Johana
5 Thutha ũcio, nĩ kwarĩ na gĩathĩ kĩa Ayahudi, na Jesu akĩambata agĩthiĩ Jerusalemu. 2 Na rĩrĩ, kũu Jerusalemu kĩhingo-inĩ kĩa Ngʼondu, nĩ kwarĩ na karia geetagwo na Kĩhibirania Bethzatha, na kaarĩ na ithaku ithano. 3 Thĩinĩ wacio nĩ kwarĩ na andũ aingĩ maakomete ho arwaru, atumumu, andũ mataahotaga gwĩtwara, na angĩ maarĩ onju. 4 *—— 5 No hau nĩ haarĩ mũndũ ũmwe watũũrĩte arĩ mũrwaru mĩaka mĩrongo ĩtatũ na ĩnana. 6 Rĩrĩa Jesu onire mũndũ ũcio akomete hau na amenya atĩ aakoretwo arĩ mũrwaru kwa ihinda iraya, akĩmũũria atĩrĩ: “Nĩ ũkwenda kũhona?” 7 Mũndũ ũcio warĩ mũrwaru akĩmũcokeria: “Mũthuri ũyũ, ndirĩ na mũndũ ũngĩndeithia gũtonya karia-inĩ rĩrĩa maĩ maunjugwo, na rĩrĩa ndathiĩ gũtonya, mũndũ ũngĩ agatonya mbere yakwa.” 8 Jesu akĩmwĩra: “Ũkĩra! Oya karĩrĩ gaku na wĩtware.” 9 Na o rĩo mũndũ ũcio akĩhona, akĩoya karĩrĩ gake na akĩambĩrĩria gwĩtwara.
Mũthenya ũcio warĩ wa Thabatũ. 10 Nĩ ũndũ ũcio Ayahudi makĩambĩrĩria kwĩra mũndũ ũcio wahonetio atĩrĩ: “Nĩ mũthenya wa Thabatũ, na Watho ndwĩtĩkĩrĩtie ũkuue karĩrĩ kau.” 11 No we akĩmacokeria: “Mũndũ ũrĩa ũhonirie anjĩrire, ‘Oya karĩrĩ gaku na wĩtware.’” 12 Nao makĩmũũria: “Nĩ mũndũ ũrĩkũ ũcio ũkwĩrire, ‘Oya karĩrĩ gaku na wĩtware’?” 13 No we ndaamenyaga nũ wamũhonetie, tondũ Jesu nĩ eeherete agatonya kĩrĩndĩ-inĩ kĩrĩa kĩarĩ hau.
14 Thutha ũcio Jesu akĩmũkora thĩinĩ wa hekarũ na akĩmwĩra ũũ: “Nĩ ũkuona rĩu ũrĩ mũhonu! Ndũkanehie rĩngĩ, nĩguo ndũgakorũo nĩ ũndũ mũru gũkĩra ũcio.” 15 Mũndũ ũcio agĩthiĩ na akĩra Ayahudi atĩ nĩ Jesu wamũhonetie. 16 Nĩ ũndũ wa gĩtũmi kĩu, Ayahudi nĩ maanyariraga Jesu, tondũ wa gwĩka maũndũ macio mũthenya wa Thabatũ. 17 No we akĩmacokeria atĩrĩ: “Awa atũire arutaga wĩra o nginya rĩu, o na niĩ ndũire ndutaga wĩra.” 18 Kĩu nĩkĩo gĩatũmire Ayahudi mambĩrĩrie gũcaria makĩria ũrĩa mangĩmũũraga, tondũ to Thabatũ oinaga, no ningĩ nĩ eetaga Ngai Awa, akeiganania na Ngai.
19 Nĩ ũndũ ũcio, akĩmacokeria akĩmeera: “Ngũmwĩra atĩrĩ na ma, Mũriũ ndangĩka ũndũ o na ũmwe eĩrĩte we mwene, no ekaga o ũrĩa tu onaga Ithe agĩka. Tondũ maũndũ marĩa Ithe ekaga, macio nĩmo Mũriũ o nake ekaga. 20 Nĩ gũkorũo Ithe nĩ endete Mũriũ na nĩ amuonagia maũndũ marĩa mothe we mwene ekaga, na nĩ ekũmuonia maũndũ manene gũkĩra macio, nĩguo inyuĩ mũgege. 21 Nĩ gũkorũo o ta ũrĩa Ithe ariũkagia arĩa akuũ akamacokia muoyo, noguo Mũriũ o nake acokagia muoyo mũndũ o wothe ũrĩa endaga. 22 Nĩ gũkorũo Ithe ndatuagĩra mũndũ o na ũmwe, no ũhoro wothe wa gũtuanĩra ehokeire Mũriũ, 23 nĩguo andũ othe maheage Mũriũ gĩtĩo o ta ũrĩa maheaga Ithe gĩtĩo. Mũndũ o wothe ũtaheete Mũriũ gĩtĩo ndaheete Ithe ũrĩa wamũtũmire gĩtĩo. 24 Ngũmwĩra atĩrĩ na ma, mũndũ o wothe ũiguaga ciugo ciakwa na agetĩkia Ũrĩa wandũmire arĩ na muoyo wa tene na tene, na ndagaatuĩrũo no nĩ oimĩte gĩkuũ-inĩ agatonya muoyo-inĩ.
