1 Timotheo
1 Nĩ niĩ Paulo, mũtũmwo wa Kristo Jesu kũgerera uuge wa Ngai Mũhonokia witũ na wa Kristo Jesu, o we kĩĩrĩgĩrĩro gitũ, 2 kũrĩ Timotheo, mwana wakwa kũna thĩinĩ wa wĩtĩkio:
Ũrogĩa na ũtugi mũnene na tha na thayũ kuuma kũrĩ Ngai Ithe witũ, na Mwathani witũ Kristo Jesu.
3 O ta ũrĩa ndakũringĩrĩirie ũtigwo Efeso rĩrĩa ndaathiaga Makedonia-rĩ, o na rĩu noguo ndĩreka, nĩ getha wathe andũ amwe matikarutane ũrutani ngũrani, 4 o na kana mathikĩrĩrie ngʼano cia maheeni na ũhoro wa ndĩra. Maũndũ ta macio matikoragwo na ũguni no matũmaga andũ megererie maũndũ ithenya rĩa kũrehe ũndũ o wothe uumĩte kũrĩ Ngai ũkonainie na wĩtĩkio. 5 Atĩrĩrĩ, ndĩraheana ũtaaro ũyũ nĩguo tũgĩe na wendo ũrĩa umanaga na ngoro njega na thamiri theru o na wĩtĩkio ũtarĩ na ũhinga. 6 Nĩ ũndũ wa kũregana na maũndũ maya, andũ amwe nĩ magarũrũkĩire ndeereti cia tũhũ. 7 Mendaga gũtuĩka arutani a watho, ĩndĩ matitaũkagĩrũo nĩ maũndũ marĩa moigaga o na kana marĩa manyitagĩrĩra mũno.
8 Rĩu-rĩ, nĩ tũĩ atĩ Watho nĩ mwega mũndũ angĩũhũthĩra ũrĩa kwagĩrĩire, 9 akĩmenyaga atĩ ndũthondekagĩrũo mũndũ ũrĩa mũthingu no ũthondekagĩrũo arĩa moinaga watho na aremi, arĩa matendete Ngai na ehia, arĩa matarĩ ehokeku na arĩa matatĩĩte maũndũ ma Ngai, arĩa moragaga maithe na arĩa moragaga maanyina, na arĩa moragaga andũ angĩ, 10 arĩa meingĩragia thĩinĩ wa ngomanio itagĩrĩire,* arũme arĩa makomaga na arũme, arĩa manyitaga andũ mĩgwate, aheenania, arĩa matahingagia mĩĩhĩtwa, na ũndũ ũngĩ o wothe ũrakararia ũrutani ũrĩa wagĩrĩire 11 kũringana na ũhoro ũrĩa mwega ũrĩ riri wa Ngai ũrĩa mũkeni, o guo ndehokeirũo.
12 Nĩ njokagĩria Kristo Jesu Mwathani witũ ngatho, o we waheire hinya, tondũ nĩ onire ndĩ mwĩhokeku akĩhe ũtungata, 13 o na gũtuĩka tene ndaarĩ mũrumi Ngai na mũnyarirani na mũndũ ũtaarĩ gĩtĩo. O na kũrĩ ũguo, nĩ ndaiguĩrĩirũo tha tondũ ndeekaga maũndũ macio nĩ ũndũ wa kwaga ũmenyo na kwaga wĩtĩkio. 14 No nĩ ndaamũkĩrire ũtugi mũnene wa Mwathani witũ o hamwe na wĩtĩkio na wendo ũrĩa uumaga kũrĩ Kristo Jesu. 15 Uuge ũyũ nĩ wa kwĩhokeka na nĩ wagĩrĩire gwĩtĩkĩrũo biũ: Kristo Jesu okire thĩinĩ wa thĩ kũhonokia ehia. Niĩ ndĩ wa mbere harĩ acio. 16 O na kũrĩ ũguo, ndaiguĩrĩirũo tha nĩguo kũgerera niĩ ndĩ wa mbere, Kristo Jesu onanie ũkirĩrĩria wake wothe, agĩtũma nduĩke kĩonereria harĩ arĩa mekũmwĩtĩkia nĩguo magĩe na muoyo wa tene na tene.
17 Rĩu-rĩ, Mũthamaki wa tene na tene, o we ũtũũraga tene na tene na ũtonekaga, o we wiki Ngai, aroheo gĩtĩo na agoocagwo tene na tene. Ameni.
18 Ũtaaro ũyũ nĩwe ndehokera, wee Timotheo mwana wakwa, kũringana na morathi marĩa maarathirũo igũrũ rĩaku, nĩguo kũgerera harĩ mo ũthiĩ na mbere kũrũa mbaara ĩrĩa njega, 19 ũrũmĩtie wĩtĩkio na thamiri njega, ĩrĩa andũ amwe maregete gwathĩkĩra, naguo wĩtĩkio wao ũgathũka biũ o ta meri yanangĩkĩte. 20 Himenayo na Aleksanda nĩ amwe ao, na nĩ ndĩmaneanĩte kũrĩ Shaitani marutwo na njĩra ya kũherithio nĩguo matige kũrumaga Ngai.