2 Akorintho

7 Nĩ ũndũ ũcio inyuĩ nyendete mũno-rĩ, tondũ tũrĩ na ciĩranĩro icio, nĩ twĩtheriei ũndũ o wothe ũrĩa ũngĩtũthũkia mwĩrĩ na roho, tũgĩtũmaga ũtheru witũ ũkinyanĩre ũhoro-inĩ wa gwĩtigĩra Ngai.

2 Tũhingũrĩrei ngoro cianyu. Gũtirĩ mũndũ tũhĩtĩirie, gũtirĩ mũndũ tũthũkĩtie, na gũtirĩ mũndũ tũheenetie nĩguo twĩgune. 3 Ndiroiga ũguo nĩ getha ndĩmũtuĩre. Nĩ gũkorũo mbere ĩyo nĩ ndoigire atĩ o na kana nĩ tũtũũre kana nĩ tũkue, mũrĩ ngoro-inĩ citũ. 4 Ndĩ na wĩyathi mũnene wa kwaria na inyuĩ. Nĩ ndĩrahaga mũno nĩ ũndũ wanyu. Nĩ nyũmĩrĩirio mũno; ndĩ na gĩkeno kĩnene mĩnyamaro-inĩ itũ yothe.

5 Atĩrĩrĩ, hĩndĩ ĩrĩa twakinyire Makedonia-rĩ, ti kũhurũka twahurũkire, no twathiire o na mbere gũthĩnĩka na njĩra ciothe​—andũ nĩ maatũnyariraga, na nĩ twatangĩkagĩra ciũngano. 6 Ĩndĩ Ngai, o we ũũmagĩrĩria arĩa makuĩte ngoro, nĩ aatũmĩrĩirie kũgerera gũka gwa Tito; 7 na to gũka gwake gwiki no nginya nĩ ũndũ wa ũrĩa omĩrĩirio nĩ ũndũ wanyu, o ta ũrĩa aatwĩrire ũhoro wanyu rĩrĩa aakinyire kũrĩ ithuĩ atĩ nĩ mũrerirĩria kũnyona, atĩ mũrĩ na kĩeha kĩingĩ, na atĩ nĩ mũratangĩka nĩ ũndũ wakwa; nĩ ũndũ ũcio ngĩgĩkena makĩria.

8 Tondũ o na gũtuĩka nĩ ndaamwĩkĩrire kĩeha marũa-inĩ makwa, ndiĩriraga nĩ gwĩka ũguo. O na gũtuĩka kĩambĩrĩria-inĩ nĩ ndeeririre ũndũ ũcio (nĩ gũkorũo marũa macio nĩ maamwĩkĩrire kĩeha, o na gũtuĩka no kwa ihinda inyinyi), 9 rĩu nĩ ngenaga, ti ũndũ nĩ mwagĩire na kĩeha, ĩndĩ nĩ tondũ kĩeha kĩu nĩ gĩatũmire mwĩrire. Nĩ gũkorũo mwagĩire na kĩeha na njĩra ya ũngai, na kwoguo ithuĩ tũtiatũmire mũingĩre ũgwati-inĩ o na ũrĩkũ. 10 Nĩ gũkorũo kĩeha kiumanĩte na ũngai gĩtũmaga mũndũ erire mehia na ahonokio, akaga kwĩriraga ũndũ-inĩ o na ũmwe; no kĩeha gĩa gũkũ thĩ kĩrehaga gĩkuũ. 11 Tondũ rĩrĩ, githĩ mũtikĩonete ũrĩa kĩeha kĩu kiumanĩte na ũngai gĩtũmĩte mũgĩe na kĩyo kĩnene, mũkorũo mũtarĩ na mahĩtia, mũrakario nĩ maũndũ moru, mwĩtigĩre Ngai, mũkorũo na wendi mũnene, mũgĩe na kĩyo, na mũrũnge maũndũ! Maũndũ-inĩ mothe nĩ muoonanirie atĩ mũrĩ athingu ũndũ-inĩ ũcio. 12 O na gũtuĩka nĩ ndaamwandĩkĩire, ndiandĩkire nĩ ũndũ wa mũndũ ũrĩa wehĩtie, o na kana nĩ ũndũ wa ũrĩa wehĩirio, ĩndĩ ndaamwandĩkĩire nĩ getha kĩyo kĩanyu gĩa gũtũigua kĩoneke gatagatĩ-inĩ kanyu maitho-inĩ ma Ngai. 13 Nĩkĩo tũũmĩrĩirio.

No makĩria ma kũũmĩrĩrio, ithuĩ nĩ twakenire o na makĩria nĩ ũndũ wa gĩkeno gĩa Tito, nĩ gũkorũo inyuothe nĩ mwamwĩkĩrire hinya ngoro. 14 Tondũ angĩkorũo nĩ ndeerahire harĩ we nĩ ũndũ wanyu-rĩ, ndiconokete; no rĩrĩ, o ta ũrĩa maũndũ marĩa mothe twamwĩrire inyuĩ maarĩ ma ma, noguo kwĩraha gwitũ harĩ Tito gũtuĩkĩte kwa ma. 15 Ningĩ, wendo wake harĩ inyuĩ nĩ mũnene aririkana wathĩki wanyu inyuothe, ũrĩa mwamwamũkĩrire na gĩtĩo kĩnene. 16 Nĩ ngenaga atĩ maũndũ-inĩ mothe no ngorũo na mwĩhoko harĩ inyuĩ.