Pesa Bangindu ya Mbote ya Kendimisa

NTANGU nge ketuba dyambu mosi, bawi na nge kele ti kikuma ya mbote ya kuyula nde: “Sambu na nki dyambu yai kele ya kyeleka? Inki kima kemonisa nde beto fwete ndima mambu ya mutubi ketuba?” Sambu nge kele longi, nge fwete pesa bamvutu na bangyufula ya mutindu yai to nge fwete sadisa bawi na nge na kuzwa bamvutu. Kana dyambu yango kele mfunu mingi, nge fwete pesa bawi na nge bikuma ya mbote sambu bo ndima yo. Kusala mutindu yai tasadisa bawi na kundima disolo na nge kukonda mpasi.

Ntumwa Polo kusadilaka mpi bangindu ya kundimisa. Sambu na kusadisa bawi na yandi na kusoba mabanza na bo, Polo vandaka kusadila bangindu yina vandaka kundimisa, yina vandaka na ndonga, mpi yina vandaka kusyamisa. Yandi mebikilaka beto mbandu mosi ya mbote. (Bis. 18:4; 19:8) Ya kyeleka, mitubi mingi ya mayele ya mbi kesadilaka bangindu ya kundimisa sambu na kukusa bantu. (Mat. 27:20; Bis. 14:19; Kol. 2:4) Bo lenda yantika ti dyambu mosi ya luvunu, ya bo mebaka na banto ya bantu lenda tudila ve ntima, kupesa banzikisa ya zulu-zulu, kubuya kutubila mambu ya kyeleka yina kemonisa nde mambu yina kele ya luvunu, to kusadila bangogo yina kesimba mawi kansi ya kenata ve bantu na kuyindula. Beto fwete sadila ve bametode ya mutindu yai.

Bangindu Yina Mekatuka na Ndinga ya Nzambi. Mambu ya beto kelonga fwete katuka ve na bangindu na beto mosi. Beto kesalaka ngolo na kuzabisa bantu yankaka mambu yina beto melongukaka na Biblia. Mikanda ya kimvuka ya mpika ya kwikama mpi ya mayele kesadisaka beto mingi na kisalu yai ya kulonga. Mikanda yango kesyamisaka beto na kutadila Masonuku na dikebi yonso. Yo yina, beto kebendaka dikebi ya bantu yankaka na Biblia, sambu na kudinungisa ve, kansi na kudikulumusa yonso, beto kevandaka na mpusa ya kusadisa bo na kumona bo mosi mambu yina Biblia ketuba. Beto kendimaka mambu yina Yezu Kristu kutubaka na kisambu ya yandi salaka na Tata na yandi nde: “Ndinga na nge kele ya kyeleka.” (Yoa. 17:17, NW ) Ata muntu mosi ve kele ti kiyeka ya kuluta Yehowa Nzambi, Ngangi ya zulu ti ntoto. Bangindu na beto tandimisa bantu kana yo kekatuka na Ndinga na yandi.

Bantangu yankaka nge lenda kutana ti bantu yina mezaba ve Biblia to yina kendimaka ve nde yo kele Ndinga ya Nzambi. Nge fwete sadila mayele sambu na kuzaba nki ntangu mpi nki mutindu nge lenda kotisa baverse ya Biblia na disolo na nge. Kansi, kana mpila kele nge fwete sala ngolo sambu na kubenda dikebi na bo na Biblia, kisika mambu ya nge kezabisa bo mekatuka.

Keti yo kezola kutuba nde kutanga verse mosi mefwana sambu muntu kundima ngindu ya nge ketuba? Ve. Mbala yankaka yo talomba nde nge benda dikebi na yandi na mambu yina baverse yina kele na ntwala mpi na nima ya verse yango ketubila sambu na kumonisa nde yo kewakana mpenza ti mambu ya nge ketuba. Kana nge metanga verse mosi sambu na kubasisa kaka munsiku mosi mpi nde mambu ya yo ketubila kewakana ve ti disolo ya beno ketubila, yo talomba nde nge pesa bangindu yankaka sambu na kundimisa bantu. Mbala yankaka yo lenda lomba nde nge sadila baverse yankaka yina ketubila dyambu yango sambu na kumonisa mpenza na bawi na nge nde mambu ya nge ketuba mekatuka na Biblia.

Kuyika ve mambu yankaka na mambu yina verse ketuba ya kendimisa. Tanga yo na dikebi yonso. Mbala yankaka verse yango ketubila disolo ya mvimba ya nge ketubila. Kansi, sambu bawi kundima bangindu na nge, bo fwete mona dyambu ya nge ketubila na kati ya verse yango.

Pesa Bangindu Yankaka Sambu na Kundimisa. Bantangu yankaka, sambu na kumonisa nde mambu yina Masonuku ketuba kele ya kyeleka, yo lenda vanda mbote na kutubila mambu yina mekatuka na mukanda mosi yina bantu mingi kendimaka.

