1 Akorintho

3 Rĩu ariũ a Ithe witũ-rĩ, ndiahotaga kũmwarĩria ta andũ a kĩĩroho, no ta andũ a kĩĩmwĩrĩ, o ta tũkenge thĩinĩ wa Kristo. 2 Ndiamũheaga irio nyũmũ, no ndaamũheaga iria, tondũ mũtiakinyĩte kũhota kũrĩa. Na nginya o na rĩu, mũtirĩ mũrakinya kũhota kũrĩa, 3 nĩ gũkorũo mũrĩ o andũ a kĩĩmwĩrĩ. Tondũ gatagatĩ-inĩ kanyu kũrĩ na ũiru na rũmena-rĩ, githĩ mũtikĩrĩ andũ a kĩĩmwĩrĩ, na githĩ mũtiragĩthiĩ ta andũ a thĩ ĩno? 4 Atĩrĩrĩ, rĩrĩa mũndũ ũmwe oiga, “niĩ ndĩ wa Paulo,” nake ũngĩ akoiga, “niĩ ndĩ wa Apolo,” githĩ mũtiregerekania na andũ a thĩ ĩno?

5 Apolo akĩrĩ ũ? Nake Paulo-rĩ, nĩ we ũ? Acio nĩ ndungata iria ciamũteithirie inyuĩ gũtuĩka etĩkia, o ta ũrĩa Mwathani aamaheire o mũndũ wĩra wa ũtungata. 6 Niĩ nĩ kũhanda ndaahandire, Apolo agĩitĩrĩria maĩ, no Ngai nĩ we wakũririe, 7 kwoguo-rĩ, ũrĩa ũhandaga tiwe wa bata, o na kana ũrĩa ũitagĩrĩria maĩ, no Ngai, ũrĩa ũkũragia nĩwe wa bata. 8 Rĩu-rĩ, ũrĩa ũhandaga na ũrĩa ũitagĩrĩria maĩ nĩ kĩndũ kĩmwe, no o mũndũ akaamũkĩra kĩheo gĩake kũringana na wĩra wake mwene. 9 Nĩ gũkorũo ithuĩ tũrĩ arutithania wĩra hamwe na Ngai. Inyuĩ mũrĩ mũgũnda wa Ngai ũrĩa ũrarĩmwo, mwako wa Ngai.

10 Kũringana na ũtugi mũnene wa Ngai ũrĩa niĩ ndaaheirũo-rĩ, ndaakire mũthingi ta mwaki njorua, no rĩu harĩ mũndũ ũngĩ ũraaka igũrũ rĩa mũthingi ũcio. No rĩrĩ, o mũndũ nĩ aikare akĩroraga ũrĩa we mwene araaka igũrũ rĩa mũthingi ũcio. 11 Tondũ gũtirĩ mũndũ ũngĩaka mũthingi ũngĩ o na ũrĩkũ tiga ũrĩa wakĩtwo, na nĩguo Jesu Kristo. 12 Mũndũ o wothe angĩaka mũthingi-inĩ ũcio na thahabu, betha, mahiga ma goro, mbaũ, kana na nyeki cia mĩthemba ngũrani, 13 wĩra wa o mũndũ nĩ ũkaamenyeka ũrĩa ũtariĩ mũthenya wakinya. Wĩra ũcio wa o mũndũ ũkaamenyeka kana warĩ mwega kana warĩ mũru kũgerera mwaki. 14 Mwako ũrĩa mũndũ akĩte igũrũ rĩa mũthingi ũcio ũngĩkaaga kũhĩa, nĩ akaamũkĩra kĩheo; 15 no wĩra wa mũndũ ũngĩkaahĩa, nĩ akoorũo nĩguo, no we mwene nĩ akaahonokio; ĩndĩ, agaakorũo atariĩ ta mũndũ ũgereire mwaki-inĩ.

16 Kaĩ mũtoĩ atĩ inyuĩ ene mũrĩ hekarũ ya Ngai na atĩ roho wa Ngai ũkoragwo thĩinĩ wanyu? 17 Mũndũ o wothe angĩthũkia hekarũ ya Ngai, Ngai nĩ akaamũniina; nĩ gũkorũo hekarũ ya Ngai nĩ theru, na nĩ inyuĩ hekarũ ĩyo.

18 Mũndũ o na ũrĩkũ ndakeheenie: Angĩkorũo nĩ harĩ mũndũ o na ũmwe wanyu wĩciragia atĩ nĩ mũũgĩ thĩinĩ wa mũtabarĩre ũyũ wa maũndũ-rĩ,* nĩ atuĩke kĩrimũ, nĩ getha atuĩke mũũgĩ. 19 Tondũ ũũgĩ wa thĩ ĩno nĩ ũrimũ harĩ Ngai, nĩ gũkorũo nĩ kwandĩkĩtwo ũũ: “Nĩ anyitaga arĩa ogĩ mawara-inĩ mao ene.” 20 Ningĩ: “Jehova* nĩ oĩ atĩ mwĩcirĩrie wa andũ arĩa ogĩ nĩ wa tũhũ.” 21 Hakĩrĩ ũguo-rĩ, mũndũ o na ũrĩkũ ndakerahe nĩ ũndũ wa maũndũ marĩa mekagwo nĩ andũ; tondũ indo ciothe nĩ cianyu, 22 kana nĩ Paulo kana nĩ Apolo kana nĩ Kefa* kana nĩ thĩ ĩno kana nĩ muoyo kana nĩ gĩkuũ kana nĩ maũndũ marĩa marĩ kuo kana marĩa magooka, maũndũ mothe nĩ manyu; 23 na inyuĩ mũrĩ a Kristo; nake Kristo nĩ wa Ngai.