1 Akorintho
11 Mwĩgerekanagiei na niĩ, o ta ũrĩa niĩ ndĩĩgerekanagia na Kristo.
2 Nĩ ndamũgaathĩrĩria tondũ maũndũ-inĩ mothe nĩ mũndirikanaga na nĩ mũrũmĩtie biũ morutani o ta ũrĩa ndaamũkinyĩirie. 3 No ngwenda mũmenye atĩ mũtwe wa mũndũrũme o wothe nĩ Kristo; na mũtwe wa mũtumia nĩ mũndũrũme; na mũtwe wa Kristo nĩ Ngai. 4 Mũndũrũme o wothe ũhoyaga kana akaratha mohoro ehumbĩrĩte mũtwe, nĩ mũtwe wake aconorithagia; 5 no mũtumia o wothe ũhoyaga kana akaratha mohoro atehumbĩrĩte mũtwe, nĩ mũtwe wake aconorithagia, nĩ gũkorũo angĩhaana o ta mũtumia mwenje njuĩrĩ. 6 Nĩ ũndũ angĩkorũo mũtumia ndekwĩhumbĩra mũtwe, agĩrĩirũo kũrenga njuĩrĩ yake; no angĩkorũo kũrenga kana kwenja njuĩrĩ nĩ gũgũconorithia mũtumia-rĩ, agĩrĩirũo nĩ kwĩhumbĩra mũtwe.
7 Mũndũrũme ndagĩrĩirũo kũhumbĩra mũtwe wake, tondũ nĩwe mũhianĩre wa Ngai na riri wake, ĩndĩ mũtumia nĩ riri wa mũndũrũme. 8 Tondũ mũndũrũme ndoimire harĩ mũtumia, ĩndĩ mũtumia oimire harĩ mũndũrũme. 9 Na makĩria ma ũguo-rĩ, mũndũrũme ndoombirũo nĩ ũndũ wa mũtumia, ĩndĩ mũtumia ombirũo nĩ ũndũ wa mũndũrũme. 10 Nĩkĩo mũtumia agĩrĩirũo kwĩhumbĩra mũtwe rũrĩ rũũri rwa kuonania atĩ arĩ rungu rwa mũthuri wake, nĩ ũndũ wa araika.
11 Ningĩ-rĩ, ũhoro-inĩ wĩgiĩ Mwathani, mũtumia ndangĩtigithũkanio na mũndũrũme, o nake mũndũrũme ndangĩtigithũkanio na mũtumia. 12 Nĩ gũkorũo o ta ũrĩa mũtumia oimire harĩ mũndũrũme, no taguo mũndũrũme o nake aciaragwo nĩ mũtumia; no indo ciothe ciumĩte kũrĩ Ngai. 13 Tuai arĩ inyuĩ: Hihi nĩ kwagĩrĩire mũtumia kũhoya Ngai atehumbĩrĩte mũtwe? 14 Kaĩ ũrĩa andũ moombirũo ũtamũrutĩte atĩ njuĩrĩ ndaihu nĩ ya gũconorithia mũndũrũme, 15 no atĩ mũtumia angĩkorũo na njuĩrĩ ndaihu nĩ riri harĩ we? Tondũ aheetwo njuĩrĩ handũ ha kĩndũ gĩa kwĩhumbĩra. 16 No rĩrĩ, angĩkorũo nĩ harĩ mũndũ ũngĩenda gũkararia arũmĩrĩre mũtugo ũngĩ-rĩ, ithuĩ tũtirĩ na mũtugo ũngĩ, o na ciũngano cia Ngai itirĩ.
17 No ngĩmũhe motaaro maya, ndiramũgaathĩrĩria, tondũ mĩcemanio yanyu ndĩmũgunaga, no nĩ kũmũthũkia ĩmũthũkagia. 18 Mbere ndaya, ndĩraigua atĩ rĩrĩa mwacemania kĩũngano-inĩ, nĩ mũkoragwo na nyamũkano; na nĩ ndĩretĩkia ũhoro ũcio na gĩkĩro kĩigana ũna. 19 Tondũ hatarĩ nganja nĩ gũkũgĩa na ikundi cia nyamũkano gatagatĩ-inĩ kanyu, nĩguo arĩa magĩrĩire o nao mamenyeke.
