2 Akorintho
4 Gũkĩrĩ ũguo-rĩ, tondũ nĩ twĩhokeirũo ũtungata ũyũ kũgerera tha iria tuonetio, tũtikuaga ngoro. 2 No nĩ tũreganĩte na maũndũ ma thoni marĩa mehithĩte, tũtikoragwo na mĩthiĩre ya wara na tũtiogomagia kiugo kĩa Ngai; ĩndĩ na njĩra ya kũmenyithania ũhoro wa ma, tuonanagia atĩ nĩ twagĩrĩire harĩ thamiri cia andũ othe maitho-inĩ ma Ngai. 3 Angĩkorũo ũhoro mwega ũrĩa tũhunjagia nĩ mũhumbĩre-rĩ, ũhumbĩirũo harĩ arĩa merekeire kũũra. 4 Ũhoro-inĩ wao, ngai wa mũtabarĩre ũyũ wa maũndũ* nĩ atumumarĩtie meciria ma arĩa matetĩkĩtie, nĩguo ũtheri wa riri wa ũhoro ũrĩa mwega wa Kristo, o we mũhianĩre wa Ngai, ndũkamaarĩre. 5 Nĩ gũkorũo tũtirahunjia ũhoro witũ ithuĩ ene, ĩndĩ tũrahunjia ũhoro wĩgiĩ Jesu Kristo atĩ nĩwe Mwathani na atĩ ithuĩ tũrĩ ngombo cianyu nĩ ũndũ wa Jesu. 6 Nĩ ũndũ Ngai nĩwe woigire atĩrĩ: “Reke ũtheri ware nduma-inĩ,” na nĩ atũmĩte ũtheri ware ngoro-inĩ citũ nĩguo ikenge na riri wa ũmenyo wĩgiĩ Ngai kũgerera ũthiũ wa Kristo.
7 No rĩrĩ, tũkoragwo na mũthithũ ũcio thĩinĩ wa indo cia rĩũmba, nĩ getha hinya ũrĩa ũkĩrĩte wa ndũire ũmenyeke atĩ uumaga kũrĩ Ngai no ti kuuma kũrĩ ithuĩ. 8 Tũhatĩkagwo na njĩra ciothe, no tũtihingĩrĩirio biũ; tũtukanagĩrũo, no tũtiagaga biũ wa gwĩka; 9 tũnyariragwo, no tũtitiganagĩrio; tũgũithagio thĩ, no tũtianangagwo. 10 Hĩndĩ ciothe tũkiragĩrĩria ũgwati wa kũũragwo ta ũrĩa Jesu aakiragĩrĩria, nĩguo ũtũũro wa Jesu o naguo wonekage harĩ ithuĩ. 11 Nĩ gũkorũo ithuĩ arĩa tũrĩ muoyo tũkoragwo ũgwati-inĩ wa gĩkuũ hĩndĩ ciothe nĩ ũndũ wa Jesu, nĩ getha ũtũũro wake o naguo wonekage mĩĩrĩ-inĩ ĩno itũ ya kũbutha. 12 Nĩ ũndũ ũcio, ithuĩ tũkoragwo ũgwati-inĩ wa gĩkuũ, na inyuĩ mũkona muoyo.
13 Rĩu tondũ tũrĩ na roho o ũmwe wa wĩtĩkio ta ũrĩa kwandĩkĩtwo atĩrĩ: “Nĩ ndoonanirie wĩtĩkio, nĩkĩo ndaaririe”; o na ithuĩ nĩ tuonanagia wĩtĩkio, na nĩkĩo twaragia, 14 nĩ kũmenya atĩ Ũrĩa wariũkirie Jesu nĩ agaatũriũkia o ta ũrĩa Jesu aariũkirio, na atũtware mbere yake hamwe na inyuĩ. 15 Nĩ gũkorũo maũndũ macio mothe mekagwo nĩ ũndũ wanyu, nĩguo andũ aingĩ maamũkĩre ũtugi mũnene wa Ngai tondũ andũ aingĩ makĩria nĩ maracokeria Ngai ngatho, na njĩra ĩyo makamũgooca.
16 Nĩ ũndũ ũcio tũtikuaga ngoro, no o na gũtuĩka mũndũ witũ wa na nja athiaga akĩagaga hinya-rĩ, mũndũ witũ wa na thĩinĩ athiaga akĩerũhagio mũthenya o mũthenya. 17 Tondũ o na gũtuĩka mathĩna marĩa tũcemanagia namo nĩ ma ihinda inyinyi na ti manene-rĩ, matũmaga tũgĩe riri mũnene makĩria na wa gũtũũra tene na tene; 18 o tũcũthĩrĩirie maũndũ marĩa matonekaga, no ti marĩa monekaga. Nĩ gũkorũo maũndũ marĩa monekaga nĩ ma ihinda inyinyi, no maũndũ marĩa matonekaga nĩ ma gũtũũra nginya tene na tene.