1 Akorintho
6 Hĩndĩ ĩrĩa ũmwe wanyu ahĩtanĩtie na ũrĩa ũngĩ-rĩ, nĩ kĩĩ kĩngĩtũma mũthitangane igooti-inĩ kũrĩ andũ matarĩ athingu, no ti mbere ya arĩa aamũre? 2 Kana hihi mũtiũĩ atĩ arĩa aamũre nĩ magaatuĩra thĩ ĩno? Na angĩkorũo nĩ inyuĩ mũgaatuĩra thĩ-rĩ, githĩ mũtikĩrĩ na ũhoti wa gũtuithania maũndũ marĩa manini mũno? 3 Kaĩ mũtoĩ atĩ nĩ tũgaatuĩra araika? Gũkĩrĩ ũguo-rĩ, githĩ tũtikĩrĩ na ũhoti wa gũtuithania maũndũ ma ũtũũro ũyũ? 4 Nĩ ũndũ ũcio-rĩ, mũngĩkorũo na maũndũ ma ũtũũro ũyũ mũrabatara gũtuithanio-rĩ, hihi andũ matetĩkĩrĩkĩte thĩinĩ wa kĩũngano nĩo mũthuuraga nĩguo mamũtuithanie? 5 Ndĩraria maũndũ maya nĩguo ndĩmũconorithie. Kaĩ gũtarĩ mũndũ o na ũmwe mũũgĩ gatagatĩ-inĩ kanyu ũngĩhota gũtuithania ariũ a Ithe? 6 Handũ ha ũguo-rĩ, mũrũ wa Ithe witũ ũmwe atwaraga mũrũ wa Ithe witũ ũngĩ igooti-inĩ, akamũthitanga harĩ andũ matarĩ etĩkia!
7 Hĩndĩ ĩrĩa mwathitangana magooti-inĩ-rĩ, nĩ gwĩconorithia mwĩconorithagia. Githĩ ti kaba mwĩtĩkagĩre kũhĩtĩrio? Githĩ ti kaba mwĩtĩkagĩre gũtunywo? 8 No inyuĩ-rĩ, mwĩkaga ariũ a Ithe wanyu maũndũ moru na mũkamatunya.
9 Kana hihi mũtiũĩ atĩ andũ arĩa matarĩ athingu matikagaya Ũthamaki wa Ngai? Mũtikanaheeneke. Andũ arĩa meingĩragia thĩinĩ wa ngomanio itagĩrĩire,* ahoi mĩhianano, arĩa matharagia, arũme arĩa metuaga ta atumia, arũme arĩa makomaga na arũme, 10 aici, andũ akoroku, arĩĩu, arumani, na atunyani matikagaya Ũthamaki wa Ngai. 11 Na ũguo nĩguo amwe anyu mwatariĩ. No nĩ mũthambĩtio na roho wa Ngai witũ mũgathera; nĩ mũtheretio; nĩ mũtuĩtwo athingu thĩinĩ wa rĩĩtwa rĩa Mwathani Jesu Kristo.
12 Nĩ njĩtĩkĩrĩtio maũndũ mothe nĩ watho, no ti maũndũ mothe marĩ ũguni. Nĩ njĩtĩkĩrĩtio maũndũ mothe nĩ watho, no ndigũtuĩka ngombo ya ũndũ o na ũrĩkũ. 13 Irio nĩ cia nda nayo nda nĩ ya irio, no icio cierĩ Ngai nĩ agaaciagithia kĩene. Mwĩrĩ ti wa kũingĩrio thĩinĩ wa ngomanio itagĩrĩire* no nĩ wa wĩra wa Mwathani, nake Mwathani nĩwe mwene mwĩrĩ. 14 No Ngai nĩ aariũkirie Mwathani na o na ithuĩ nĩ agaatũriũkia na hinya wake kuuma gĩkuũ-inĩ.
15 Kaĩ mũtoĩ atĩ mĩĩrĩ yanyu nĩ ciĩga cia Kristo? Kaĩ njagĩrĩirũo kweheria ciĩga cia Kristo ndĩcinyitithanie na mũmaraya? Ndirĩ hĩndĩ ingĩka ũguo! 16 Kaĩ mũtoĩ atĩ mũndũ o wothe ũnyitaine na mũmaraya akoragwo arĩ mwĩrĩ ũmwe nake? Nĩ gũkorũo Ngai oigĩte atĩrĩ: “Na acio erĩ matuĩke mwĩrĩ ũmwe.” 17 No mũndũ o wothe ũnyitaine na Mwathani akoragwo agwatanĩtio nake thĩinĩ wa roho. 18 Ũragĩrai ngomanio itagĩrĩire!* Mehia mangĩ o mothe mũndũ angĩhia matihutanĩtie ĩmwe kwa ĩmwe na mwĩrĩ wake, no mũndũ o wothe wĩingĩragia thĩinĩ wa ngomanio itagĩrĩire nĩ mwĩrĩ wake mwene ehagĩria. 19 Kaĩ mũtoĩ atĩ mwĩrĩ wanyu nĩguo hekarũ ya roho mũtheru thĩinĩ wanyu, ũrĩa mũheetwo nĩ Ngai? Ningĩ-rĩ, inyuĩ mũrĩ a Ngai, 20 nĩ gũkorũo mwagũrirũo na thogora mũnene. Nĩ ũndũ ũcio-rĩ, goocithagiai Ngai mwĩrĩ-inĩ wanyu.