1 Akorintho

4 Andũ magĩrĩirũo gũtuona tũrĩ ndungata cia Kristo na aramati a hitho cia Ngai. 2 Ũhoro-inĩ ũcio-rĩ, aramati magĩrĩirũo gũkoragwo marĩ ehokeku wĩra-inĩ wao. 3 Niĩ ndionaga arĩ ũndũ wa bata mũno gũthuthurio nĩ inyuĩ kana nĩ igooti rĩa andũ. O na niĩ mwene ndiĩthuthuragia. 4 Nĩ gũkorũo gũtirĩ ũndũ o na ũmwe ndĩrecukĩra. No ũguo ti kuuga atĩ ndĩ mũthingu; ũrĩa ũthuthuragia nĩ Jehova.* 5 Nĩ ũndũ ũcio-rĩ, mũtikanatue cira igũrũ rĩa ũndũ o na ũrĩkũ mbere ya ihinda rĩrĩa rĩtuĩtwo, o nginya Mwathani oke. Nĩ akaaguũria maũndũ ma hitho marĩa makoragwo nduma-inĩ, na aguũrie mathugunda ma ngoro, na hĩndĩ ĩyo o mũndũ nĩ akaamũkĩra ngatho ciake kuuma kũrĩ Ngai.

6 Rĩu ariũ a Ithe witũ-rĩ, ndaahũthĩra maũndũ macio harĩ niĩ na harĩ Apolo nĩguo inyuĩ mũgunĩke, nĩ getha kũgerera harĩ ithuĩ mwĩrute ũndũ ũyũ: “Mũtikanaagarare maũndũ marĩa maandĩke,” nĩguo mũtikanagĩe na mwĩtĩo, mũkĩonaga mũndũ ũmwe ta arĩ wa bata gũkĩra ũrĩa ũngĩ. 7 Tondũ rĩrĩ, nũ ũmũtuĩte a mwanya gũkĩra arĩa angĩ? Nĩ kĩĩ mũrĩ nakĩo mũtaamũkĩrire? Angĩkorũo nĩ kwamũkĩra mwaamũkĩrire-rĩ, nĩ kĩĩ kĩratũma mwĩtĩe ta atarĩ kwamũkĩra mwaamũkĩrire?

8 Hihi nĩ kũigania mũiganĩtie? Hihi nĩ gũtonga mũtongete? Hihi nĩ gwathana mwaambĩrĩirie gwathana ithuĩ tũtarĩ ho? Na arĩ korũo nĩ gwathana mwambĩrĩirie gwathana mũrĩ athamaki, nĩguo o na ithuĩ twathane hamwe na inyuĩ tũrĩ athamaki. 9 Nĩ gũkorũo ndĩrona ta Ngai atũigĩte ithuĩ atũmwo tũrĩ a mũico kũingĩrio kĩhaaro ta andũ matuĩrĩirũo kũũragwo, tondũ tũtuĩkĩte kĩndũ gĩa kwĩrorerũo nĩ thĩ, nĩ araika o na andũ. 10 Tũrĩ irimũ tondũ wa Kristo, ĩndĩ inyuĩ mũrĩ ogĩ thĩinĩ wa Kristo; ithuĩ tũtirĩ hinya, no inyuĩ mũrĩ na hinya; nĩ mũheetwo gĩtĩo, no ithuĩ nĩ twagĩirũo gĩtĩo. 11 O nginya ũmũthĩ ũyũ, tũthiaga na mbere kũhũta, kũnyota, kwaga nguo cia kwĩhumba, kũhũũrũo, kwaga ũikaro, 12 kũnoga tũkĩruta wĩra na moko maitũ. Hĩndĩ ĩrĩa twarumwo, tũkarathima; twanyarirũo, tũkomĩrĩria tũkirĩrĩirie; 13 rĩrĩa twacambio, tũgacokia tũhooreire; tũtuĩkĩte o ta gĩko na mahuti ma gũteo gũkũ thĩ o nginya ũmũthĩ ũyũ.

14 Ndirandĩka maũndũ maya nĩguo ndĩmũconorithie, no nĩ getha ndĩmũtaare mũrĩ ciana ciakwa nyendete. 15 Tondũ o na mũngĩkorũo na areri* ngiri ikũmi thĩinĩ wa Kristo, hatarĩ nganja mũtirĩ na maithe maingĩ; nĩ gũkorũo thĩinĩ wa Kristo Jesu, niĩ nduĩkĩte ithe wanyu kũgerera ũhoro ũrĩa mwega. 16 Nĩ ũndũ ũcio-rĩ, ndĩramũthaitha mwĩgerekanagie na niĩ. 17 Nĩkĩo ndĩratũma Timotheo kũrĩ inyuĩ, tondũ nĩ mwana wakwa nyendete na nĩ akoragwo arĩ mwĩhokeku thĩinĩ wa Mwathani. Ũcio nĩ akaamũririkania njĩra ciakwa cia gwĩka maũndũ ũhoro-inĩ wa Kristo Jesu, o ta ũrĩa ndĩrarutana kũndũ guothe ciũngano-inĩ ciothe.

18 Andũ amwe nĩ magĩte na mwĩtĩo, magĩĩciria atĩ ndigooka kũrĩ inyuĩ. 19 No nĩ ngũũka kũrĩ inyuĩ kahinda gatarĩ haraihu angĩkorũo ũcio nĩ wendi wa Jehova,* ti nĩ getha menye ũrĩa andũ acio etĩi moigaga, no nĩguo menye kana marĩ na hinya wa Ngai. 20 Nĩ gũkorũo Ũthamaki wa Ngai ti ũhoro wa kwaria no nĩ ũhoro wa hinya wa Ngai. 21 Mũkwenda ũndũ ũrĩkũ? Mũkwenda ngooka kũrĩ inyuĩ na rũthanju-ĩ, kana ngooka na wendo na ũhooreri?