Aroma
5 Kwoguo-rĩ, tondũ nĩ tũtuĩtwo athingu nĩ ũndũ wa wĩtĩkio, nĩ tũkenagĩrei thayũ hamwe na Ngai kũgerera harĩ Mwathani witũ Jesu Kristo, 2 kũgerera wĩtĩkio harĩ we nĩ twamũkĩrĩte ũtugi mũnene ũrĩa tũrĩ naguo rĩu; ningĩ nĩ tũkenagei nĩ ũndũ wa kĩĩrĩgĩrĩro gĩa kũgĩa na riri wa Ngai. 3 Na to ũguo tu, no nĩ tũkenagei rĩrĩa tũrĩ na mĩnyamaro, tondũ nĩ tũĩ atĩ mĩnyamaro nĩ ĩtũmaga tũgĩe na ũkirĩrĩria; 4 ũkirĩrĩria naguo ũgatũma twĩtĩkĩrĩke nĩ Ngai, nakuo gwĩtĩkĩrĩka nĩ Ngai gũgatũma tũgĩe na kĩĩrĩgĩrĩro, 5 nakĩo kĩĩrĩgĩrĩro kĩu gĩtingĩtũconorithia; nĩ gũkorũo Ngai nĩ atuonetie wendo wake kũgerera roho mũtheru ũrĩa twaheirũo.
6 Tondũ rĩrĩ, hĩndĩ ĩrĩa tũtaarĩ na kĩĩrĩgĩrĩro, Kristo nĩ aakuire nĩ ũndũ wa andũ arĩa matetigĩrĩte Ngai o ihinda rĩrĩa rĩatuĩtwo. 7 Nĩ gũkorũo ti ũndũ mũhũthũ mũndũ akue nĩ ũndũ wa mũndũ mũthingu; o na gũtuĩka kwahoteka mũndũ akue nĩ ũndũ wa mũndũ mwega. 8 No Ngai nĩ atuonetie wendo wake tondũ hĩndĩ ĩrĩa twarĩ ehia, Kristo nĩ aakuire nĩ ũndũ witũ. 9 Makĩria ma ũguo-rĩ, tondũ rĩu nĩ tũtuĩtwo athingu nĩ ũndũ wa thakame yake, nĩ tũkaahonokio kuuma harĩ marakara ma Ngai kũgerera harĩ we. 10 Tondũ rĩrĩ, angĩkorũo rĩrĩa twarĩ thũ nĩ twaiguithanirio na Ngai kũgerera gĩkuũ kĩa Mũrũ wake-rĩ, na githĩ tũtigũkĩhonokio o na makĩria nĩ muoyo wake rĩu tũiguithanĩtio nake. 11 Na to ũguo tu, no ningĩ nĩ tũrakenera Ngai kũgerera Mwathani witũ Jesu Kristo, ũrĩa ũtũmĩte tũiguithanio na Ngai.
12 Nĩkĩo o ta ũrĩa kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe tondũ nĩ meehĩtie othe—. 13 Nĩ gũkorũo mehia maarĩ thĩinĩ wa thĩ mbere ya Watho, no gũtirĩ mũndũ ũtuagwo mwĩhia gũtarĩ na watho. 14 O na kũrĩ ũguo, gĩkuũ gĩaathanaga o ta mũthamaki kuuma o hĩndĩ ya Adamu nginya Musa, nginya harĩ arĩa mateehĩtie ta ũrĩa Adamu eehĩtie, o ũcio watariĩ ta ũrĩa warĩ oke.
15 No kĩheo kĩa Ngai gĩtihaana ta mehia macio. Tondũ rĩrĩ, angĩkorũo andũ aingĩ maakuire nĩ ũndũ wa mehia ma mũndũ ũmwe-rĩ, githĩ ũtugi mũnene wa Ngai na kĩheo gĩake kũgerera ũtugi mũnene wa mũndũ ũmwe, nĩwe Jesu Kristo, itiakĩgunire andũ aingĩ makĩria! 16 Ningĩ ũguni wa kĩheo kĩu ndũhaana ta moimĩrĩro ma mehia ma mũndũ ũcio ũmwe wehirie. Nĩ gũkorũo thutha wa rĩhia rĩmwe andũ othe maatuirũo ehia, no thutha wa andũ aingĩ kwĩhia, kĩheo kĩarĩ gũtuo athingu. 17 Tondũ rĩrĩ, angĩkorũo nĩ ũndũ wa kwĩhia kwa mũndũ ũmwe gĩkuũ gĩaathanire o ta mũthamaki-rĩ, githĩ arĩa makaamũkĩra ũtugi ũcio mũnene na kĩheo kĩu kĩa ũthingu matigaatũũra muoyo na maathane o na makĩria marĩ athamaki nĩ ũndũ wa mũndũ ũmwe, na nĩwe Jesu Kristo!
18 Kwoguo-rĩ, o ta ũrĩa rĩhia rĩmwe rĩatũmire andũ a mĩthemba yothe matuwo ehia, no taguo gĩĩko kĩmwe kĩa ũthingu gĩatũmire andũ a mĩthemba yothe matuwo athingu nĩguo makaaheo muoyo. 19 Nĩ gũkorũo o ta ũrĩa kwaga gwathĩka kwa mũndũ ũcio ũmwe gwatũmire andũ aingĩ matuwo ehia, no taguo gwathĩka kwa mũndũ ũcio ũmwe gũgaatũma andũ aingĩ matuwo athingu. 20 Watho wokire nĩguo andũ mamenye atĩ nĩ mekaga mehia maingĩ. No mehia maingĩha, ũtugi mũnene ũkĩingĩha o na makĩria. 21 Nĩkĩ? Nĩguo o ta ũrĩa mehia na gĩkuũ ciathanire ta mũthamaki, ũtugi mũnene o naguo wathane ta mũthamaki kũgerera ũthingu, nĩguo andũ makaagĩa muoyo wa tene na tene kũgerera harĩ Jesu Kristo Mwathani witũ.