‘Sala Mambu Yonso Sambu na Nsangu ya Mbote’
1. Nsamuni ya Kimfumu kevandaka ti luzolo ya kusala nki sambu na bankaka, mpi sambu na nki?
1 Ntumwa Polo vandaka kundima nde yandi vandaka ti mukumba ya kuzabisa bantu nsangu ya mbote. (1 Kor. 9:16, 19, 23) Mutindu mosi, susi na beto sambu na mambote ya kimakulu ya bantu kepusaka beto na kusala kikesa mpenza sambu na kuzabisa bo nsangu ya mbote.
2. Ntangu beto kesamuna, beto kele ya kuyilama na kusala nki bansoba, mpi sambu na nki?
2 Samuna na Kisika mpi na Ntangu Yina Nge Lenda Kuta Bantu: Mulobi ya mbote kelosaka ndobo to bukondi na yandi na kisika mpi na ntangu yina yandi lenda kanga bambisi mingi, kansi ve na kisika mpi na ntangu yina yandi mezola. Sambu beto mpi ‘kelobaka bantu,’ beto lenda vanda na mfunu ya kusala mwa bansoba sambu na kukuta bantu ya teritware na beto mpi kubaka kyese mingi na dibaku ya mbote ya kuvukisa “bambisi ya mutindu na mutindu.” (Mat. 4:19; 13:47) Keti beto lenda samuna na nkokila sambu na kukuta bantu na banzo na bo to na menemene sambu na kuta kimbangi na balabala? Lukanu ya Polo kuvandaka ya “kulonga nsangu ya mbote,” mpi yandi sadilaka mabaku ya mbote yina yandi kutanaka ti yo sambu na kulonga.—Bis. 17:17; 20:20, 24.
3, 4. Inki mitindu beto lenda wakanisa bangindu na beto na ntangu beto kele na kisalu ya kusamuna, mpi nki mbuma yo tabuta?
3 Wakanisa Bangogo na Nge ya Kukotila na Masolo Sambu na Kulungisa Mpusa: Mbala mingi, balobi kesobaka mitindu na bo ya kuloba sambu na kukanga mbisi ya mutindu mosi buna. Inki mutindu beto lenda zabisa nsangu ya mbote ya Kimfumu na mutindu yina tasepedisa bantu na teritware na beto? Beto fwete tubila na mayele yonso disolo mosi ya keyangisa bantu mpi na nima kuwidikila na dikebi yonso mambu ya bo ketuba sambu na dyambu yango. (Yak. 1:19) Beto lenda yula bo ngyufula mosi ya kelomba nde bo pesa ngindu na bo sambu na kupusa bo na kusolula. (Bing. 20:5) Na kusalaka mpidina, beto takuka kuzabisa nsangu ya mbote na mutindu yina tavanda ti bupusi na luzingu na bo. Polo kukumaka bima yonso sambu na “bantu” ya mitindu yonso. (1 Kor. 9:22) Kusoba bametode kele mfunu sambu na kusimba ntima ya bantu.
4 Kuzabisa bantu “nsangu ya mbote” ya kima mosi ya kuluta mbote kele kyese ya nene mpenza! (Yez. 52:7) Bika nde beto ‘sala mambu yonso sambu na nsangu ya mbote’ na mpila nde beto solula ti bantu mingi mpenza.—1 Kor. 9:23.