Aefeso
5 Nĩ ũndũ ũcio, mwĩgerekanagiei na Ngai mũrĩ ciana ciake endete, 2 na mũthiage na wendo, o ta ũrĩa Kristo nake aatwendire na akĩruta muoyo wake nĩ ũndũ witũ ũrĩ igongona rĩrĩ na mũtararĩko mwega harĩ Ngai.
3 Ngomanio itagĩrĩire* na mĩthemba o yothe ya mĩtugo ĩtarĩ mĩtheru kana thuti itikanagwetwo gatagatĩ-inĩ kanyu, o ta ũrĩa kwagĩrĩire harĩ andũ aamũre; 4 o na kana mĩtugo ya thoni kana mĩario ya ũrimũ kana itherũ rĩa ũtũrĩka—maũndũ matagĩrĩire—handũ ha ũguo mũcokagie ngatho. 5 Nĩ gũkorũo nĩ mũĩ na mũgataũkĩrũo atĩ, gũtirĩ mũndũ o na ũrĩkũ wĩingĩragia ngomanio-inĩ itagĩrĩire* kana mũndũ wĩkaga mĩtugo ĩtarĩ mĩtheru kana mũndũ mũkoroku, ũguo nĩ kuuga mũhoi mĩhianano, ũrĩ na igai thĩinĩ wa Ũthamaki wa Kristo na wa Ngai.
6 Mũtikaheenio nĩ mũndũ o na ũrĩkũ na ciugo cia tũhũ, nĩ gũkorũo nĩ ũndũ wa maũndũ macio, marakara ma Ngai nĩ megũka harĩ arĩa matarĩ athĩki. 7 Hakĩrĩ ũguo-rĩ, mũtikanyitanagĩre nao; 8 nĩ gũkorũo nĩ harĩ hĩndĩ mwarĩ nduma no rĩu mũrĩ ũtheri ũhoro-inĩ wa Mwathani. Thiagai ta ciana cia ũtheri, 9 nĩ ũndũ maciaro ma ũtheri nĩ mĩthemba yothe ya wega na ya ũthingu na ya ma. 10 Ikaragai mũgĩthuthuragia maũndũ marĩa metĩkĩrĩkĩte nĩ Mwathani; 11 na mũtige kũnyitanĩra na ciĩko itarĩ na maciaro iria cia nduma; no rĩrĩ, ciguũriei ũrĩa itariĩ. 12 Tondũ nĩ thoni nginya kũgweta maũndũ marĩa mekaga hitho-inĩ. 13 Rĩu-rĩ, maũndũ mothe nĩ maguũragio nĩ ũtheri ũcio, kwoguo maũndũ mothe marĩa maguũragio matuĩkaga ũtheri. 14 Nĩ ũndũ ũcio, kwĩragwo atĩrĩ: “Arahũka, wee ũrĩ toro, na uume kũrĩ arĩa akuũ, nake Kristo nĩ egũkwarĩra.”
15 Kwoguo-rĩ, mwĩroragei biũ atĩ ũrĩa mũthiaga ti ta andũ matarĩ ogĩ no nĩ ta andũ ogĩ, 16 mũkĩhũthagĩra mahinda manyu wega biũ, nĩ gũkorũo matukũ maya nĩ moru. 17 Ũndũ-inĩ ũcio tigai gũtuĩka irimũ, no thiĩi na mbere gũtaũkĩrũo nĩ wendi wa Jehova.* 18 Ningĩ-rĩ, mũtikarĩagwo nĩ ndibei, tondũ ĩtongoragia mĩtugo-inĩ ya waganu, no ikaragai mũiyũrĩtwo nĩ roho mũtheru. 19 Aranagĩriai o mũndũ na ũrĩa ũngĩ na thaburi, nyĩmbo cia kũgooca Ngai, na nyĩmbo cia kĩĩroho. Mũkĩinaga na mũkĩgoocaga Jehova* na nyĩmbo ngoro-inĩ cianyu, 20 hingo ciothe mũgĩcokagĩria Ngai o we Ithe witũ ngatho nĩ ũndũ wa maũndũ mothe thĩinĩ wa rĩĩtwa rĩa Mwathani witũ Jesu Kristo.
21 Mwĩnyihanagĩriei o mũndũ na ũrĩa ũngĩ nĩ ũndũ wa gwĩtigĩra Kristo. 22 Atumia nĩ menyihagĩrie athuri ao o ta ũrĩa menyihagĩria Mwathani, 23 nĩ gũkorũo mũthuri nĩwe mũtwe wa mũtumia wake o ta ũrĩa Kristo arĩ we mũtwe wa kĩũngano, o we mũhonokia wa mwĩrĩ ũyũ. 24 Tondũ rĩrĩ, o ta ũrĩa kĩũngano kĩĩnyihagĩria Kristo, no taguo atumia magĩrĩirũo kwĩnyihagĩria athuri ao maũndũ-inĩ mothe. 25 Inyuĩ athuri, thiĩi na mbere kwendaga atumia anyu, o ta ũrĩa Kristo nake eendire kĩũngano na akĩĩheana nĩ ũndũ wakĩo, 26 nĩ getha agĩtherie na njĩra ya gũgĩthambia na maĩ, ũguo nĩ kuuga kiugo kĩa Ngai, 27 nĩguo atũme kĩũngano gĩkorũo na riri maitho-inĩ make, gĩtarĩ na karoro kana mũgũtha o na kana ũndũ ũngĩ ta ũcio, ĩndĩ gĩkorũo kĩrĩ gĩtheru na gĩtarĩ na kameni.
28 O ũndũ ũmwe na ũcio, athuri magĩrĩirũo kwendaga atumia ao o ta arĩ mĩĩrĩ yao ene. Mũthuri ũrĩa wendete mũtumia wake nĩwe mwene wĩyendete, 29 tondũ gũtirĩ mũndũ o na ũrĩkũ ũthũire mwĩrĩ wake mwene, ĩndĩ aũheaga irio na akawenda, o ta ũrĩa Kristo ekagĩra kĩũngano, 30 nĩ gũkorũo tũrĩ ciĩga cia mwĩrĩ wake. 31 “Nĩ ũndũ ũcio mũndũrũme nĩ agaatiga ithe na nyina manyitane na mũtumia wake, na acio erĩ matuĩke mwĩrĩ ũmwe.” 32 Hitho ĩyo ya Ngai nĩ ya bata. Rĩu ndĩraria ũhoro wa Kristo na wa kĩũngano. 33 O na kũrĩ ũguo, o mũndũ no mũhaka endage mũtumia wake o ta ũrĩa eyendete we mwene; nake mũtumia agĩrĩirũo kũheaga mũthuri wake gĩtĩo kĩnene.