Johana
4 Rĩrĩa Mwathani aamenyire atĩ Afarisai nĩ maaiguĩte atĩ nĩ aagĩaga na akabatithia arutwo aingĩ gũkĩra Johana— 2 o na gũtuĩka Jesu we mwene ndaabatithagia andũ ĩndĩ nĩ arutwo ake maabatithanagia— 3 akiuma Judea akĩerekera Galili o rĩngĩ. 4 No nĩ haarĩ bata agerere Samaria. 5 Nĩ ũndũ ũcio agĩkinya itũũra rĩa Samaria rĩetagwo Sukaru, hakuhĩ na mũgũnda ũrĩa Jakubu aaheete mũrũwe Jusufu. 6 Gĩthima kĩa Jakubu kĩarĩ kũu. Na rĩrĩ, nĩ ũndũ wa ũrĩa Jesu aanogete nĩ thabarĩ, agĩikara thĩ hau gĩthima-inĩ. Hĩndĩ ĩyo kwarĩ ta thaa thita.
7 Mũtumia ũmwe wa Samaria agĩũka gũtaha maĩ. Jesu akĩmwĩra atĩrĩ: “He maĩ nyue.” 8 (Tondũ arutwo ake nĩ maathiĩte itũũra-inĩ kũgũra irio.) 9 Kwoguo mũtumia ũcio Mũsamaria akĩmũũria ũũ: “Nĩ kĩĩ kĩratũma wee, o na ũrĩ Mũyahudi, ũũhoe maĩ o na gũtuĩka ndĩ mũtumia Mũsamaria?” (Tondũ Ayahudi matinyitanagĩra na Asamaria.) 10 Jesu akĩmũcokeria atĩrĩ: “Ũngĩũĩ kĩheo kĩrĩa Ngai aheanaga na nũ ũrakwĩra, ‘He maĩ nyue,’ nĩ ũngĩamũhoya, na nĩ angĩakũhe maĩ ma muoyo.” 11 Mũtumia ũcio akĩmwĩra: “Mũthuri ũyũ, ndũrĩ o na ndoo ya gũtaha maĩ, na gĩthima nĩ kĩriku. Ũkĩrutĩte kũ maĩ macio ma muoyo? 12 Wee ndũrĩ mũnene gũkĩra ithe witũ Jakubu, ũrĩa watũheire gĩthima gĩkĩ, na we hamwe na ariũ ake na mahiũ make maanyuaga maĩ ma kĩo.” 13 Jesu akĩmwĩra: “Mũndũ o wothe ũnyuaga maĩ maya nĩ acokaga kũnyota. 14 Ũrĩa wothe ũkũnyua maĩ marĩa ngũmũhe ndarĩ hĩndĩ akaanyota, no maĩ marĩa ngũmũhe megũtuĩka thĩinĩ wake itherũkĩro rĩa maĩ ma kũmũhe muoyo wa tene na tene.” 15 Mũtumia ũcio akĩmwĩra: “Mũthuri ũyũ, he maĩ macio, nĩguo ndikananyote o na kana ndũũre njũkaga handũ haha gũtaha maĩ.”
16 Akĩmwĩra: “Thiĩ ũgete mũthuri waku mũũke haha.” 17 Mũtumia ũcio agĩcokia ũũ: “Ndirĩ mũthuri.” Jesu akĩmwĩra: “Nĩ woiga ũrĩa kũrĩ atĩ, ‘Ndũrĩ mũthuri.’ 18 Nĩ ũndũ ũkoretwo na athuri atano, na ũrĩa ũrĩ nake rĩu, ti mũthuri waku. Hau waria ma.” 19 Mũtumia ũcio akĩmwĩra: “Mũthuri ũyũ, nĩ ndona wee ũrĩ mũnabii. 20 Maithe maitũ ma tene maathathayagĩria kĩrĩma-inĩ gĩkĩ, ĩndĩ inyuĩ mugaga atĩ Jerusalemu nĩkuo andũ magĩrĩirũo gũthiĩ gũthathaĩria.” 21 Jesu akĩmwĩra atĩrĩ: “Mũtumia ũyũ, njĩtĩkia, hĩndĩ nĩ ĩroka rĩrĩa mũtagathathayagĩria Awa kĩrĩma-inĩ gĩkĩ o na kana Jerusalemu. 22 Inyuĩ mũthathayagia kĩrĩa mũtoĩ, no ithuĩ tũthathayagia kĩrĩa tũĩ, tondũ ũhonokio wambagĩrĩria na Ayahudi. 23 No rĩrĩ, hĩndĩ nĩ ĩrĩũka, na rĩu nĩ nginyu, rĩrĩa athathaiya a ma magaathathayagia Awa na roho na ma, nĩ gũkorũo nĩ ta acio Awa acaragia mamũthathayagie. 24 Ngai nĩ Roho, na arĩa mamũthathayagia no mũhaka mamũthathayagie na roho na ma.” 25 Mũtumia ũcio akĩmwĩra: “Nĩ njũĩ atĩ Mesia, ũrĩa wĩtagwo Kristo, nĩ aroka. Ũcio oka, nĩ agaatũmenyithia maũndũ mothe wega.” 26 Nake Jesu akĩmwĩra: “Niĩ ndĩraaria nawe, nĩ niĩ we.”
