Luka

8 Kahinda kanini thutha ũcio, agĩthiĩ kuuma itũũra rĩmwe nginya rĩrĩa rĩngĩ na gĩcagi kĩmwe nginya kĩrĩa kĩngĩ akĩhunjagia ũhoro ũrĩa mwega wa Ũthamaki wa Ngai. Na arĩa Ikũmi na Erĩ maarĩ hamwe nake, 2 na atumia amwe arĩa maarutĩtwo ndaimono na makahonio mĩrimũ: Mariamu Mũmagidali, ũrĩa warutĩtwo ndaimono mũgwanja; 3 Joana mũtumia wa Husa ũrĩa warũgamagĩrĩra nyũmba ya Herode; Susana; na atumia angĩ aingĩ, arĩa maahũthagĩra indo ciao kũmatungatĩra.

4 Na rĩrĩa kĩrĩndĩ kĩnene gĩacemanĩtie, o hamwe na andũ arĩa maathiaga kũrĩ we moimĩte matũũra-inĩ matiganĩte, akĩmaarĩria na njĩra ya ngerekano akĩmeera: 5 “Mũhuri ũmwe nĩ aathiire kũhura mbeũ. Na rĩrĩa aahuraga, imwe ikĩgwa njĩra-inĩ na ikĩrangĩrĩrio thĩ, na nyoni cia rĩera-inĩ igĩũka igĩcirĩa. 6 Ingĩ ikĩgwa rũnyanjara-inĩ, na ciamera ikĩũma tondũ wa kwaga maĩ. 7 Ingĩ ikĩgwa mĩigua-inĩ, nayo mĩigua ĩyo ĩkĩneneha hamwe nacio, ĩgĩcihatĩka. 8 No ingĩ ikĩgwa tĩri-inĩ ũrĩa mwega, na ciamera, igĩciara ingĩ maita igana.” Arĩkia kuuga maũndũ macio, akĩanĩrĩra akiuga: “Mũndũ ũrĩa ũrĩ matũ ma kũigua nĩ aigue.”

9 No arutwo ake makĩmwĩra amataarĩrie ngerekano ĩyo. 10 Nake akĩmeera atĩrĩ: “Inyuĩ nĩ mwĩtĩkĩrĩtio gũtaũkĩrũo nĩ hitho cia Ũthamaki wa Ngai, no andũ acio angĩ maheagwo ũhoro na ngerekano, nĩ getha atĩ o na marora matikone, na maigua matigataũkĩrũo. 11 Rĩu-rĩ, ngerekano ĩyo yugĩte ũũ: Mbeũ nĩ kiugo kĩa Ngai. 12 Iria ciagũire njĩra-inĩ nĩ arĩa maiguaga kiugo, nake Mũcukani okaga agakĩeheria kuuma ngoro-inĩ ciao nĩguo matigetĩkie na mahonokio. 13 Iria ciagũire rũnyanjara-inĩ nĩ arĩa hĩndĩ ĩrĩa maigua kiugo, makĩamũkagĩra makenete, no matikoragwo na mĩri. Metĩkagia o kwa ihinda, no kwagĩa magerio makahĩngĩka. 14 Naho ha ũhoro wa iria ciagũire mĩigua-inĩ, nĩ arĩa maiguĩte kiugo, no nĩ ũndũ wa gũtahwo nĩ mĩhangʼo, ũtonga, na mĩago ya ũtũũro ũyũ, magatharara biũ na makaga maciaro. 15 Nacio iria ciagũire tĩri-inĩ ũrĩa mwega, nĩ arĩa thutha wa kũigua kiugo marĩ na ngoro njega, makĩigaga na magaciara maciaro marĩ na ũkirĩrĩria.

16 “Gũtirĩ mũndũ wakagia tawa agacoka akaũkunĩkĩria na kĩndũ kana akaũiga rungu rwa ũrĩrĩ, ĩndĩ aũigagĩrĩra handũ igũrũ nĩguo arĩa megũtonya mone ũtheri. 17 Tondũ gũtirĩ ũndũ mũhithe ũtakoimbũka, kana ũndũ o na ũmwe mũhithe biũ ũtakaamenyeka. 18 Nĩ ũndũ ũcio-rĩ, mwĩmenyagĩrĩrei ũrĩa mũthikagĩrĩria, nĩ gũkorũo mũndũ o wothe ũrĩ na kĩndũ nĩ akoongererũo, no ũrĩa ũtarĩ kĩndũ, o na kĩrĩa eciragia arĩ nakĩo nĩ agaatunywo.”

