Aefeso
6 Inyuĩ ciana, athĩkagĩrai aciari anyu mũrĩ na ũiguano na Mwathani, nĩ gũkorũo ũguo nĩguo kwagĩrĩire. 2 “Tĩaga thoguo na nyũkwa,” nĩ gũkorũo rĩu nĩrĩo rĩathani rĩa mbere rĩrĩ na kĩĩranĩro: 3 “Nĩguo maũndũ maku magaacĩre na ũtũũre ihinda iraya thĩinĩ wa thĩ.” 4 Na inyuĩ maithe-rĩ, mũtikarakaragie ciana cianyu, no thiĩi na mbere gũcirera mũgĩcirũngaga na mũgĩcitaaraga na njĩra cia Jehova.*
5 Na inyuĩ ngombo-rĩ, athĩkagĩrai athani anyu a gũkũ thĩ, mũgĩĩtigagĩra na mũrĩ na gĩtĩo, mũtarĩ na ũhinga ngoro-inĩ cianyu, ta ũrĩa mwathĩkagĩra Kristo, 6 to hĩndĩ ĩrĩa mũronwo, atĩ no getha mũkenie andũ, no mwĩkage ũguo mũrĩ ta ngombo cia Kristo, mũgĩkaga wendi wa Ngai na ngoro yothe. 7 Tungatagai mũrĩ na mwerekera mwega, ta arĩ Jehova* mũratungatĩra no ti andũ, 8 tondũ nĩ mũĩ atĩ ũndũ o wothe mwega mũndũ ekaga, nĩ akaarĩhwo nĩ Jehova,* arĩ ngombo kana atarĩ ngombo. 9 O na inyuĩ athani-rĩ, ĩkagai ngombo cianyu o ta ũguo, mũtegũciĩhĩtĩra, nĩ gũkorũo nĩ mũĩ atĩ Mwathi wao na wanyu arĩ igũrũ, na ndathutũkanagia.
10 Ngĩrĩkĩrĩria-rĩ, thiĩi na mbere kũgĩa na hinya thĩinĩ wa Mwathani kũgerera hinya wake mũnene. 11 Mwĩhumbei indo ciothe cia ita kuuma kũrĩ Ngai nĩguo mũhotage kwĩhanda wega mwĩtirie mawara ma Mũcukani; 12 tondũ tũrĩ mbaara-inĩ, na tũtirarũa na andũ, no tũrarũa na thirikari, na atongoria, na athani a thĩ ĩno ĩrĩ nduma, nĩo maroho moru marĩa marĩ igũrũ. 13 Kwoguo mwĩhumbei indo ciothe cia ita kuuma kũrĩ Ngai, nĩguo mũkaahota gwĩtiiria mũthenya ũrĩa wa ũũru, na mwarĩkia kũhingia maũndũ mothe, mwĩhande wega.
14 Nĩ ũndũ ũcio-rĩ, mwĩhandei wega, mwĩyohete mũcibi wa ũhoro ũrĩa wa ma njohero-inĩ cianyu, na mũkehumba gako ga gĩthũri karĩa ka ũthingu, 15 na magũrũ-inĩ manyu mwĩkĩre iratũ nĩguo mwĩhaarĩrie kũhunjia ũhoro ũrĩa mwega wa thayũ. 16 Makĩria ma indo icio ciothe-rĩ, oyai ngo ĩrĩa nene ya wĩtĩkio, ĩrĩa mũrĩhotaga kũhoria nayo mĩguĩ yothe ĩrĩa ĩrĩ mwaki ya ũrĩa mũru. 17 Ningĩ ĩkĩrai ngũbia ya ũhonokio, na muoe rũhiũ rwa roho, na nĩruo kiugo kĩa Ngai, 18 ningĩ hoyagai hingo ciothe mahoya ma mĩthemba yothe na mathaithana thĩinĩ wa roho. Na mũikarage mwĩiguĩte, mũgĩthaithaga Ngai hingo ciothe nĩ ũndũ wa arĩa othe aamũre. 19 Ningĩ hoyagai nĩ ũndũ wakwa, nĩguo heagwo ciugo hĩndĩ ĩrĩa ndaatumũra kanua, nĩ getha hotage kwaria na ũcamba ngĩmenyithania hitho ya Ngai ĩgiĩ ũhoro ũrĩa mwega, 20 ũhoro o ũcio niĩ ndĩ barũthi waguo njohetwo mĩnyororo, na ningĩ nĩguo hotage kwaria ũhoro waguo na ũcamba, o ta ũrĩa njagĩrĩirũo kwaria.
21 Rĩu-rĩ, nĩguo o na inyuĩ mũmenye ũhoro wakwa na ũrĩa ndĩrathiĩ na mbere, Tikiko, mũrũ wa Ithe witũ nyendete na ndungata njĩhokeku thĩinĩ wa Mwathani, nĩ ekũmũmenyithia maũndũ mothe. 22 Ndĩramũtũma kũrĩ inyuĩ nĩ ũndũ wa gĩtũmi gĩkĩ, atĩ mũmenye ũrĩa ithuĩ tũtariĩ na nĩguo omĩrĩrie ngoro cianyu.
23 Ariũ a Ithe witũ marogĩa na thayũ na wendo hamwe na wĩtĩkio kuuma kũrĩ Ngai Ithe witũ, na Mwathani Jesu Kristo. 24 Ũtugi mũnene ũroikara hamwe na arĩa othe mendete Mwathani witũ Jesu Kristo na wendo ũtangĩthira.