Mutindu ya Kuyibuka Baverse ya Biblia

Keti yo me vandilaka nge dezia mpasi na kuyibuka verse mosi ya Biblia yina nge ke zolaka mingi? Mbala ya nkaka yo kele verse yina ke pesaka nge kikesa, yina ke sadisaka nge na kukatula bangindu ya mbi to yina nge ke zolaka kutangila bantu. (Nk. 119:11, 111) Tala mwa mambu ya nge lenda sala sambu na kuyibuka baverse ya Biblia.

• Sadila aplikasio JW Library^®. Ntangu nge ke tanga Biblia na JW Library, bumba konso verse yina nge ta zola kuyibuka na kisika mosi ya nge me sonika nde “Baverse ya Mono Ke Zolaka Mingi.”

• Tula papie yina nge me sonika baverse na kisika yina nge lenda monaka yo kukonda mpasi. Sonika na kitini ya papie verse yina nge ta zola kuyibuka mpi tula papie yango na kisika yina nge ta monaka yo mbala na mbala. Bampangi ya nkaka ke tulaka yo na lweka ya kitala-tala mpi bankaka ke tulaka yo na ntwala ya frigo. Bankaka diaka ke bakaka baverse yango foto na telefone mpi ke sadilaka foto yango na ekran ya batelefone to baordinatere na bo.

• Sadila bitini ya fioti ya bapapie. Sonika zina ya mukanda ya Biblia, kapu mpi verse na yo na ntwala ya papie mosi mpi bangogo na yo na nima ya papie yango. Na nima, tala na ntwala ya papie yango zina ya mukanda ya Biblia, kapu mpi verse na yo mpi meka kuyibuka bangogo na yo yina kele na nima ya papie yango. To mpi tala bangogo ya verse yina kele na nima ya papie yango mpi meka kuyibuka zina ya mukanda ya Biblia, kapu mpi verse na yo.