Mathayo
28 Thutha wa Thabatũ, rĩrĩa gwathererũkaga mũthenya wa mbere wa kiumia,* Mariamu Mũmagidali marĩ na Mariamu ũcio ũngĩ magĩthiĩ kũrora mbĩrĩra.
2 Na rĩrĩ, nĩ kwagĩte na gĩthingithia kĩnene, tondũ mũraika wa Jehova* nĩ aaikũrũkĩte kuuma igũrũ na akagaragaria ihiga rĩrĩa rĩahingĩte mbĩrĩra, na nĩrĩo aaikarĩire. 3 Nake aahaanaga o ta rũheni, nacio nguo ciake ikerũha mũno. 4 Nĩ ũndũ wa kũmwĩtigĩra, arangĩri acio makĩinaina mũno na makĩhaana ta andũ akuũ.
5 No mũraika akĩra atumia acio atĩrĩ: “Mũtigetigĩre, tondũ nĩ njũĩ mũracaria Jesu ũrĩa ũroragĩirũo mũtĩ igũrũ. 6 Ndarĩ haha, nĩ gũkorũo nĩ ariũkĩtio, o ta ũrĩa oigĩte. Ũkai muone harĩa arakomete. 7 Mũcoke mũthiĩ na ihenya mwĩre arutwo ake atĩ nĩ ariũkĩtio na nĩ egũthiĩ mbere yanyu Galili. Kũu nĩkuo mũrĩmuona. Na atĩrĩrĩ, nĩ ndamwĩra maũndũ macio.”
8 Nĩ ũndũ ũcio, makiuma hau mbĩrĩra-inĩ na ihenya marĩ na guoya na gĩkeno kĩnene, magĩtengʼera kwĩra arutwo ake ũhoro ũcio. 9 Na rĩrĩ, Jesu agĩtũngana nao akĩmoria: “Mũrĩ ega?” Nao makĩmũkuhĩrĩria, makĩmũnyita magũrũ na makĩmũinamĩrĩra. 10 Nake Jesu akĩmeera ũũ: “Mũtigetigĩre! Thiĩi mũkeere ariũ a Awa mathiĩ Galili, na nĩ mekũngora kuo.”
11 Na rĩrĩa atumia acio maarĩ njĩra, arangĩri amwe magĩthiĩ thĩinĩ wa taũni na makĩmenyithia athĩnjĩri-Ngai arĩa anene maũndũ marĩa mothe meekĩkĩte. 12 Na thutha wa athĩnjĩri-Ngai acio kũgomana hamwe na athuri na kwarĩrĩria ũhoro ũcio, makĩhe arangĩri acio mbeca nyingĩ 13 makĩmeera: “Muge ũũ: ‘Arutwo ake mokire ũtukũ tũrĩ toro na maiya mwĩrĩ wake.’ 14 Na ngavana angĩmenya ũhoro ũyũ, nĩ tũkũmũiguithia na kwoguo mũtirabatara kũmaka.” 15 Nĩ ũndũ ũcio makĩoya mbeca icio na magĩka o ũrĩa meerirũo, na ũhoro ũcio nĩ ũtheremetio mũno gatagatĩ-inĩ ka Ayahudi nginya ũmũthĩ ũyũ.
16 No rĩrĩ, arutwo arĩa ikũmi na ũmwe magĩthiĩ Galili kĩrĩma-inĩ kũrĩa Jesu aameerĩte mathiĩ macemanie. 17 Rĩrĩa maamuonire, makĩmũinamĩrĩra, no amwe makĩgĩa na nganja kana nĩwe. 18 Jesu akĩmakuhĩrĩria na akĩmeera ũũ: “Nĩ heetwo wathani wothe kũrĩa igũrũ o na gũkũ thĩ. 19 Nĩ ũndũ ũcio-rĩ, thiĩi mũgatue andũ a ndũrĩrĩ ciothe arutwo akwa, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa roho mũtheru, 20 mũkĩmarutaga kũrũmia maũndũ marĩa mothe ndĩmwathĩte. Na rĩrĩ, niĩ ndĩkoragwo hamwe na inyuĩ mĩthenya yothe nginya ithirĩro rĩa mũtabarĩre ũyũ wa maũndũ.”*