Nge Lenda Samuna mpi Kulonga!

Ntangu Yehowa pesaka Moize mukumba na mbala ya ntete, Moize yindulaka nde yandi ta kuka ve kulungisa yo. (Kub 4:10, 13) Keti nge me kudiwaka mpi mutindu yai? Keti nge ke longukaka Biblia ti Bambangi ya Yehowa? Keti nge ke kudiyangisaka kana nge ta kuka kusamuna nzo na nzo? Ziku nge kele toko mpi nge ke waka boma ya kuta kimbangi na nzo-nkanda. To mbala ya nkaka nge ke waka boma ya kuta kimbangi na nzila ya telefone to na bisika ya bantu mingi. Samba Yehowa mpi lomba mpeve santu na yandi. (1 Pi 4:11) Tula ntima nde yandi ta sadisa nge na kulungisa konso mukumba yina yandi me pesa nge.—Kub 4:11, 12.

SONGA VIDEO VANDA . . . NSAMUNI YA KIKESA MPI NA NIMA BENO PESA BAMVUTU NA BANGIUFULA YAI:

• Inki diambu ya mpasi mpangi Aoyama kutanaka ti yo?

• Inki sadisaka yandi na kuvanda ngolo mpi kikesa?—Yer 20:7-9

• Inki vandaka mutindu ya mbote yina sadisaka yandi na kusala mingi na kisalu ya Yehowa?

• Inki kele bampasi ya ke vandaka na kisalu ya kusamuna yina Yehowa lenda sadisa nge na kununga?