Keti Yezu Vandaka Kaka Muntu ya Mbote?

Mvutu na Biblia

Yezu vandaka ve kaka muntu ya mbote mpamba. Na bunkufi, beto lenda tuba nde Yezu kele muntu yina me bikaka nsangu na ntoto kuluta bantu ya nkaka yonso. Tala mambu yina bantu ya mayele ya istware mpi bansoniki ya nene me tubaka sambu na yandi:

“Yezu muntu ya Nazareti . . . kele muntu yina me bikaka nsangu kuluta bantu yonso.”​—H. G. Wells, nsoniki ya istware na Angleterre.

“[Yezu] kele muntu yina me vandaka ti bupusi ya ngolo na luzingu ya bantu na ntoto yai kuluta bantu yonso, mpi yandi kele kaka ti bupusi yina tii bubu.”​—Kenneth Scott Latourette, nsoniki ya istware na États-Unis.

Biblia ke monisa kikuma yina Yezu me bikaka nsangu kuluta bantu yonso ya nkaka ya mbote. Ntangu Yezu yulaka bantumwa na yandi kana yandi kele nani, ntumwa mosi tubaka na pwelele nde: “Nge kele Kristu, Mwana ya Nzambi ya moyo.”​—Matayo 16:16.