2 Timotheo
4 Ndagwatha ndĩ mbere ya Ngai na Kristo Jesu, o ũcio ũgaatuĩra arĩa marĩ muoyo na arĩa makuĩte, na kũgerera kũguũrio gwake o na Ũthamaki wake: 2 Hunjia kiugo kĩa Ngai; hunjagia na kĩyo mahinda marĩa magĩrĩru o na marĩa maritũ; rũngaga andũ, ũkamakaania, na ũkamataaraga ũrĩ na wetereri o na njĩra njega ya kũrutana. 3 Tondũ nĩ gũkaagĩa na ihinda andũ matagaakirĩrĩria ũrutani-inĩ ũrĩa wagĩrĩire, no makaarũmĩrĩra merirĩria mao ene na meyũnganĩrie arutani arĩa makaamarutaga maũndũ marĩa matũ mao marenda kũigua. 4 Nĩ magaatiga gũthikĩrĩria ũhoro ũrĩa wa ma na mathikagĩrĩrie ngʼano cia maheeni. 5 No wee-rĩ, tũũria ũhoti waku wa gwĩciria maũndũ-inĩ mothe, kiragĩrĩrĩria rĩrĩa wacemania na maũndũ maritũ, rutaga wĩra wa kũhunjia, hingia ũtungata waku biũ.
6 Nĩ gũkorũo rĩu niĩ ndĩraitwo ta ũrĩa ndibei ya igongona ĩitagwo kĩgongona-inĩ, na ihinda rĩakwa rĩa kwehera rĩrĩ hakuhĩ. 7 Nĩ ndũĩte mbaara ĩrĩa njega, nĩ hanyũkĩte ihenya rĩu nginya mũthia, nĩ nũmĩtie wĩtĩkio. 8 Kuuma rĩu, kĩrĩa niĩ njigĩirũo nĩ thũmbĩ ya ũthingu, ĩrĩa ngaaheo mũthenya ũcio ĩrĩ kĩheo nĩ Mwathani, o we mũtuanĩri cira mũthingu, no to niĩ nyiki ngaaheo, no nĩ nginya arĩa othe makoretwo makĩĩrirĩria gũkoona kũguũrio kũu gwake.
9 Ĩka ũrĩa wothe ũngĩhota nĩguo ũũke kũrĩ niĩ o na ihenya. 10 Nĩ gũkorũo Dema nĩ aandiganĩirie tondũ nĩ eendire mũtabarĩre ũyũ wa maũndũ,* agĩthiĩ Thesalonike, Kreseni nake agĩthiĩ Galatia, nake Tito agĩthiĩ Dalamatia. 11 Luka wiki nowe tũrĩ nake. Oya Mariko mũũke nake, tondũ nĩ andeithagia mũno ũtungata-inĩ. 12 No nĩ ndatũma Tikiko athiĩ Efeso. 13 Na ũgĩũka-rĩ, ndehera kabuti karĩa ndaatigire gwa Karipo kũu Teroa, na ikũnjo, makĩria iria cia njũa.
14 Aleksanda ũrĩa mũturi wa indo cia gĩcango nĩ aanjĩkire ũũru mũno. Jehova* nĩ akaamũrĩha kũringana na ciĩko ciake. 15 O nawe nĩ ũrabatara kũmwĩmenyerera, tondũ nĩ aakararirie ndũmĩrĩri itũ mũno.
16 Hĩndĩ ĩrĩa ndetetagĩra riita rĩa mbere-rĩ, gũtirĩ mũndũ wokire kũndeithia, othe no kũndiganĩria maandiganĩirie, matikanatuĩrũo nĩ ũndũ wa ũguo. 17 No Mwathani nĩ aarũgamire hakuhĩ na niĩ na akĩnjĩkĩra hinya, nĩguo kũgerera harĩ niĩ, wĩra wa kũhunjia ũhingio biũ na ndũrĩrĩ ciothe ihunjĩrio; na nĩ ndaahonokirio kuuma kanua-inĩ ka mũrũthi. 18 Mwathani nĩ akaahonokia kuumana na ũndũ o wothe mũru na ahonokie nĩ ũndũ wa Ũthamaki wake wa igũrũ. We arogoocwo tene na tene. Ameni.
19 Ngeithĩria Pirisila na Akila na nyũmba ya Onesiforo.
20 Erasito aatigirũo Korintho, no Trofima ngĩmũtiga Mileto arĩ mũrwaru. 21 Ĩka o ũrĩa wothe ũngĩhota ũkinye gũkũ mbere ya hĩndĩ ya heho.
Nĩ wageithio nĩ Eubulu, na Pudene, Lino, Kilaudia, o hamwe na ariũ a Ithe witũ othe.
22 Mwathani aroikara na roho ũrĩa wonanagia. Naguo ũtugi wake mũnene ũroikara hamwe nawe.