Keti Nge Zabaka Yo?

Pusu-pusu yina muntu ya Etiopia vandaka na kati ntangu Filipo kwendaka kusolula ti yandi vandaka nki mutindu?

NGOGO ya ndinga ya kisina ya bo me balula na ngogo “pusu-pusu” na Mbalula ya Nsi-Ntoto ya Mpa lenda tadila bapusu-pusu ya mitindu mingi. (Bis. 8:28, 29, 38) Kansi, yo ke monana nde muntu yina ya Etiopia vandaka na pusu-pusu mosi ya nene kibeni kuluta yina bo vandaka kusadila na bitumba to na bansaka ya kubaka ntinu. Beto tadila mwa mambu ya ke pusa beto na kutuba mutindu yina.

Muntu ya Etiopia vandaka ti kiyeka ya nene mpi yandi salaka voyage ya nda kibeni. Yandi vandaka “muntu yina vandaka ti kiyeka mpi vandaka kusadila Kandase, ntotila-nkento ya bantu ya Etiopia, mpi yandi vandaka kukeba bimvwama na yandi yonso.” (Bis. 8:27) Soudan ya bubu mpi kitini ya kuluta nene ya sudi ya Egypte ya bubu, vandaka na kati ya Etiopia ya ntama. Ata yo ke monana nde muntu yina ya Etiopia salaka ve voyage ya mvimba na kati ya pusu-pusu yina, ntembe kele ve nde yandi nataka bima mingi yina yandi vandaka ti yo mfunu. Bapusu-pusu ya nkaka yina bo vandaka kusadila na mvu-nkama ya ntete ya ntangu na beto sambu na kunata bantu, vandaka ti bapine iya. Mukanda mosi (Acts—An Exegetical Commentary) ke tuba nde: “Bapusu-pusu yina vandaka nene mpi bo vandaka kutula bagode mpi bima ya nkaka. Yo vandaka kusala nde bantu kusala voyage mbote mpi yo vandaka kusadisa bo na kusala ba voyage ya nda.

Muntu ya Etiopia vandaka kutanga ntangu Filipo kwendaka kusolula ti yandi. Biblia ke tuba nde: “Filipo kwendaka ntinu na lweka na yo mpi waka muntu yina ke tanga mukanda ya mbikudi Yezaya na ndinga ya ngolo.” (Bis. 8:30) Bapusu-pusu yina bo vandaka kusadila ba voyage vandaka ve kutambula ntinu. Yo yina sambu yo vandaka kutambula malembe, yo sadisaka muntu yina ya Etiopia na kutanga mpi yo sadisaka Filipo na kulanda yo na makulu mpi na kukanga yo.

Muntu ya Etiopia “bondilaka Filipo na kumata mpi kuvanda ti yandi.” (Bis. 8:31) Na bapusu-pusu yina bo vandaka kusadila sambu na bansaka ya kubaka ntinu, bantu vandaka kutelema. Kansi bapusu-pusu yina bo vandaka kusadila ba voyage vandaka ti bisika ya kuvanda, yo yina muntu yina ya Etiopia ti Filipo vandaka ya kuvanda.

Na kuwakana ti mambu yina bo sonikaka na nsadisa ya mpeve santu ya kele na Bisalu kapu 8 mpi mambu ya nkaka ya istware yina beto me zaba, mikanda na beto ya me basika ntama mingi ve ke monisa muntu ya Etiopia na pusu-pusu mosi ya nene kuluta yina bo vandaka kusadila na bitumba to na bansaka ya kubaka ntinu.