1 Timotheo

2 Nĩ ũndũ ũcio-rĩ, ngwamba kũũria atĩ andũ mahoyage, magathaithana, makahoera andũ arĩa angĩ, na magacokia ngatho nĩ ũndũ wa andũ a mĩthemba yothe, 2 o hamwe na athamaki na arĩa othe marĩ itĩ-inĩ cia ũnene, nĩguo tũthiĩ na mbere gũkorũo na ũtũũro mũhooreru na ũrĩ na thayũ twĩyamũrĩire Ngai biũ hatarĩ itherũ. 3 Ũndũ ũcio nĩ mwega na wa gwĩtĩkĩrĩka maitho-inĩ ma Ngai Mũhonokia witũ, 4 ũrĩa wendaga andũ a mĩthemba yothe mahonokio na magĩe na ũmenyo mũkinyanĩru wa ũhoro ũrĩa wa ma. 5 Nĩ gũkorũo kũrĩ Ngai ũmwe, na mũiguithania ũmwe gatagatĩ ka Ngai na andũ, na nĩwe Kristo Jesu. Mũndũ ũcio nĩwe 6 werutire arĩ ũkũũri ũringaine nĩ ũndũ wa andũ othe​—ũndũ ũcio nĩguo ũkaarutĩrũo ũira ihinda rĩaguo rĩakinya. 7 Ndaamũrirũo nduĩke mũhunjia na mũtũmwo nĩ ũndũ wa ũira ũcio​—ndĩraaria ma, ti maheeni ndĩraaria​—ũguo nĩ kuuga mũrutani wa ndũrĩrĩ ũhoro-inĩ wa wĩtĩkio na ũhoro wa ma.

8 Nĩ ũndũ ũcio ngwenda atĩ kũndũ guothe arũme mahoyage, makĩoyaga moko mao matheru na igũrũ, hatarĩ marakara kana ngarari. 9 O taguo, nao atumia magĩrĩirũo nĩ kwĩgemagia na njĩra ya kwĩhumba nguo njega, itakĩrĩtie njano, na ironania meciria mega, no ti na mĩthemba ĩtiganĩte ya kũrama njuĩrĩ na thahabu kana ruru kana nguo cia goro mũno, 10 no nĩ na njĩra ĩrĩa yagĩrĩire harĩ atumia arĩa meyamũrĩire Ngai, ũguo nĩ kuuga, kũgerera ciĩko njega.

11 Mũtumia nĩ erutage maũndũ akirĩte arĩ na wathĩki biũ. 12 Ndingĩtĩkĩria mũtumia arutage kana agaatha mũndũrũme, ĩndĩ nĩ aikarage akirĩte. 13 Nĩ gũkorũo Adamu nĩwe wambire kũũmbwo, Hawa agĩcoka akĩũmbwo. 14 Ningĩ Adamu ndaahenirio, no mũtumia ũcio nĩ aahenirio biũ na agĩtuĩka mwĩhia. 15 O na kũrĩ ũguo, mũtumia nĩ akaagitĩrũo kũgerera kũgĩa ciana, angĩthiĩ na mbere gũkorũo na wĩtĩkio na wendo na ũtheru o hamwe na meciria mega.