2 Akorintho
8 Rĩu ariũ a Ithe witũ-rĩ, tũkwenda mũmenye ũhoro wa ũtugi mũnene wa Ngai ũrĩa ciũngano cia Makedonia cionetio. 2 Hĩndĩ ĩrĩa maarĩ na magerio manene ma mĩnyamaro, gĩkeno kĩao kĩnene o na marĩ athĩni mũno gĩatũmire ũtana wao wongerereke. 3 Tondũ niĩ ndĩ mũira atĩ meekire ũguo kũringana na ũhoti wao, o na makĩria ma ũhoti wao, 4 tondũ nĩ maatũthaithire mũno meyendeire nĩguo metĩkĩrio kũheana, manyite itemi ũtungata-inĩ wa gũteithia arĩa aamũre. 5 No meekire makĩria ma ũrĩa twerĩgĩrĩire, makĩamba kwĩheana kũrĩ Mwathani na kũrĩ ithuĩ kũgerera wendi wa Ngai. 6 Nĩ ũndũ ũcio tũkĩũria Tito arĩkĩrĩrie wĩra ũcio aambĩrĩirie gatagatĩ-inĩ kanyu, wa kuoya iheo iria mũheanaga mũkenete. 7 O na kũrĩ ũguo, o ta ũrĩa mũkoragwo mũingĩhĩirũo nĩ maũndũ mothe, harĩ wĩtĩkio na ciugo na ũmenyo na kĩyo kĩanyu kĩingĩ na harĩ wendo witũ kũmwerekera inyuĩ, ningĩ mũrokĩrĩrĩria harĩ kũheana mwĩyendeire.
8 Ti kũmwatha ndĩramwatha ngiuga ũguo, no ndĩramwĩra ngĩmũmenyithia ũhoro wa kĩyo kĩa arĩa angĩ na kũgeria kana wendo wanyu nĩ wa ma. 9 Tondũ nĩ mũĩ ũhoro wa ũtugi mũnene wa Mwathani witũ Jesu Kristo, atĩ o na gũtuĩka aarĩ gĩtonga, aatuĩkire mũthĩni nĩ ũndũ wanyu, nĩ getha mũtonge kũgerera ũthĩni wake.
10 Na ũndũ-inĩ ũcio nĩ ngũheana mawoni makwa: Wĩra ũyũ nĩ ũkũmũguna, tondũ mwaka ũmwe mũthiru nĩ mwaambĩrĩirie ũndũ ũcio na makĩria mũkĩonania wendi wanyu wa kũũruta. 11 Kwoguo-rĩ, kĩrĩkiei wĩra ũrĩa mwaambĩrĩirie, mũũrĩkie kũringana na kĩrĩa mũrĩ nakĩo o ta ũrĩa mwerirĩirie gwĩka hau kabere. 12 Tondũ rĩrĩ, angĩkorũo o mbere harĩ na wendi wa gwĩka ũndũ, nĩ wĩtĩkĩrĩkĩte kũringana na kĩrĩa mũndũ arĩ nakĩo, no ti kũringana na kĩrĩa atarĩ nakĩo. 13 Nĩ gũkorũo ndikwenda kũhũthĩria arĩa angĩ, no inyuĩ ndĩmũritũhĩrie; 14 ĩndĩ na njĩra ya kũiganania, ihinda-inĩ rĩrĩ mũingĩhĩirũo nĩ indo mũmateithĩrĩrie harĩa manyihĩirũo, nĩ getha nao rĩrĩa maingĩhĩirũo nĩ indo mamũteithĩrĩrie harĩa mũnyihĩirũo, nĩguo kũgĩe na ũigananĩru. 15 O ta ũrĩa kwandĩkĩtwo ũũ: “Mũndũ ũrĩa ũrĩ na nyingĩ ndaagĩire na nyingĩ mũno, nake ũrĩa ũrĩ na nyinyi ndaagĩire na nyinyi mũno.”
16 Nĩ ndĩracokeria Ngai ngatho nĩ ũndũ wa gũtũma Tito amũtangĩkĩre na kĩyo o ta ũrĩa tũmũtangĩkagĩra inyuĩ, 17 nĩ gũkorũo nĩ aathĩkĩire ũrĩa ithuĩ twamwĩrire, ningĩ nĩ ũndũ wa ũrĩa arĩ na wendi, egũka kũrĩ inyuĩ eyendeire. 18 Na tũkũmũtũma hamwe na mũrũ wa Ithe witũ ũrĩa ngumo yake ĩmenyekete ciũngano-inĩ ciothe nĩ ũndũ wa kũhunjia ũhoro ũrĩa mwega. 19 Na to ũguo tu, no ningĩ nĩ aathuurirũo nĩ ciũngano athiage hamwe na ithuĩ rĩrĩa tũraceerera ciũngano tũkĩheana kĩheo gĩkĩ gĩa kwĩyendera nĩguo Mwathani agoocwo na tuonanie ũrĩa tũkoragwo twĩhaarĩirie gũteithia. 20 Nĩ ũndũ ũcio nĩ tũrethema hatigakorũo mũndũ o na ũrĩkũ ũngĩtuonera mahĩtia ũhoro-inĩ wa mĩhothi ĩyo ya kwĩyendera ĩrĩa twĩhokeirũo kũheana. 21 Nĩ gũkorũo ‘tũrũmbũyagia maũndũ mothe na wĩhokeku, to maitho-inĩ ma Jehova* no nĩ nginya maitho-inĩ ma andũ.’
22 Makĩria ma ũguo, tũramatũma hamwe na mũrũ wa Ithe witũ ũngĩ ũrĩa tuonete kĩyo gĩake maũndũ-inĩ maingĩ thutha wa kũmũgeria na njĩra nyingĩ, na makĩria nĩ akoragwo amwĩhokete mũno. 23 No rĩrĩ, angĩkorũo nĩ harĩ na kĩũria o gĩothe kĩgiĩ Tito, menyai atĩ tũkoragwo hamwe nake na nĩ mũrutithania wĩra hamwe na niĩ nĩguo mũgunĩke; na angĩkorũo nĩ harĩ na ciũria ciĩgiĩ ariũ a Ithe witũ, menyai atĩ acio nĩ atũmwo a ciũngano na atĩ o nĩ riri wa Kristo. 24 Hakĩrĩ ũguo-rĩ, kĩmoniei atĩ wendo wanyu nĩ wa ma, na muonie ciũngano ũndũ ũrĩa ũtũmaga twĩrahe nĩ ũndũ wanyu.