25 “Ngũmwĩra atĩrĩ na ma, ihinda nĩ rĩroka, na nĩ ikinyu rĩu, rĩrĩa akuũ makaigua mũgambo wa Mũrũ wa Ngai, na arĩa mawathĩkagĩra nĩ magaatũũra. 26 Nĩ gũkorũo Ithe arĩ na ũhoti wa kũheana muoyo, na nĩ aheete Mũriũ o nake ũhoti wa kũheana muoyo. 27 Na nĩ amũheete wathani wa gũtuanĩra, tondũ we nĩwe Mũrũ wa mũndũ. 28 Mũtikagegio nĩ ũhoro ũcio, nĩ gũkorũo ihinda nĩ rĩroka, rĩrĩa arĩa othe marĩ thĩinĩ wa mbĩrĩra* makaigua mũgambo wake 29 na moime kuo, arĩa meekaga maũndũ mega mariũkio maheo muoyo, nao arĩa meekaga maũndũ moru mariũkio macirithio. 30 Ndingĩka ũndũ o na ũmwe ndĩĩrĩte niĩ mwene. Nduaga cira kuumana na ũrĩa njiguaga, na ituĩro rĩakwa nĩ rĩa ũthingu tondũ ndiĩkaga wendi wakwa, no njĩkaga wendi wa ũrĩa wandũmire.
31 “Korũo nĩ niĩ nyiki ndutaga ũira igũrũ rĩakwa mwene, ũira wakwa ndũngĩkorũo ũrĩ wa ma. 32 Nĩ harĩ ũngĩ ũrutaga ũira igũrũ rĩakwa, na nĩ njũĩ atĩ ũira ũrĩa arutaga igũrũ rĩakwa nĩ wa ma. 33 Inyuĩ nĩ mũtũmĩte andũ kũrĩ Johana, na akaruta ũira igũrũ rĩgiĩ ma. 34 O na kũrĩ ũguo-rĩ, niĩ ndirabatara ũira wa mũndũ, no ndĩroiga maũndũ macio nĩ getha inyuĩ mũhonokio. 35 Mũndũ ũcio aarĩ tawa ũrakana na ũkaruta ũtheri, na kwa ihinda inyinyi nĩ mweriragĩria gũkenera mũno ũtheri wake. 36 No ũira wakwa nĩ mũnene gũkĩra wa Johana, nĩ gũkorũo mawĩra marĩa Awa aaheire ndute, o maya ndĩraruta, nĩ marutaga ũira atĩ ndũmĩtwo nĩ Awa. 37 Na Awa ũcio wandũmire nĩ arutĩte ũira igũrũ rĩakwa. Inyuĩ gũtirĩ hĩndĩ mũrĩ mwaigua mũgambo wake kana mũkona ũrĩa atariĩ, 38 na kiugo gĩake gĩtiikaraga thĩinĩ wa ngoro cianyu, tondũ mũtiĩtĩkagia ũrĩa watũmirũo nĩwe.
39 “Inyuĩ mũthuthuragia Maandĩko tondũ mwĩciragia nĩ mũkoona muoyo wa tene na tene nĩ ũndũ wamo; macio nĩmo marutaga ũira igũrũ rĩakwa. 40 Ĩndĩ mũtiendaga gũka kũrĩ niĩ nĩguo mũgĩe na muoyo. 41 Niĩ ndiĩtĩkagĩra rũgooco rwa andũ, 42 no nĩ njũĩ wega atĩ mũtirĩ na wendo kwerekera Ngai ngoro-inĩ cianyu. 43 Njũkĩte na rĩĩtwa rĩa Awa, no mũtinjĩtĩkagĩra. No mũndũ ũngĩ angĩũka na rĩĩtwa rĩake mwene, ũcio no mũmwĩtĩkĩre. 44 Mũngĩnjĩtĩkia atĩa mũgĩtĩkagĩra kũgoocana inyuĩ ene, na mũticaragia rũgooco rũrĩa ruumaga kũrĩ Ngai ũrĩa ũmwe? 45 Mũtigecirie atĩ nĩ ngũmũthitanga kũrĩ Awa; nĩ harĩ ũrĩa ũmũthitangaga, nĩwe Musa, ũrĩa inyuĩ mũkoragwo mũigĩte mwĩhoko wanyu harĩ we. 46 Korũo nĩ mwĩtĩkĩtie Musa, o na niĩ mwanjĩtĩkia, nĩ gũkorũo nĩ aandĩkire ũhoro wakwa. 47 No angĩkorũo mũtiĩtĩkĩtie ũhoro ũrĩa aandĩkire-rĩ, mũngĩgĩtĩkia atĩa ũrĩa njugaga?”