27 Hĩndĩ ĩyo arutwo ake magĩkinya, na makĩmaka nĩ kuona akĩaria na mũtumia. No hatirĩ o na ũmwe woririe: “Ũracaria kĩĩ?” kana “Nĩ kĩĩ kĩratũma warie nake?” 28 Kwoguo mũtumia ũcio agĩtiga ndoo yake ya maĩ na agĩthiĩ itũũra-inĩ akĩra andũ atĩrĩ: 29 “Ũkai mũkone mũndũ wanjĩra maũndũ mothe marĩa ndaaneka. To gũkorũo ũcio nĩwe Kristo?” 30 Nao makiuma kũu itũũra-inĩ makĩambĩrĩria gũthiĩ kũrĩ Jesu.
31 Hĩndĩ ĩyo, arutwo maamũringagĩrĩria makamwĩra: “Rabii, rĩa.” 32 No we akĩmeera: “Ndĩ na irio cia kũrĩa iria inyuĩ mũtoĩ.” 33 Nĩ ũndũ ũcio arutwo acio makĩũrania: “Kaĩ harĩ mũndũ ũmũreheire irio?” 34 Jesu akĩmeera: “Irio ciakwa nĩ gwĩka wendi wa ũrĩa wandũmire na kũrĩkia wĩra wake. 35 Githĩ mũtiugaga atĩ hĩndĩ ya magetha ĩtigĩtie mĩeri ĩna ĩkinye? Ngũmwĩra atĩrĩ: Tiirai maitho manyu mũrore mĩgũnda, muone atĩ nĩ yerũhĩte ũndũ ĩngĩgethwo. Rĩu 36 mũgethi nĩ aramũkĩra marĩhi na agacokanĩrĩria maciaro nĩ ũndũ wa muoyo wa tene na tene, nĩguo mũhandi na mũgethi makenanĩre hamwe. 37 Na njĩra ĩyo ũndũ ũyũ nĩ wa ma: Ũmwe nĩ mũhuri nake ũngĩ nĩ mũgethi. 38 Ndĩmũtũmĩte mũkagethe kĩrĩa mũtanogeire. Angĩ maananoga, na inyuĩ nĩ mũgunĩkĩte kuumana na mĩnoga yao.”
39 Asamaria aingĩ kuuma itũũra rĩu makĩmwĩtĩkia tondũ wa ũira ũrĩa maaheirũo nĩ mũtumia ũcio rĩrĩa aameerire ũũ: “Anjĩrire maũndũ mothe marĩa ndaaneka.” 40 Kwoguo rĩrĩa Asamaria maathiire harĩ Jesu, makĩmũũria aikare nao, nake agĩikara kũu thikũ igĩrĩ. 41 Nĩ ũndũ ũcio, andũ angĩ aingĩ magĩtĩkia nĩ ũndũ wa ũhoro ũrĩa aaririe, 42 na makĩra mũtumia ũcio atĩrĩ: “Tũtiretĩkia nĩ ũndũ tu wa maũndũ marĩa ũtwĩrire; nĩ gũkorũo nĩ tweiguĩra ithuĩ ene, na nĩ twamenya atĩ mũndũ ũyũ hatarĩ nganja nĩwe mũhonokia wa thĩ.”
43 Thutha wa thikũ icio igĩrĩ, akiuma kũu agĩthiĩ Galili. 44 O na kũrĩ ũguo, Jesu we mwene nĩ oigire atĩ mũnabii ndaheagwo gĩtĩo bũrũri-inĩ wao. 45 Rĩrĩa aakinyire Galili, andũ a Galili makĩmwamũkĩra, nĩ ũndũ nĩ meeyoneire maũndũ mothe marĩa eekire Jerusalemu hĩndĩ ya gĩathĩ, nĩ gũkorũo o nao nĩ maathiĩte gĩathĩ-inĩ kĩu.
46 Agĩcoka agĩthiĩ Kana ya Galili o rĩngĩ, kũrĩa aagarũrĩte maĩ magatuĩka ndibei. Na rĩrĩ, thĩinĩ wa Kaperinaumu mũrũ wa ndungata ĩmwe ya mũthamaki aarĩ mũrwaru. 47 Rĩrĩa ndungata ĩyo yaiguire atĩ Jesu nĩ oimĩte Judea agathiĩ Galili, ĩgĩthiĩ kũrĩ we ĩkĩmũũria aikũrũke akahonie mũrũ wayo, nĩ gũkorũo aarĩ hakuhĩ gũkua. 48 No Jesu akĩmĩra atĩrĩ: “Inyuĩ mũtangĩona ciama na maũndũ ma magegania, gũtirĩ hĩndĩ mũngĩtĩkia.” 49 Nayo ndungata ĩyo ĩkĩmwĩra: “Mwathani, nĩ tũthiĩ mwana wakwa atanakua.” 50 Jesu akĩmĩra atĩrĩ: “Wĩthiĩre; mũrũ waku nĩ ahona.” Mũndũ ũcio agĩtĩkia ciugo icio Jesu aamwĩrire na agĩthiĩ. 51 Na rĩrĩa aarĩ njĩra-inĩ agĩthiĩ-rĩ, ngombo ciake ikĩmũtũnga ikĩmwĩra atĩ mũrũ wake nĩ mũhonu. 52 Agĩciũria arahonire rĩ. Nacio ikĩmũcokeria atĩrĩ: “Mũrimũ ũcio ũrathirire ira ta thaa mũgwanja.” 53 Hĩndĩ ĩyo ithe wa mwana ũcio akĩmenya atĩ nĩ hĩndĩ ĩrĩa Jesu aramwĩrire ũũ: “Mũrũ waku nĩ ahona.” Nĩ ũndũ ũcio we hamwe na nyũmba yake yothe magĩtĩkia. 54 Kĩu nĩkĩo kĩama gĩa kerĩ kĩrĩa Jesu aaringire rĩrĩa oimire Judea agĩthiĩ Galili.