1 Akorintho
10 Na rĩu ariũ a Ithe witũ, ngwenda mũmenye atĩ maithe maitũ ma tene othe maarĩ rungu rwa itu na othe nĩ maahĩtũkĩire gatagatĩ-inĩ ka iria 2 na othe nĩ maabatithirio marĩ arũmĩrĩri a Musa kũgerera itu rĩu na iria, 3 na othe maarĩaga irio o imwe cia kĩĩroho 4 na othe maanyuaga maĩ o mamwe ma kĩĩroho. Nĩ gũkorũo maanyuaga kuuma ihiga-inĩ rĩa kĩĩroho rĩrĩa rĩamarũmagĩrĩra, na ihiga rĩu nĩ Kristo. 5 O na kũrĩ ũguo, Ngai ndaakenirio nĩ aingĩ ao, nĩ ũndũ ũcio makĩniinĩrũo werũ-inĩ.
6 Rĩu-rĩ, maũndũ macio maatuĩkire cionereria harĩ ithuĩ, nĩguo tũtikerirĩrie maũndũ moru, ta ũrĩa acio meerirĩirie. 7 O na tũtikanatuĩke ahoi mĩhianano ta ũrĩa amwe ao meekire; o ta ũrĩa kwandĩkĩtwo atĩrĩ: “Andũ acio magĩikara thĩ kũrĩa na kũnyua. Magĩcoka magĩũkĩra gwĩkenia.” 8 O na tũtikeingĩrie thĩinĩ wa ngomanio itagĩrĩire* ta ũrĩa amwe ao meekire, na nĩ ũndũ ũcio andũ ngiri mĩrongo ĩĩrĩ na ithatũ magĩkua mũthenya ũmwe. 9 O na tũtikanagerie Jehova* ta ũrĩa amwe ao maamũgeririe, na nĩ ũndũ ũcio makĩniinwo nĩ nyoka. 10 O na tũtigatuĩke andũ a kũnuguna ta ũrĩa amwe ao maanugunire, na nĩ ũndũ ũcio makĩniinwo nĩ mũniinani. 11 Maũndũ macio meekĩkire harĩ o marĩ cionereria, na makĩandĩkwo marĩ mũkaana harĩ ithuĩ arĩa tũratũũra hĩndĩ ya mũico wa mĩtabarĩre ya maũndũ.
12 Nĩ ũndũ ũcio-rĩ, mũndũ ũrĩa wĩciragia atĩ nĩ arũgamĩte nĩ emenyagĩrĩre ndakae kũgwa. 13 Gũtirĩ igerio mũgeretio narĩo rĩkĩrĩte marĩa makoraga andũ. No Ngai nĩ mwĩhokeku, na ndangĩreka mũgerio makĩria ma ũrĩa mũngĩhota gwĩtiria, no hĩndĩ ĩrĩa mwagerio nĩ arĩmũheaga njĩra nĩguo mũkahota gũkirĩrĩria.
14 Nĩ ũndũ ũcio endwa akwa-rĩ, ũragĩrai ũhoi mĩhianano. 15 Ndĩraaria na andũ marĩ na ũtaũku; tuai ũrĩa ndĩroiga arĩ inyuĩ. 16 Gĩkombe kĩa ngatho kĩrĩa tũcokagia ngatho nĩ ũndũ wakĩo-rĩ, na githĩ ti thakame ya Kristo tũnyitanagĩra? Naguo mũgate ũrĩa twenyũrangaga-rĩ, na githĩ ti mwĩrĩ wa Kristo tũnyitanagĩra? 17 Na tondũ mũgate nĩ ũmwe-rĩ, ithuĩ o na gũtuĩka tũrĩ aingĩ, tũrĩ mwĩrĩ ũmwe, nĩ ũndũ ithuothe tũrĩaga mũgate ũcio ũmwe.
