Kabula “Mambu ya Mbote” Sambu na Kumonisa Kikalulu ya Kuyamba Banzenza (Mat. 12:35a)

Ntembe kele ve nde beto yonso ke zolaka kukabula “mambu ya mbote” ti bantu ya nkaka ntangu beto ke monisaka “kikalulu ya kuyamba banzenza.” (Bar. 12:13) Bankuluntu ke bakaka bangidika sambu na kuyamba mitubi ya nzenza mpi kuvutudila bo mbongo na bo ya transpore. Kansi beto lenda vanda ti badute ya kuyamba banzenza sambu beto kele ve ti bamwaye, to ke kudiyangisa sambu na kubinga bampangi ya nkaka na nzo na beto. Kana beto tula dikebi na ndongisila yina Yezu pesaka Marta, yo ta sadisa beto na kukatula bangindu ya mutindu yai. (Luka 10:39-42) Yezu monisaka nde “kima ya mbote” ya kusala sambu na kuyamba banzenza kele kusala kinduku mpi kupesana kikesa kansi ve kulamba madia mingi to kuvanda ti nzo ya kitoko. Kana beto sadila ndongisila yai, beto yonso lenda kabila bampangi na beto “mambu ya mbote” na kuwakana ti mambu yina Ndinga ya Nzambi ke tubaka.​—3 Yoa. 5-8.