1 Akorintho
7 Rĩu-rĩ, ũhoro-inĩ wĩgiĩ maũndũ marĩa mwaandĩkire, nĩ wega mũndũrũme kwaga kũhutia* mũtumia; 2 no tondũ wa kũingĩha kwa ngomanio itagĩrĩire,* mũndũrũme o wothe nĩ agĩe na mũtumia wake mwene, nake mũtumia agĩe na mũthuri wake mwene. 3 Mũthuri nĩ ahingagĩrie mũtumia bata wake, nake mũtumia ekage o ta ũguo harĩ mũthuriwe. 4 Mũtumia ndakoragwo na wathani harĩ mwĩrĩ wake mwene, no mũthuriwe nĩwe ũkoragwo naguo; o ta ũguo, mũthuri ndakoragwo na wathani harĩ mwĩrĩ wake mwene, no mũtumia wake nĩwe ũkoragwo naguo. 5 Mũtikaimanage o tiga rĩrĩa mũngĩkorũo mũiguanĩire gwĩka ũguo kwa ihinda, nĩguo mũgĩe na mahinda ma kũhoya na thutha ũcio mũcoke hamwe rĩngĩ, nĩ getha Shaitani ndagaikare akĩmũgeragia nĩ ũndũ wanyu kwaga kwĩgirĩrĩria. 6 No rĩrĩ, ndoiga ũguo ta arĩ rũtha ndĩraheana, no ti watho ndĩraruta. 7 No niĩ ingĩenda andũ othe maikare ta ũrĩa ndariĩ. O na kũrĩ ũguo, o mũndũ arĩ kĩheo gĩake mwene kuuma kũrĩ Ngai, ũmwe akaheo kĩmwe, nake ũngĩ akaheo kĩngĩ.
8 Rĩu-rĩ, ngwĩra arĩa matarĩ thĩinĩ wa kĩhiko o hamwe na atumia a ndigwa atĩ nĩ kaba matũũre o ta ũrĩa niĩ ndariĩ. 9 No angĩkorũo matingĩhota kwĩgirĩrĩria-rĩ, nĩ mahike kana mahikanie, tondũ nĩ kaba kũhika kana kũhikania gũkĩra kũhĩahĩaga nĩ thuti.
10 Nao arĩa marĩ thĩinĩ wa kĩhiko ngũmataara atĩrĩ, na ti niĩ nĩ Mwathani, atĩ mũtumia ndagĩrĩire kweherera mũthuriwe. 11 No angĩmweherera, nĩ atũũre atahikĩte kana hihi agĩcoke kũiguana na mũthuriwe; o na mũthuri ndagĩrĩire gũtiga mũtumia wake.
12 No arĩa angĩ ngũmeera atĩrĩ, na nĩ niĩ ti Mwathani: Mũrũ wa Ithe witũ o wothe angĩkorũo na mũtumia ũtarĩ mwĩtĩkia na mũtumia ũcio akorũo nĩ aretĩkĩra gũikarania nake, ndakamũtige; 13 na mũtumia angĩkorũo na mũthuri ũtarĩ mwĩtĩkia na mũthuri ũcio akorũo nĩ aretĩkĩra gũikarania nake, ndagatige mũthuriwe. 14 Nĩ gũkorũo mũthuri ũcio ũtarĩ mwĩtĩkia atuagwo mũtheru nĩ ũndũ wa mũtumia wake, nake mũtumia ũcio ũtarĩ mwĩtĩkia atuagwo mũtheru nĩ ũndũ wa mũrũ wa Ithe witũ ũcio; gũtangĩrĩ ũguo, ciana cianyu ingĩkorũo itarĩ theru, no rĩu nĩ theru. 15 No ũcio ũtetĩkĩtie angĩthuura kwehera, nĩ ehere; kũngĩthiĩ ũguo, mũrũ kana mwarĩ wa Ithe witũ to mũhaka aikaranie nake, no inyuĩ Ngai nĩ amũheete thayũ wake. 16 Tondũ rĩrĩ wee mũtumia, ũĩ atĩa kana nĩ ũkaahonokia mũthuriguo? Kana wee mũthuri-rĩ, ũĩ atĩa kana nĩ ũkaahonokia mũtumia waku?
17 No rĩrĩ, o ta ũrĩa Jehova* aheete o mũndũ igai rĩake, o mũndũ nĩ atũũre o ta ũrĩa Ngai aamwĩtire. Na watho ũcio ndĩraũhe ciũngano ciothe. 18 Hihi nĩ harĩ mũndũ o wothe wetirũo aruĩte? Mũndũ ũcio nĩ atũũre aruĩte. Hihi harĩ mũndũ o wothe wetirũo ataruĩte? Mũndũ ũcio nĩ atige kũrua. 19 Kũrua gũtirĩ ũndũ kuugĩte, na kwaga kũrua gũtirĩ ũndũ kuugĩte; ũndũ ũrĩa wa bata nĩ kũrũmĩrĩra maathani ma Ngai. 20 O ũrĩa mũndũ aatariĩ agĩĩtwo, nĩ atũũre ũguo. 21 Hihi warĩ ngombo rĩrĩa wetirũo? Ndũkareke ũndũ ũcio ũgũthĩnie; no angĩkorũo no ũhote kuuma ũkombo-inĩ, hũthĩra mweke ũcio. 22 Tondũ mũndũ o wothe warĩ ngombo rĩrĩa eetirũo harĩ Mwathani, nĩ akũũragwo ũkombo-inĩ agatuĩka wa Mwathani; o ta ũguo, mũndũ o wothe ũtaarĩ ngombo rĩrĩa eetirũo, nĩ ngombo ya Kristo. 23 Mwagũrirũo thogora mũnene; tigai gũtuĩka ngombo cia andũ. 24 Ariũ a Ithe witũ, o ũrĩa mũndũ aatariĩ agĩĩtwo, nĩ atũũre ũguo mbere ya Ngai.