20 Rĩrĩa mwacemania handũ hana, gũtihotekaga kũrĩa Irio cia Hwaĩ-inĩ cia Mwathani ũrĩa kwagĩrĩire. 21 Tondũ rĩrĩa mũkũrĩa-rĩ, o mũndũ akoragwo arĩte irio ciake cia hwaĩ-inĩ mbere, nĩ ũndũ ũcio ũmwe agakorũo ahũtiĩ nake ũngĩ arĩĩtwo. 22 Kaĩ mũtakoragwo na nyũmba cia kũrĩĩra na kũnyuĩra? Kana nĩ kũnyarara mũnyararaga kĩũngano kĩa Ngai na mũgatũma arĩa athĩni maigue thoni? Rĩu inyuĩ nĩ atĩa ingĩmwĩra? Hihi no ndĩmũgaathĩrĩrie? Ũndũ-inĩ ũcio, ndinamũgaathĩrĩria.
23 Tondũ ũndũ ũrĩa ndaarutirũo nĩ Mwathani noguo ndaamũrutire inyuĩ, atĩ ũtukũ ũrĩa Mwathani Jesu aarĩ akunyanĩrũo, oire mũgate, 24 na thutha wa gũcokia ngatho, akĩwenyũranga na akiuga: “Ũyũ ũrũgamĩrĩire mwĩrĩ wakwa, ũrĩa ũkũneanwo nĩ ũndũ wanyu. Ĩkagai ũũ nĩguo mũndirikanage.” 25 Thutha wa kũrĩa irio cia hwaĩ-inĩ, agĩka o taguo na gĩkombe, akiuga: “Gĩkombe gĩkĩ kĩrũgamĩrĩire kĩrĩkanĩro kĩrĩa kĩerũ kũgerera thakame yakwa, ĩkagai ũũ hĩndĩ o yothe mũkĩmĩnyua nĩguo mũndirikanage.” 26 Nĩ gũkorũo hĩndĩ ĩrĩa yothe mũrarĩa mũgate ũyũ na mũkanyuĩra gĩkombe gĩkĩ, mũrathiĩ na mbere kũmemerekia ũhoro wa gĩkuũ kĩa Mwathani, o nginya rĩrĩa agooka.
27 Nĩ ũndũ ũcio, mũndũ o wothe ũrĩaga mũgate kana akanyuĩra gĩkombe kĩa Mwathani na ndagĩrĩire, nĩ arĩkoragwo na mehia ũhoro-inĩ wĩgiĩ mwĩrĩ na thakame ya Mwathani. 28 Mũndũ nĩ ambe ethuthurie we mwene atigĩrĩre atĩ nĩ agĩrĩire, na hĩndĩ ĩyo nĩ arĩe mũgate na anyuĩre gĩkombe kĩu. 29 Nĩ gũkorũo mũndũ ũrĩa ũrĩaga na akanyua atekũmenya kĩrĩa mwĩrĩ ũrũgamĩrĩire, nĩ ituĩro erehagĩra we mwene. 30 Nĩkĩo aingĩ anyu matarĩ na hinya na nĩ arwaru, na angĩ aingĩ magakoma gĩkuũ-inĩ.* 31 No tũngĩtaũkĩrũo nĩ ũrĩa ithuĩ ene tũtariĩ, tũtingĩtuĩrũo. 32 No rĩrĩ, hĩndĩ ĩrĩa twatuĩrũo, nĩ Jehova* ũtũherithagia, nĩguo tũtikanatuĩrũo hamwe na thĩ ĩno. 33 Nĩ ũndũ ũcio ariũ a Ithe witũ-rĩ, rĩrĩa mũgũcemania hamwe kũrĩa irio icio, etanagĩrĩrai. 34 Mũndũ o wothe angĩkorũo arĩ mũhũtu, nĩ arĩĩre gwake mũciĩ, nĩ getha rĩrĩa mwacemania mũtikanatuĩrũo. No maũndũ macio mangĩ-rĩ, nĩ ngaamarũnga ndakinya kũu.