18 Ta rorai andũ a Isiraeli: Na githĩ arĩa marĩaga magongona matikĩnyitanagĩra na kĩgongona? 19 Nĩ ũndũ ũcio-rĩ, hihi ndĩrenda kuuga atĩa? Hihi ndĩrenda kuuga atĩ kĩndũ kĩrĩa kĩrutĩirũo mũhianano kĩrĩ igongona nĩ kĩa bata, kana atĩ mũhianano nĩ wa bata? 20 Aca; no ndĩrenda kuuga atĩ kĩrĩa ndũrĩrĩ irutaga igongona, irutagĩra ndaimono no ti Ngai; na ndikwenda mũnyitanagĩre na ndaimono. 21 Mũtingĩkorũo mũkĩnyuĩra gĩkombe kĩa Jehova* na mũkorũo mũkĩnyuĩra gĩkombe kĩa ndaimono; mũtingĩkorũo mũkĩrĩa “metha-inĩ ya Jehova”* na mũkorũo mũkĩrĩa metha-inĩ ya ndaimono. 22 Kana hihi ‘nĩ Jehova* tũrenda gũtũma aigue ũiru’? Kaĩ tũrĩ na hinya kũmũkĩra?
23 Maũndũ mothe nĩ metĩkĩrĩtio nĩ watho, no ti maũndũ mothe marĩ ũguni. Maũndũ mothe nĩ metĩkĩrĩtio nĩ watho, no ti maũndũ mothe ma gwaka. 24 Mũndũ o wothe nĩ acaragie, ti maũndũ ma kwĩguna we mwene, no marĩa ma kũguna mũndũ ũrĩa ũngĩ.
25 Rĩagai kĩndũ o gĩothe kĩrĩa kĩendagio thoko-inĩ ya nyama, mũtekũũrĩrĩria ũhoro wakĩo nĩ ũndũ wa thamiri cianyu, 26 nĩ gũkorũo “thĩ na indo ciothe iria irĩ thĩinĩ wayo nĩ cia Jehova.”* 27 Mũndũ ũtarĩ mwĩtĩkia angĩmũnyita ũgeni na mũkorũo nĩ mũrenda gũthiĩ, rĩagai kĩndũ o gĩothe mũkũheo, mũtekũũrĩrĩria ũhoro wakĩo nĩ ũndũ wa thamiri cianyu. 28 No mũndũ o na ũrĩkũ angĩmwĩra atĩrĩ, “Kĩndũ gĩkĩ nĩ kĩrutĩtwo igongona,” mũtikarĩe, tondũ wa mũndũ ũcio wamwĩra na tondũ wa thamiri. 29 Ndirenda kuuga thamiri cianyu, no nĩ thamiri ya mũndũ ũcio ũngĩ. Tondũ rĩrĩ, wĩyathi wakwa ũngĩgĩtuĩrũo nĩ thamiri ya mũndũ ũngĩ nĩkĩ? 30 O na ingĩrĩa kĩndũ na njokerie Ngai ngatho nĩ ũndũ wakĩo-rĩ, hihi nĩ njagĩrĩirũo gwĩka ũguo angĩkorũo ũndũ ũcio nĩ ũratũma andũ angĩ manjambie?
31 Nĩ ũndũ ũcio-rĩ, kana nĩ kũrĩa mũrarĩa, kana nĩ kũnyua, kana nĩ ũndũ ũngĩ o wothe mũreka-rĩ, ĩkagai maũndũ mothe nĩguo mũgoocithie Ngai namo. 32 Tigagai kũhĩnga Ayahudi, Angiriki, o hamwe na kĩũngano kĩa Ngai, 33 o ta ũrĩa ndĩrerutanĩria gũkenia andũ othe maũndũ-inĩ mothe, itegũcaria ũrĩa ingĩĩguna niĩ mwene, o tiga ũrĩa andũ aingĩ mangĩgunĩka, nĩguo mahonokio.