25 Ũhoro-inĩ wa mũndũ* ũtarĩ thĩinĩ wa kĩhiko-rĩ, gũtirĩ watho heetwo nĩ Mwathani, no ngũheana mawoni makwa ndĩ mũndũ wonetio tha nĩ Mwathani nĩguo ngorũo ndĩ mwĩhokeku. 26 Nĩ ũndũ ũcio-rĩ, nguona kwagĩrĩire mũndũ athiĩ na mbere o ũrĩa atariĩ nĩ ũndũ wa ũrĩa mahinda maya marĩ maritũ. 27 Angĩkorũo nĩ wohanĩtio na mũtumia, tiga gũcaria ũrĩa ũngĩtigana nake. Angĩkorũo nduohanĩtio na mũtumia, tiga gũcaria mũtumia. 28 No o na ũngĩingĩra thĩinĩ wa kĩhiko, ndwĩhĩtie. Na mũndũ ũtarĩ wahika kana akahikania angĩingĩra thĩinĩ wa kĩhiko, ndehĩtie. No rĩrĩ, arĩa marĩingĩraga thĩinĩ wa kĩhiko nĩ marĩonaga thĩna mũtũũrĩre-inĩ wao. No niĩ ndĩrageria kũmũgitĩra.
29 Ningĩ nguuga atĩrĩ ariũ a Ithe witũ, kahinda karĩa gatigaru nĩ kanini. Kuuma rĩu, arĩa marĩ na atumia nĩ maikarage ta matarĩ, 30 arĩa marĩraga maikarage ta matararĩra, arĩa makenaga maikarage ta matarakena, arĩa magũraga indo maikarage ta matarĩ indo, 31 nao arĩa mahũthagĩra thĩ ĩno maikarage ta matamĩhũthagĩra biũ; nĩ gũkorũo maũndũ ma thĩ ĩno nĩ maragarũrũka. 32 Ngwenda mũkorũo mũtarĩ na mĩtangĩko. Mũndũ ũrĩa ũtahikanĩtie atangĩkagĩra maũndũ ma Mwathani, ũrĩa angĩkenia Mwathani. 33 No mũndũ ũhikanĩtie atangĩkagĩra maũndũ ma thĩ ĩno, ũrĩa angĩkenia mũtumia wake, 34 na nĩ agayũkanĩte. Ningĩ-rĩ, mũtumia ũtarĩ mũhiku, kana mũirĩtu gathirange, atangĩkagĩra maũndũ ma Mwathani, nĩguo akoragwo arĩ mũtheru mwĩrĩ na roho. No rĩrĩ, mũtumia mũhiku atangĩkagĩra maũndũ ma thĩ ĩno, ũrĩa angĩkenia mũthuriwe. 35 No ndĩroiga ũguo nĩguo inyuĩ mũgunĩke, ti kũmũgirĩrĩria, no nĩguo mwĩke ũndũ ũrĩa wagĩrĩire na mwĩrutagĩre harĩ Mwathani hingo ciothe hatarĩ ũndũ ũramũhĩnga.
36 No mũndũ o wothe angĩona atĩ ndarahota kwĩgirĩrĩria merirĩria ma ngomanio tondũ wa gũikara atarĩ thĩinĩ wa kĩhiko, na akorũo nĩ ahĩtũkĩte wĩthĩ, ũndũ ũrĩa wagĩrĩire nĩ ũyũ: Nĩ eke ũrĩa arenda; ndekwĩhia. Nĩ ahike kana ahikanie. 37 No mũndũ o wothe ũiganĩire ngoro-inĩ yake na akorũo ndarĩ na bata ũcio, no nĩ eyendeire we mwene na agatua itua ngoro-inĩ yake atũũre atarĩ thĩinĩ wa kĩhiko, nĩ egwĩka wega. 38 Ningĩ-rĩ, mũndũ o wothe ũkũingĩra thĩinĩ wa kĩhiko nĩ egwĩka wega, no mũndũ o wothe ũtekũingĩra thĩinĩ wa kĩhiko nĩ egwĩka wega makĩria.
39 Mũtumia akoragwo ohetwo hĩndĩ ĩrĩa yothe mũthuriwe arĩ muoyo. No mũthuriwe angĩkoma gĩkuũ-inĩ, no ahikĩre mũndũ o wothe angĩenda, thĩinĩ wa Mwathani tu. 40 No niĩ nguona atĩ, no akorũo na gĩkeno makĩria angĩaga kũhika rĩngĩ; na ndĩ na ma atĩ o na niĩ ndĩ na roho wa Ngai.