1 Athesalonike

5 Atĩrĩrĩ ariũ a Ithe witũ, ũhoro-inĩ wĩgiĩ mahinda na imera, mũtirabatara kwandĩkĩrũo ũndũ o na ũrĩkũ. 2 Nĩ gũkorũo inyuĩ ene nĩ mũĩ wega atĩ mũthenya wa Jehova* ũgoka o ta ũrĩa mũici okaga ũtukũ. 3 Hĩndĩ ĩrĩa magaakorũo makiuga, “Kũrĩ na thayũ na ũgitĩri!” kwanangwo kwao gũkaamakora o rĩmwe materĩgĩrĩire, o ta ũrĩa mũtumia ũrĩ na nda anyitagwo nĩ ruo rwa kũrũmwo, na matikahonoka. 4 No inyuĩ ariũ a Ithe witũ-rĩ, mũtirĩ nduma-inĩ, atĩ mũthenya ũcio ũmũkorerere o ta ũrĩa ũngĩkorerera aici, 5 tondũ inyuĩ mũrĩ ciana cia ũtheri na cia mũthenya. Tũtirĩ a ũtukũ o na kana a nduma.

6 Nĩ ũndũ ũcio-rĩ, rekei tũtigakome toro ta arĩa angĩ, no nĩ tũikarage twĩiguĩte na tũtũũrie ũhoti witũ wa gwĩciria. 7 Nĩ gũkorũo arĩa makomaga, makomaga ũtukũ, na arĩa marĩagwo nĩ njohi, marĩagwo ũtukũ. 8 No ithuĩ arĩa tũrĩ a mũthenya-rĩ, rekei tũtũũrie ũhoti witũ wa gwĩciria na twĩhumbe gako ga gĩthũri karĩa ka wĩtĩkio na wendo na kĩĩrĩgĩrĩro kĩrĩa kĩa ũhonokio kĩrĩ ta ngũbia 9 nĩ ũndũ Ngai ndaatũthuurire nĩguo tũkorũo nĩ marakara, ĩndĩ aatũthuurire tũgĩe na ũhonokio kũgerera Mwathani witũ Jesu Kristo. 10 Aakuire nĩ ũndũ witũ, nĩ getha o na tũngĩkorũo tũtakomete kana tũkomete-rĩ,* tũgaatũũrania nake. 11 Nĩ ũndũ ũcio-rĩ, ĩkĩranagai hinya na mwakanage mũndũ na ũrĩa ũngĩ, o ta ũrĩa mwĩkaga.

12 Rĩu tũramũthaitha ariũ a Ithe witũ, atĩ mũtĩage arĩa marutaga wĩra na kĩyo gatagatĩ-inĩ kanyu na makamũtongoria thĩinĩ wa Mwathani na makamũtaara; 13 na mũmeciragie mũno mũrĩ na wendo nĩ ũndũ wa wĩra wao. Ikaranagiai mũrĩ na thayũ. 14 Ningĩ-rĩ, tũramũthaitha ariũ a Ithe witũ atĩ mũkaanagie arĩa aremi, mũũmagĩrĩrie arĩa makuĩte ngoro, mũtiiragĩrĩre arĩa matarĩ na hinya, na mũkoragwo na ũkirĩrĩria harĩ andũ othe. 15 Tigagĩrĩrai atĩ mũtirarĩha ũũru na ũũru, no hingo ciothe mũthingatage maũndũ mega gatagatĩ-inĩ kanyu na harĩ andũ othe.

16 Kenagai hingo ciothe. 17 Hoyagai hingo ciothe. 18 Cokagiai ngatho nĩ ũndũ wa maũndũ mothe. Ũcio nĩguo wendi wa Ngai harĩ inyuĩ thĩinĩ wa Kristo Jesu. 19 Mũtikahorie mwaki wa roho. 20 Mũtikanyarare morathi. 21 Thuthuragiai maũndũ mothe; rũmagiai maũndũ marĩa mega. 22 Mwĩthemagei maũndũ mothe marĩa moru.

23 Ngai mwene thayũ aromũtheria biũ. Naguo roho na muoyo* na mwĩrĩ wanyu ariũ a Ithe witũ, ũrotũũra ũtarĩ na ũcuke na ũrĩ mũgima biũ hĩndĩ ya gũkorũo kuo kwa Mwathani witũ Jesu Kristo. 24 Ũrĩa ũmwĩtĩte nĩ mwĩhokeku, na hatarĩ nganja nĩ egwĩka ũguo.

25 Ariũ a Ithe witũ, tũhoyagĩrei.

26 Geithaniai inyuĩ ene na ngeithi theru cia kũmumunyana.

27 Ndĩramũthaitha thĩinĩ wa Mwathani mũtigĩrĩre atĩ marũa maya nĩ mathomerũo ariũ a Ithe witũ othe.

28 Ũtugi mũnene wa Mwathani witũ Jesu Kristo ũroikara hamwe na inyuĩ.