19 Na rĩrĩ, nyina na ariũ a nyina magĩthiĩ kũrĩ we, no makĩremwo kũmũkuhĩrĩria nĩ ũndũ wa kĩrĩndĩ. 20 Kwoguo agĩkinyĩrio ũhoro akĩrũo: “Maitũguo na ariũ a maitũguo marũgamĩte nja, makĩenda gũkuona.” 21 Nake akĩmacokeria akĩmeera atĩrĩ: “Maitũ na ariũ a maitũ nĩ aya maiguaga kiugo kĩa Ngai na magagĩathĩkĩra.”

22 Mũthenya ũmwe marĩ na arutwo ake makĩingĩra gatarũ, nake akĩmeera ũũ: “Nĩ tũringei mũrĩmo ũrĩa ũngĩ wa iria.” Nĩ ũndũ ũcio magĩkũũra. 23 No rĩrĩa maathiaga, akĩnyitwo nĩ toro. Na gũkĩgĩa kĩhuhũkanio kĩnene kũu iria-inĩ, nako gatarũ kao gakĩambĩrĩria kũingĩria maĩ na gagĩkorũo karĩ ũgwati-inĩ. 24 Nĩ ũndũ ũcio magĩthiĩ na makĩmũũkĩria makĩmwĩra: “Mũrutani, Mũrutani, tũrĩ hakuhĩ gũthira!” Aigua ũguo, agĩũkĩra na agĩkũũma rũhuho rũu o hamwe na maĩ macio maahũranaga, nacio igĩkira, na gũkĩhoorera biũ. 25 Nake akĩmoria atĩrĩ: “Wĩtĩkio wanyu ũrĩ ha?” No makĩiyũrũo nĩ guoya na makĩgega, makĩũrania atĩrĩ: “Ũyũ kũna nũ? Nĩ gũkorũo araatha nginya huho na maĩ, na ikamwathĩkĩra.”

26 Magĩcoka makĩrũgama rũteere-inĩ rwa iria gĩcigo-inĩ kĩa Agerasi, kĩrĩa kĩngʼethanĩire na Galili. 27 Na rĩrĩa Jesu oimire gatarũ, agĩcemania na mũndũ warĩ na ndaimono oimĩte itũũra-inĩ. Mũndũ ũcio ndaakoretwo akĩĩhumba nguo kwa ihinda iraya, na ndaikaraga nyũmba ĩndĩ aaikaraga mbĩrĩra-inĩ. 28 Rĩrĩa onire Jesu akĩanĩrĩra na agĩturia maru mbere yake, akiuga na mũgambo mũnene atĩrĩ: “Tũrorania kĩĩ nawe, Jesu, Mũrũ wa Ngai Ũrĩa ũrĩ Igũrũ Mũno? Ndagũthaitha ndũkanyarire.” 29 (Nĩ gũkorũo Jesu nĩ aathaga ndaimono ĩyo yume thĩinĩ wa mũndũ ũcio. Nĩ yamũnyitaga maita maingĩ na akohwo kaingĩ na mĩnyororo na bĩngũ na akarangĩrũo, no nĩ aacituangaga na agatwarũo kũndũ gũtarĩ andũ nĩ ndaimono ĩyo.) 30 Jesu akĩmũũria: “Wĩtagwo atĩa?” Nake akiuga: “Legioni,*” nĩ gũkorũo aarĩ na ndaimono nyingĩ. 31 Na nĩ ciamũthaithaga mũno ndagaciathe ithiĩ thĩinĩ wa irima rĩrĩa rĩtarĩ gĩturi.* 32 Na rĩrĩ, nĩ kwarĩ na rũũru rũnene rwa ngũrũe rwarĩaga kũu kĩrĩma-inĩ, nacio ndaimono ikĩmũthaitha aciĩtĩkĩrie itonye thĩinĩ wa ngũrũe icio, nake agĩciĩtĩkĩria. 33 Nacio ndaimono icio ikiuma thĩinĩ wake na igĩthiĩ ikĩingĩra thĩinĩ wa rũũru rũu rwa ngũrũe, naruo rũgĩtengʼera kĩharũrũka-inĩ rũkĩgwa thĩinĩ wa iria rũgĩkua. 34 No rĩrĩa arĩithi moonire maũndũ macio, makĩũra na magĩthiĩ makĩheana ũhoro ũcio itũũra-inĩ na mĩgũnda-inĩ.