Mu mbandu, nge lenda tubila bigangwa yina kemonanaka sambu na kupesa nzikisa ya kendimisa nde Ngangi kele. Nge lenda benda dikebi na bansiku yina beto kemonaka na bima ya Nzambi mesalaka, mu mbandu nsiku yina kesalaka nde ntoto kubenda bima yonso na zulu na yo, mpi kuyindula ti yandi sambu na kumonisa yandi nde sambu bansiku ya mutindu yina kele, yo ketendula mpi nde kele ti Muntu mosi yina kupesaka bansiku yango. Bangindu na nge yai ya ndonga tavanda ya kyeleka kana yo kewakana ti mambu yina Ndinga ya Nzambi ketuba. (Yobi 38:31-33; Nk. 19:2; 104:24; Roma 1:20) Banzikisa ya mutindu yai kesadisaka mpenza sambu yo kemonisaka pwelele nde mambu yina Biblia ketubaka kewakana ti bakyeleka yina kemonanaka na meso.

Keti nge kesala kikesa na kusadisa muntu mosi sambu yandi bakisa nde Biblia kele mpenza Ndinga ya Nzambi? Nge lenda tubila bantu ya mayele yina kundimaka nde Biblia kele Ndinga ya Nzambi, kansi keti yo mefwana? Kutubila mambu ya mutindu yai kesadisaka kaka bantu yina kezitisaka bantu yina ya mayele. Keti nge lenda sadila mambu yina siansi ketubaka sambu na kundimisa nde Biblia ketubaka mambu ya kyeleka? Kana nge sadila kaka bangindu ya bantu ya siansi ya kukonda kukuka sambu na kundimisa bangindu na nge, zaba nde nge ketunga na zulu ya fondasio mosi ya kukonda ngolo. Kansi, kana nge meyantika na Ndinga ya Nzambi mpi na nima nge tubila mambu yina siansi mesengumunaka sambu na kumonisa nde Biblia ketubaka mambu ya sikisiki, bangindu na nge tavanda na zulu ya fondasio mosi ya ngolo.

Yo vanda nge kesala kikesa nki mutindu sambu na kumonisa nde Biblia kele Ndinga ya Nzambi, nge fwete pesa banzikisa ya kufwana. Kiteso ya banzikisa ya nge tapesa ketadila bawi na nge. Mu mbandu, kana nge ketubila bilumbu ya nsuka mutindu yo kele na 2 Timoteo 3:1-5, nge lenda benda dikebi ya bawi na nge na nsangu mosi ya bantu mezaba mbote yina kemonisa nde bantu ‘kele nku mingi.’ Mbandu mosi yina lenda fwana sambu na kumonisa nde kidimbu yai ya bilumbu ya nsuka ke na kulungana bubu yai.

Kufwanisa bima zole yina kele ti bima mingi ya mefwanana lenda sadisa nge. Kufwanisa ya mutindu yai yo mosi lenda ndimisa ve dyambu mosi. Sambu valere na yo kumonana, yo kelomba kufwanisa yo ti mambu yina Biblia ketuba. Kansi kufwanisa bima zole lenda sadisa muntu na kubakisa bukyeleka ya dyambu mosi. Mu mbandu, nge lenda sadila kufwanisa ya mutindu yina ntangu nge ketendula nde Kimfumu ya Nzambi kele luyalu mosi. Nge lenda monisa nde, bonso baluyalu ya bantu, Kimfumu ya Nzambi mpi kele ti bamfumu, bantu yina yo tayala, bansiku, ngidika sambu na kusambisa, mpi programe ya kulonga.

Mbala mingi nge lenda sadila mambu ya kyeleka yina ke na kusalama sambu na kumonisa nde yo kele mayele na kusadila bandongisila ya Biblia. Nge lenda sadila mpi mambu yina nge mosi kutanaka na yo sambu na kusadisa bantu na kundima bangindu ya nge ketubila. Mu mbandu, ntangu nge kemonisa muntu mosi mfunu ya kutanga mpi kulonguka Biblia, nge lenda tendula nki mutindu kusala mutindu yina metomisaka luzingu na nge. Sambu na kusyamisa bampangi na yandi, ntumwa Piere kutubilaka kubaluka ya Yezu, yina yandi mosi kumonaka na meso. (2 Pie. 1:16-18) Polo mpi kutubilaka mambu yina yandi kutanaka na yo na luzingu na yandi mosi. (2 Kor. 1:8-10; 12:7-9) Ya kyeleka, nge fwete sadila ve mingi eksperiansi na nge mosi na mpila nde nge benda ve dikebi mingi na kimuntu na nge mosi.

Sambu bisika ya bantu kuyelaka mpi mabanza na bo kele ya kuswaswana, banzikisa yina kendimisa muntu mosi lenda kuka ve na kundimisa muntu yankaka. Yo yina, tadila mabanza ya bawi na nge ntangu nge kepona bangindu ya nge tasadila mpi mutindu nge tamonisa yo. Bingana 16:23 ketuba nde: “Na kutuba mambu, muntu ya mayele ke yindulaka ntete; mpidina kana yandi tuba, bantu ta wila yandi mbote.”