1 Timotheo
6 Andũ arĩa ngombo nĩ mathiĩ na mbere kũheaga arĩa mamaathaga gĩtĩo kĩnene, nĩ getha rĩĩtwa rĩa Ngai o hamwe na ũrutani wake itikanacambio. 2 Ningĩ-rĩ, arĩa maathagwo nĩ andũ metĩkĩtie matikanamaagĩre gĩtĩo atĩ tondũ nĩ ariũ a Ithe witũ. Ithenya rĩa ũguo, magĩrĩirũo gũtungataga meyendeire, nĩ gũkorũo arĩa magunĩkaga nĩ ũtungata wao mwega nĩ etĩkia na nĩ mamendete.
Rutanaga na ũkahatanĩrĩria na maũndũ marĩa ngwĩrĩte. 3 Mũndũ o wothe angĩrutana ũrutani ũngĩ ũtaratwarana na ũtaaro ũrĩa mwega, ũrĩa uumĩte kũrĩ Mwathani witũ Jesu Kristo, o na kana ũtaratwarana na wĩyamũrĩri Ngai-rĩ, 4 nĩ mwĩtĩo arĩ naguo na ndarataũkĩrũo nĩ ũndũ o na ũrĩkũ. Aiyũrĩtwo nĩ ngarari na ngũĩ ciĩgiĩ ciugo. Maũndũ macio marehaga ũiru, ngũĩ, njambanio, gwĩkũũanĩra ũũru, 5 ngucanio nyingĩ ciĩgiĩ tũmaũndũ tũnini kuumana na andũ arĩa mathũkĩtio meciria na matarataũkĩrũo nĩ ũhoro ũrĩa wa ma, magĩĩciragia atĩ no megune o ene nĩ ũndũ wa kwĩyamũrĩra Ngai. 6 Nĩ ma, kwĩyamũrĩra Ngai o hamwe na kũiganĩra nĩ kũrĩ ũguni mũnene. 7 Nĩ gũkorũo gũtirĩ kĩndũ twarehire thĩinĩ wa thĩ, na gũtirĩ kĩndũ tũngiuma nakĩo kuo. 8 Nĩ ũndũ ũcio, tũngĩkorũo na irio na nguo-rĩ, nĩ tũrĩiganagĩra na indo icio.
9 No arĩa makoragwo matuĩte itua rĩa gũtonga magũaga magerio-inĩ na mĩtego-inĩ na merirĩria-inĩ maingĩ ma ũrimũ na moru marĩa matũmaga andũ manangwo na maniinwo. 10 Nĩ gũkorũo kwenda mbeca nĩ kĩhumo kĩa maũndũ moru ma mĩthemba yothe, na andũ amwe nĩ ũndũ wa gũthingata wendo wa mbeca nĩ meheretio thĩinĩ wa wĩtĩkio na magethecanga kũndũ guothe na ruo rũingĩ.
11 No rĩrĩ, wee mũndũ ũyũ wa Ngai, ũragĩra maũndũ macio. Ĩndĩ thingataga ũthingu, wĩyamũrĩri Ngai, wĩtĩkio, wendo, ũkirĩrĩria, na ũhooreri. 12 Rũaga mbaara ĩrĩa njega ya wĩtĩkio; rũmia biũ kĩĩrĩgĩrĩro kĩa muoyo wa tene na tene o kĩu wetĩirũo na ũkiumbũra ũhoro wakĩo mbere ya aira aingĩ.
13 Ndagwatha mbere ya Ngai ũrĩa ũtũũragia indo ciothe muoyo, na mbere ya Kristo Jesu, o ũcio warutire ũira mwega arĩ mbere ya Pontio Pilato 14 atĩ ũrũmagĩrĩre maathani macio na njĩra theru na ĩtarĩ na ũcuke o nginya rĩrĩa Mwathani witũ Jesu Kristo akaaguũrio, 15 ũndũ ũrĩa ũkoonanio nĩ ũrĩa wiki Mũtongoria ũrĩ gĩkeno mahinda marĩa matuĩtwo maakinya. Ũcio nĩwe Mũthamaki wa arĩa mathanaga marĩ athamaki na Mwathani wa arĩa mathanaga marĩ athani, 16 ũrĩa wiki ũtangĩkua, o we ũtũũraga ũtheri-inĩ ũtangĩkinyĩrĩka, na gũtirĩ mũndũ ũrĩ wamuona kana ũngĩmuona. Ũcio arogĩa na gĩtĩo na ũhoti tene na tene. Ameni.
17 Atha arĩa atongu thĩinĩ wa mũtabarĩre ũyũ wa maũndũ* matigakorũo na mwĩtĩo, na matikaigage mwĩhoko wao harĩ ũtonga ũrĩa ũtamenyagĩrũo, ĩndĩ mehokage Ngai, ũrĩa ũtũheaga na ũtana indo ciothe iria tũkenagĩra. 18 Mere mekage maũndũ mega, makĩragĩrĩrie harĩ ciĩko njega, marĩ na ũtugi, meharĩirie kũgayagĩra andũ arĩa angĩ indo ciao, 19 makĩĩigagĩra mũthithũ wa mũthingi mwega wa mahinda marĩa maroka, nĩ getha megĩĩre na muoyo ũrĩa wa ma.
20 Wee Timotheo, gitagĩra kĩrĩa wĩhokeirũo, ũkĩreganaga na mĩario ya tũhũ ĩrĩa ĩthaahagia maũndũ matheru na ũreganage na ũũgĩ wa maheeni ũrĩa ũkararagia ũhoro wa ma. 21 Nĩ ũndũ wa kwĩyonania na ũũgĩ ta ũcio, andũ amwe nĩ meherete wĩtĩkio-inĩ.
Ũtugi mũnene wa Ngai ũroikara hamwe nawe.