35 Nao andũ magĩthiĩ kuona maũndũ macio meekĩkĩte. Magĩkinya harĩ Jesu na makĩona mũndũ ũcio warutĩtwo ndaimono, ehumbĩte nguo na arĩ mũhonu meciria, aikarĩte thĩ magũrũ-inĩ ma Jesu, magĩĩtigĩra mũno. 36 Nao arĩa meeyoneire maũndũ macio magĩkĩka, makĩmeera ũrĩa mũndũ ũcio warĩ na ndaimono aahonetio. 37 Na andũ aingĩ a bũrũri wa Agerasi makĩra Jesu oime kũu ameherere, tondũ nĩ maanyitĩtwo nĩ guoya mũnene. Nake agĩtonya thĩinĩ wa gatarũ nĩguo athiĩ. 38 O na kũrĩ ũguo, mũndũ ũcio warutĩtwo ndaimono akĩmũthaitha mũno ndakamũtige, no we akĩmwĩra athiĩ, akiuga ũũ: 39 “Coka kwanyu mũciĩ, na ũthiĩ na mbere kwĩra andũ ũrĩa Ngai agwĩkĩire.” Nĩ ũndũ ũcio agĩthiĩ, akĩhunjagia itũũra-inĩ rĩu rĩothe ũrĩa Jesu aamwĩkĩire.

40 Rĩrĩa Jesu aacokire, andũ makĩmwamũkĩra wega, nĩ gũkorũo othe nĩ maamwĩrĩgagĩrĩra. 41 Na rĩrĩ, mũndũ wetagwo Jairo agĩũka; mũndũ ũcio aarĩ mũrũgamĩrĩri wa thunagogi. Akĩĩgũithia thĩ magũrũ-inĩ ma Jesu na akĩambĩrĩria kũmũthaitha athiĩ gwake mũciĩ, 42 tondũ kairĩtu gake ka mĩaka ta ikũmi na ĩĩrĩ, kaarĩ hakuhĩ gũkua, na ndaarĩ na kangĩ.

Na rĩrĩa aathiaga, kĩrĩndĩ nĩ kĩamũhatĩkaga. 43 Na rĩrĩ, nĩ haarĩ na mũtumia watũũraga oiraga thakame mĩaka ikũmi na ĩĩrĩ, na ndaahotete kuona kĩhonia kuuma kũrĩ mũndũ o na ũmwe. 44 Agĩthiĩ thutha wake na akĩhutia gĩcũrĩ kĩa nguo yake ya igũrũ, na o hĩndĩ ĩyo agĩtiga kuura. 45 Nĩ ũndũ ũcio Jesu akĩũria: “Nũ wahutia?” Na hĩndĩ ĩrĩa andũ othe maakaanaga, Petero akĩmwĩra: “Mũrutani, kĩrĩndĩ nĩ gĩgũthiũrũrũkĩirie na nĩ kĩrakũhatĩka.” 46 No Jesu akiuga: “Nĩ harĩ mũndũ wahutia, tondũ nĩ ndaamenya atĩ hinya nĩ woima thĩinĩ wakwa.” 47 Rĩrĩa onire atĩ nĩ amenyeka, mũtumia ũcio agĩthiĩ harĩ we akĩinainaga, akĩmũturĩria maru na akiumbũra mbere ya andũ othe kĩrĩa gĩatũmĩte amũhutie na ũrĩa aahonirio o hĩndĩ ĩyo. 48 No we akĩmwĩra: “Mwarĩ wakwa, wĩtĩkio waku nĩ watũma ũhone. Thiĩ na thayũ.”

49 Na rĩrĩa aaragia, hagĩũka mũndũ woimĩte mũciĩ kwa mũrũgamĩrĩri ũcio wa thunagogi, akĩmwĩra: “Kairĩtu gaku nĩ gakua; hatirĩ bata wa gũthĩnia Mũrutani rĩngĩ.” 50 Rĩrĩa Jesu aaiguire ũguo, akĩmwĩra: “Ndũgetigĩre, no gĩa na wĩtĩkio, na nĩ gekũhonokio.” 51 Na rĩrĩa aakinyire nyũmba, ndaarekire mũndũ ũngĩ atonye thĩinĩ hamwe nake tiga Petero, Johana, Jakubu, na ithe na nyina wa kairĩtu kau. 52 No andũ othe nĩ maarĩraga makĩĩhũũraga nĩ kĩeha nĩ ũndũ wa kairĩtu kau. Kwoguo akĩmeera: “Tigai kũrĩra, nĩ gũkorũo gatikuĩte ĩndĩ nĩ gũkoma gakomete.” 53 Maigua ũguo, makĩambĩrĩria kũmũthekerera na kĩnyũrũri, tondũ nĩ maamenyaga nĩ gakuĩte. 54 No agĩkanyita guoko na agĩkeera: “Mwana ũyũ, ũkĩra!” 55 Nako gakĩriũka,* gagĩũkĩra o rĩo, nake akiuga kaheo kĩndũ gĩa kũrĩa. 56 Na rĩrĩ, aciari ako magĩkena mũno, no akĩmeera matikeere mũndũ ũrĩa gwekĩkĩte.