba nde sambu yo “pemamaka na [Nzambi], dyambu yina kendimisa bukyeleka ya mambu yonso yina Biblia ketuba.”

NTUMWA POLO zolaka kutuba mpenza inki ntangu yandi tubaka nde Biblia kele ya “kupemama na Nzambi”? (2 Timoteo 3:16, NW) Sambu Polo kusonikaka mambu yai na Kigreki, yandi sadilaka ngogo yina ketendula ntetentete “mefulumunama na Nzambi.” Na mutindu yina, Polo kutubaka nde na nsadisa ya mpeve santu na yandi, Nzambi kutwadisaka bansoniki ya Biblia na kusonika kaka mambu yina yandi vandaka kuzola nde bo sonika.