2 Akorintho

5 Tondũ nĩ tũĩ atĩ nyũmba itũ ya gũkũ thĩ, nĩyo hema ĩno, ĩngĩtharũrio, nĩ tũkũheo nyũmba nĩ Ngai, nyũmba ĩtakĩtwo na moko, ya gũtũũra tene na tene igũrũ. 2 Nĩ gũkorũo nĩ tũcayaga mũno tũrĩ thĩinĩ wa nyũmba ĩno, tũkerirĩria mũno kwĩhumba ĩrĩa itũ kuuma igũrũ, 3 nĩguo rĩrĩa tũkaamĩĩhumba, tũtikanakorũo tũrĩ njaga. 4 Ũrĩa kũrĩ nĩ atĩ, ithuĩ arĩa tũkoragwo thĩinĩ wa hema ĩno nĩ tũcayaga na tũgatangĩka mũno, tondũ tũtiendaga kũmĩaũra, ĩndĩ no twendaga kwĩhumba ĩyo ĩngĩ, nĩguo kĩrĩa gĩkuaga kĩniinwo nĩ muoyo. 5 Ngai nĩwe watũharĩrĩirie ũndũ ũyũ, o we watũheire roho ũrĩ ũũma wa maũndũ marĩa magoka.

6 Nĩ ũndũ ũcio, tũkoragwo na ũmĩrĩru hingo ciothe na tũkamenya atĩ ihinda rĩrĩa tũikaraga thĩinĩ wa mwĩrĩ arĩ guo mũciĩ witũ, nĩ tũraihanĩrĩirie na Mwathani, 7 nĩ gũkorũo tũthiaga na wĩtĩkio no ti na kuona. 8 No tũrĩ na mwĩhoko mũrũmu na ũrĩa tũngĩenda nĩ atĩ tũkorũo tũraihanĩrĩirie na mwĩrĩ, tũthondeke mũciĩ witũ hamwe na Mwathani. 9 Nĩ ũndũ ũcio, o na kũngĩtuĩka atĩ tũgũkorũo mũciĩ hamwe nake kana tũgũkorũo tũraihanĩrĩirie nake, muoroto witũ nĩ twĩtĩkĩrĩke nĩwe. 10 Nĩ gũkorũo no mũhaka ithuothe tũkaarũgama mbere ya gĩtĩ gĩa cira gĩa Kristo, nĩguo o mũndũ arĩhwo kũringana na maũndũ marĩa akoretwo agĩka arĩ thĩinĩ wa mwĩrĩ, marĩ mega kana marĩ moru.

11 Rĩu tondũ nĩ tũĩ gwĩtigĩra Mwathani-rĩ, tũtũũraga tũiguithagia andũ, no nĩ tũĩkaine wega nĩ Ngai. O na kũrĩ ũguo, ngwĩhoka atĩ nĩ tũĩkaine wega nginya nĩ thamiri cianyu. 12 Tũtirenda kwĩgathĩrĩria kũrĩ inyuĩ rĩngĩ, no tũramwĩra maũndũ maya nĩ getha tũmũrurumũre mwĩrahage nĩ ũndũ witũ, nĩguo mũhote gũcokeria arĩa merahaga nĩ ũndũ wa maũndũ marĩa monekaga na maitho no ti ũndũ wa marĩa marĩ thĩinĩ wa ngoro. 13 Angĩkorũo nĩ meciria twathũkĩte, twathũkĩte nĩ ũndũ wa Ngai; angĩkorũo tũrĩ na meciria mega, tũrĩ namo nĩ ũndũ wanyu. 14 Tondũ wendo wa Kristo nĩ ũtũtindĩkaga, nĩ gũkorũo ũũ nĩguo tuonete, atĩ mũndũ ũmwe nĩ aakuire nĩ ũndũ wa andũ othe; kwoguo, othe nĩ maagĩkuire. 15 Na aakuire nĩ ũndũ wa andũ othe nĩguo arĩa marĩ muoyo matigatũũre rĩngĩ nĩ ũndũ wao ene, no matũũre nĩ ũndũ wa ũcio wamakuĩrĩire na akĩriũkio.

16 Kwoguo-rĩ, kuuma rĩu gũthiĩ na mbere tũtionaga andũ na njĩra ya kĩĩmwĩrĩ. O na gũtuĩka amwe aitũ kũrĩ hĩndĩ moonaga Kristo na njĩra ya kĩĩmwĩrĩ, rĩu tũtimuonaga na njĩra ĩyo rĩngĩ. 17 Nĩ ũndũ ũcio-rĩ, mũndũ o wothe ũrĩ na ũiguano na Kristo, ũcio nĩ kĩũmbe kĩerũ; maũndũ marĩa ma tene nĩ maathirire; atĩrĩrĩ, rĩu kũrĩ na maũndũ merũ. 18 No maũndũ mothe moimaga kũrĩ Ngai, o we watũiguithanirie nake we mwene kũgerera Kristo na agĩtũhe ũtungata wa ũiguithanio, 19 naguo nĩ atĩ Ngai nĩ aaiguithanirie thĩ harĩ we mwene kũgerera Kristo, atekũmatarĩra mahĩtia mao, na agĩtwĩhokera ithuĩ ndũmĩrĩri ĩrĩa ya ũiguithanio.

20 Kwoguo-rĩ, ithuĩ tũrĩ mabarũthi handũ-inĩ ha Kristo, ta Ngai arathaithana kũgerera harĩ ithuĩ. Tũrathaitha andũ ũũ handũ-inĩ ha Kristo: “Ĩtĩkĩrai kũiguithanio na Ngai.” 21 Ũrĩa ũtaarĩ na mehia aatuirũo igongona rĩa mehia nĩ ũndũ witũ nĩguo tũtuĩke athingu maitho-inĩ ma Ngai.