Sosa Bantu Yina Kele ya Kuyilama

1. Inki mutindu beto kemonisaka ntonda na dibaku ya mbote ya kusala kisalu ya kusamuna?

¹ Na nsungi ya kisalu ya Yezu, yandi salaka kikesa ya ngolo sambu na kuzabisa bantu ya kudikulumusa nsangu ya mbote ya kepesaka kikesa. (Yez. 61:​1, 2) Sambu beto ketubaka mambu na zina ya Kristu mpi kele binati-nsangu na yandi, bubu yai beto kele ti dibaku ya mbote ya kulanda mbandu na yandi na kuvandaka kikesa mpi na kusosaka kukonda kulemba mpi na dikebi yonso bantu yina kele ya kuyilama na teritware na beto.​—⁠Mat. 10:11; 2 Kor. 5:⁠20.

2. Inki mutindu Polo kusobaka bametode, mpi inki bambuma yo butaka?

² Soba Bametode: Ntumwa Polo vandaka ti kikalulu ya kukwenda ntete-ntete na nzo ya bisambu ya Bayuda sambu na kulonga Bayuda mpi baprozelite. (Bis. 14:⁠1) Na Filipi, Polo mpi Silasi kwendaka kusosa bantu na kisika yina bo yindulaka nde yo kele “kisika ya Bayuda ke sambilaka.” Bo yantikaka kuta kimbangi na kibuka mosi ya bankento, mpi mosi na kati na bo, Lidia, kundimaka kyeleka kukonda kusukinina.​—⁠Bis. 16:​12-15.

3. Katula kusamuna nzo na nzo na teritware na beto nki mabaku yankaka ya kusamuna beto kele na yo?

³ Katula kusamuna nzo na nzo na teritware na nge, keti nge lenda samuna mpi na bisika yina bo kevingilaka metro, na baparke, na bisika ya kisalu, na babalabala yina mekutanaka mpi ya bakaminio mpi bantu kelutaka mingi, mpi na bisika ya mumbongo na teritware na nge? Mbala yankaka nge lenda sonika mikanda to kusadila telefone sambu na kuta kimbangi na bakartie yina balupangu kevandaka ti bakyelo ya kutanina mbotembote. Kana nge mezaba kutala mbote-mbote mpi kusoba bametode na kutadila bampusa ya bantu ya teritware na nge, yo tasadisa nge na “kudipesa ntangu yonso na kisalu ya [Yehowa].”​—⁠1 Kor. 15:⁠58.

4. Inki mabaku yankaka beto kele na yo kana teritware ya dibundu na beto kele fyoti?

⁴ Bansamuni mingi mezwaka dibaku ya kuyedisa kisalu na bo ya kusamuna na kukwendaka na dibundu yankaka na insi na bo to na insi yankaka. Bankaka melongukaka ndinga mosi ya mpa sambu na kulonga bantu ya insi yankaka.

5. Inki mutindu beto fwete tadila ntangu yai ya beto kezinga, mpi nki fwete vanda lukanu na beto?

⁵ Beto yonso fwete vila ve nde bilanga kele “nsi-ntoto ya mvimba.” (Mat. 9:37; 13:38) Sambu nsuka ya ngidika ya bima yai ya mbi mefinama, konso muntu fwete tadila na dikebi yonso luzingu na yandi, mayele na yandi, mabaku na yandi, sambu na kutala mutindu yandi lenda yedisa kisalu na yandi ya kusamuna. Yehowa kepesa beto kivuvu nde kana beto tula mambote ya Kimfumu na kisika ya ntete, yandi tasakumuna bikesa na beto ya masonga ya kuyedisa kisalu na beto ya kusamuna.​—⁠Mat. 6:⁠33.